2 Kor. 13 - Sümi Tiqhelimi Bible

Ashekhau Pikichi keu

¹ Hi ghuthu aküthüu ni ye nongu xuju ighini cheni. “Kiu-kiu vehu shiaghi namu thopimi kini momu küthü shepe aghí keu vechewo xakütha shikepu ke.”

² I no akiniù nongu xuju ighino nongu gholo ake lono axiné kümlà shi akemiqo vilo pikichivea ke. Ikemu itaghi I küküha lono pikithe ani: khunoqo püzüu axiné shive keno eno kütami khuu-khuu shi aghimu, I no ideighi kelo tipaqo qhimo nani,

³ kughengu nongu no Khristo no I vechewo piani ipikeu kimchikütsü khu anike. Khristo ye nongu tucho nikeu lo miqemileimoe, ikemu pa ye nongu dolo akumtou ke.

⁴ Mütsüqhei nike ghenguno, pa ye miqemilei keu shi ghi yedapithive ke, tishimu pa ye Alhou küká vechewo xüani. Tihutoi, ningu ye Khristo toi miqemilei ke, ikemu nongu tucho ghi Alhou küká vechewo ningu ye pa gholo no xü nani.

⁵ Nongu ye nongu küpülü mutupe ani keo mokeno nongu likhi nongu phukideküdai ju moayesa ke. Jisü Khristo ye nongu lolo ani ipi nongu ye mtha keshea? Nongu no pekuju lo tomlave ke kumo aye Khristo Jisü ye nongu lolo anike.

⁶ Eno I no aküpülü shi akeu ye ningu ye pekuju lo tomove kemiqo kumo kepi nongu no ithi anie.

⁷ Ikehu ningu ye nongu pelo achipikumo lakhimu shipemo nike ghenguno Alhou vilo akighini shi ani. Tiye timiqo pelo ningu ye peju keu lo puthugholuve kepi ithulu penike ghenguno kumoe ikemu ningu no tomove ketoi aghí namu nongu pelo kiu no achipiu keno tipau shipe niye ke.

⁸ Kughengu ningu ye kuchou lachile ghi kiumu shimlae ikemu kuchou ghengu likhi mülà moayesa ke.

⁹ Kugho-kughomu ningu no miqemilei akelo nongu kumto ghenguno ningu ye alokivishi cheni; eno ningu ye nongu pelo thowkha kuchopu kupukulu shiluve penike akighini shi acheni.

¹⁰ Hi ghenguno ni ye I no küha kelo no hipaqo vehu yè ani, tishianguno kughou I no ighini keno ni ye ayiküsa shi iw kükagha pephemo niye ke. Kükagha hipau ye nongu sünheqhive nike ghenguno kumo no nongu shiqhepuku penike Ampeu no I tsüke.

Kishekha Petha

¹¹ Ashekha shi, athiküzümi eno achelimiqo, alovishelo! Thowkha kümtsü achipi shini ke pükapütsalo, lakhi no lakhi shikumtolo, akükümsü lakhi shilo, külakishi lono xülo. Tishiaye Alhou’w kikimiye ngò aloino keu no nongu gholo anani.

¹² Khristo vechewo lakhi no lakhi petha tsülo.

¹³ Hilau Alhou’w timi akemi kümtsü no panonguw petha tsüpuwu ani.

¹⁴ Ampeu Jisü Khristo’w küpükini, Alhou’w kikimiye, eno Aghungu Kimthe kuposhukulu nongu kümtsü gholo apeniu.