2 Kor. 12 - Sümi Tiqhelimi Bible

Paul’w Kungunhetsü

¹ Aqheküza shikeu lono alá shiluve kepu kiumu küha kemu Ampeu lau no kungunhetsü ngò piyeküsüqo ithulu keu ghili pi aní cheni.

² I no Khristo lono timi lakhi ithi ani; ike tiye Ampe chighibidi züu ni ye kunguu kungugha aküthüu lo saikuve ke. Tiye aphimpi lono keo aphimpi qhive no iku keno ni ye mthae. Alhou no ithi ani.

^3-4 Iyei, ni ye kungugha aküthüu lo saikuve ke, ikemu aphimpi lono keo aphimpi qhive no iku keno ni ye mthae, ikemu Alhou no ithi anie. Eno timi kichí no piphe kümlapú tsaqo I no chilu, thime tipaqo ye timi khuu pelomu pipe nikeu azah tsüpüamo keqo ke.

⁵ Ni ye puju-shiju keu hitoi keu ghenguno qheza nani, ikemu ni ye iw tomo-chhimo keqo nguno alau ye, ni ye I likhi I ghenguno qhezamo nani.

⁶ Tsalá I no qheza nishi anamu, ni ye nikhanighami lakhi shimo nani, kughengu ni ye kuchou tsa pi kepu shi nani. Ikemu ni ye qheza nikeu lono süchileve ani, tishianguno timi khuu pelomu I no kiu mülà cheni momu pi cheni keno ithi akeu nguno alau ye I ghili kümsü pemo niye ke.

⁷ Piyeküsü hipaqo akümza kepu shi I pìye keu pesü I no qhezauve nosa kehu I ghimeqhi penike ghenguno I phi-ashi lo aküsüpu lakhi süpüa tsü ani, tiye Satan ghinimi lakhi ke.

⁸ I lau no ikhi sawuve tsü penike ghenguno I no ghuthu küthü kutólo Ampeu vilo qhüiniju ke.

⁹ Ikemu Pa no I vilo pi, “Iw küpükini ye O ghenguno lukümkha ke, kughengu I küká ye tomo-chhimo keu lono kupukülailu cheni.” Tighenguno Khristo küká I shou apenike ghenguno ni ye iw tomo-chhimo keu lo alokivishi alau qheza aní cheni.

¹⁰ Tishikehu, Khristo ghenguno tomo-chhimo keqo, jukünatha keqo, ghichhe-ghime shikeqo, pishi-puju keqo eno kushokütsü jeli shikeqo lo ni ye I lokiqi shi acheni. Kughengu kughou I no tomo-chhimoni keno, ni ye mutotoilu cheni.

Korinthiamiqo lau Paul Lokümsü

¹¹ I no I likhi I pesü nikhanighami lakhi toi shi kelo ye, nongu no kuchou no I pesü nikhanighami shive tsüae. Nongu ye ni akishé tsü akepu ke kughengu ni ye kumukumo kemu ni ghí “apostolmi akiqheu” ipi chekemiqo nguno ighono aqhou ye kumo ke.

¹² Ni ye tsükhoi shi no nongu lau apostolmiw kuchou michiqo gholo amchipu, akichiqhipu eno akümzapu kümlàqo pephe-piye ke.

¹³ I kuphu peniye khilemu nongu shipünamove keu ghenguno kumo aye niye kiu lono akukuhou kütauqo nguno alhoküsau shi nongu peitha püani keshea? Akipimí hipau ghenguno I kipimí qhitsülo.

¹⁴ Ni ye ghuthu aküthüu nongu xuju nike kutò pe ani, eno ni ye nongu shipüna keu shimo nani, kughengu ni ye nongu wu küakini avehupu shi anike kumoe ikemu nongu ampi avehupu shi anike. Kughengu anuliqo ye panongu pù-azaqo ghenguno pekütsü akepu shichemoe, ikemu apù-aza no anuliqo ghenguno pekütsü moayesa kepu shive cheni.

¹⁵ Ikehu ni ye alokivishi I no kiu ani keno nongu ghenguno kümtsü puwove nani eno titoi I likhi I ghenguno ghí puwove nani. I no alau nongu kimiye aye, nongu ye kitila likhi I kimiye nani keshea?

¹⁶ Tishiaghimu, ni ye khilemu nongu shipüna keu shipüamoe. Ikemu I no müqümgha shi no nongu küghaluve kepi nongu no kümsü cheni ke!

¹⁷ I no nongu lau puwu kemi timi khuala vechewo ni ye nongu peithapüsa keshea?

¹⁸ I no Titus pelo nongu lau wu penike hakite ke eno I no ningu thiküzüu pa gholo puwu ke. Titus ye nongu peithapüsa keshea? Ningu ye Aghungu lakhi lono apukhu-nepa lakhi shi acheni ke kumo keshea?

¹⁹ Nongu ye ado hito-tohi nongu lau no nilikhi ningu süsho ani küghashi kümsü ani keshea? Khristo gholo ache kemi toi ningu ye Alhou zülo no pi acheni; ikehu kimiye chekemi shompamiqo! Ningu no mülà keu kümtsü nongu shikumto pe nikeu ghenguno ke.

²⁰ Kughengu kughou I no ighini keno nongu ye I no shipe nishi akeu toi aghimo nikeu, eno nongu no I pelo shipe nishi akeu toi ni ithulumo nikeu ghenguno ni ye msà anie. Ni ye tilau küqhakümla, anhekushu, mutomushu keu, alakimine kimji, piküpüsa, xikishi, akumchho, eno kübangü keu aghíni keu msà ani.

²¹ Kughou I no tilau ideghini keno ni ye I Lhou no nongu gizü lono I shikukujo nikeu msà ani, eno timi kutomo no püzüu axiné shive no panonguw mithekumo, kipito xiné eno ghüpoghüzü kümlàqo shikeu lau no amlo pebidemo keu ghenguno ni ye amlokighishi shiveni cheni ke.