2 Kor. 11 - Sümi Tiqhelimi Bible

Paul eno Kichileu Apostolmiqo

¹ Ni ye kitila nikhanigha shinia kemu nongu pelo kutuu tsü penike I no lakuju shi ani. Iye, kimiye no kutuu tsülo!

² Ni ye Alhou lau no ighi keu nhekushu pesü nongu ju anheshu anie. Ni ye nongu pesü Khristo lau akimthe athathe lakhi toi tsü nike ghenguno Khristo pelo nongu kimi lakhi toi shipe nike I no pikiqhi shike.

³ Ikemu apighi no muqüijo Eve pishiqhive ketoi nongu kükümsüqo ghí amikucho eno akimthe lono Khristo lau pulopiniyi akeu lau no saküghüzüve tsü kenosaye ni ye msà ani.

⁴ Kughengu khuala no nongu lau ighino ningu no nongu vilo Jisü ghili kütsüve keu kumo no Jisü kütau ghili nongu vilo kütsü aghí aye, momu nongu no Aghungu ikhiluve keu kumo no aghungu kütau ikhilu aghí aye, momu nongu no atsakiviu ikhiluve keu kumo no kütau ikhilu aghí aye, nongu ye tipaqo gholo mülalei ilovae.

⁵ I likhi ni ye “apostolmi akiqheuqo” nguno ighono aqhokigheu kepi kümsü amoe.

⁶ Ni ye atsapimi lakhi shi püzü shitsa shi aghimoluvi, ikemu ni ye akighithi küha ke kumoe. Ningu ye alaghi thowkha lono hipau mütsümishei shi nongu lau pìyevae.

⁷ I likhi I shikuchunuve püzü I no ame lumo no Alhou tsakiviu pesü nongu lau kütsü keu vechewo nongu süqhepuku niye shikeu hu ye I ghenguno axiné keshea?

⁸ Nongu gholo mülà che kelo ni ye kütami kukuhouqo lau no akukuphu ithulu cheke, ike pìní aye ni ye nongu qe ani pi kütami ghesüqhi acheke.

⁹ Eno I no nongu gholo akelo kiuala avehupu shive keu ghenguno ni ye timi khumu shipüna püamoe, kughengu Macedonia lono athiküzümi ighi kemiqo no I no kiu avehupu shi keno tsüve cheke. Ni ye I likhi I pesü kiu laghi lonomu nongu shipünamo ke eno ni ye tishi ache nani.

¹⁰ Khristo’w kuchou I lolo mütsümishei ake toi Achaia bocho lo timi khumu I no agijivilei akeu hipau lakhave pemo nani.

¹¹ Kushiye kea? I no nongu kimiyemo keu ghenguno keshea? Alhou no ithi anike ni ye nongu kimiye acheni!

¹² I no kiu shi ani keno ni ye tipau shi anani. Tishianguno khunoqo no pano kümlà lo aqheküza shi ningu no shi chekeu toi pano ghí shi acheni ke ipi kümsü pe adokivi lunishi cheni keno timi tipaqo pelo akiqi kiumu kühave penike.

¹³ Kughengu timi titoi kemiqo ye kichileu apostolmiqo, pishikiqhi kümlamìqo eno Khristo’w apostolmiqo ke ipi peniye müqümügha shi chekemiqo ke.

¹⁴ Ikemu akümza akepu kühae, kughengu Satan ampi no vüqai keu kungumi lakhi ke ipi peniye müqümügha shike.

¹⁵ Tishiaye, satan qemiqo thotsü achipiumikucho qemiqo ke ipi peniye müqümügha shi aghí aye, hiye kiumu akichiqhi akepu kühae. Ashekha lo panongu ye panongu no kiu mülà keno tipau qhemi ajume ithulu nani.

Paul no Pa Ghimeqhi keu Ghili pi

¹⁶ I no pikithe ani: Timi khumu ni ye nikhanighami lakhi toi kümsü kepu kumoe. Ikemu nongu no tishi kümsü aye, I no kitila qhezalu nike ghenguno nikhanighami lakhi lau küsüqhi cheke toi I lau küsüqhi tsülo.

¹⁷ I likhi I shou pükhübe no qheza akeu hipau lo ni ye Ampeu no pi penishi keu toi pi anike kumoe, ikemu nikhanighami lakhi toi pi anike.

¹⁸ Timi kutomo no ayeghilomi no qheza chekeu toi qheza anike ghenguno ni ghí qheza nani.

¹⁹ Nongu ye ighono alokütsü ke ghenguno nikhanighamiqo gholo alokivishi küqha anike!

²⁰ Kuchou lo, nongu ye khukhumu nongu pesü aqüaxemi shikeu, nongu peithapüsa keu, nongu lau no adokivi lu keu, nongu ghasü chekemiqo momu nongu gi ghatsü chekemiqo kutólo ghí sasü küqha acheni ke.

²¹ Ni ye pinike kujo kepu kemu ningu ye tikithipu lo ighono miqemilei kemi ke! Ni ye itaghi nikhanighami lakhi toi pi auvea kemu, timi khuala no kiuala ghenguno ighümo no qhezakulupu shi aye ni ghí tipau ghenguno ighümo no qhezakulupu ani.

²² Panongu ye Hebrewmi keshea? Ni ghí thono. Panongu ye Israelmi keshea? Ni ghí thono. Panongu ye Abraham tikughukomi keshea? Ni ghí thono.

²³ Panongu ye Khristo qemiqo keshea? (Ni ye küghüzümi lakhi toi ishi piani.) Ni ye panongu nguno aqeu akiviu ke. Ni ye panongu nguno shishe mülà püani, akughuki lo ghuthu kutomo ilo püani, aloqhi I heqhi pe püani, eno ghuthu kutomo thive ke kumlho shipüani.

²⁴ Ni ye Jewmi no ghuthu shighi-toku küzaqhi chekeu ghuthu pungu I heqhi pe püani.

²⁵ Ghuthu küthü asüthalu pesü I heqhi pe püani, ghuthu lakhi ye atu pesü I veqhi pe püani, ghuthu küthü I no chekeu shuka-ki kuboleve keu shipüani, ghuthu lakhi ni ye putho-pucho lakhi azüghi lo ngo püani,

²⁶ ni ye tamo no izü acheni. Ni ye aghokiqo lo kümsapu sholue, süxakulumiqo lau no kümsapu sholue, ni ye nilikhi niw timiqo lau no kümsapu sholue, Jewkumomiqo lau no kümsapu sholue, mishighüna lo kümsapu sholue, küghünamokeu-a lo kümsapu sholue, azüghi lo kümsapu sholue; eno kichileu küpülümiqo lau no kümsapu sholue.

²⁷ Ni ye aghichhe-ghime shi mülà ache eno ghuthu kutomo zühu pe püamoe; ni ye müzü-tüghü shipüani eno ghuthu kutomo achuqupu küha no atsala puwo püani; ni ye süthi eno tiphimini küha no ighi püani.

²⁸ Kütau thowkha nguno alau no, akukuhou kümtsü ghenguno alokümsü akeu hu no tsalà kipetsü I kütakihiqhi keu sholu püani.

²⁹ Khuala no qeinai aghí kelo ni ghí qeinaive ke kumo keshea? Khuala no axiné lo ikiqi ilove kelo I lolo pitipüzaqhimove keshea?

³⁰ I no qheza moayesa kepu shi aye, thime khipaqo lono iw miqemilei keu pìye cheni keno tipaqo shou bepe qheza nani.

³¹ Alhokupuju lo sheqhe küzüpu Ampeu Jisü Lhou eno Papù no ithi anike, ni ye mikí amoe.

³² Damascus lo akükau Aretas qholo akeu angh no I kügha nike ghenguno Damascus mishighüna homxa pe khekutoluve ke.

³³ Ikemu ni ye ashoghi lo ikhisüve pe no alashe lakhi lono aliwo lo kighitipiqive püzü pa u lono pokaluve ke.