2 Kor. 10 - Sümi Tiqhelimi Bible

Paul no Paw Pichebekümlà Süsho

¹ Khristo kümtsha küghüvü vechewo ni Paul khuu nongu gholo agi kinheqhi no kusholu kelo kujo-kighiyi cheni kemu kughou putosüveni keno amlo kumto shi chekeu hu no nongu qhüiniju ani.

² I no nongu qhüiniju akeu ye kughou I no ighini keno, ningu ye ayeghi hipau küxü ghola lono xü cheni kepi kümsü chekemiqo lau I no müghachhoi shi chekeu toi I pelo nongu lau müghachhoi shipe kevilo.

³ Kughengu ningu ye ayeghi lo xü aghí namu, ayeghilomi no shi chekeu toi ningu ye aghüshi chemoe.

⁴ Ningu no aghünanu khipaqo pesü aghüshi cheni keno tipaqo ye ayeghilomi ghünanu kumoe. Ikemu tipaqo ye Alhou lau no ighi keu küká eno aliwo kuptu hexave kulupu küká anike.

⁵ Ningu no akikigheqo eno Alhou kighithi mujo niye keghilikishi shi pesü akeu jeli kümtsü hexave cheni, eno ningu no akükümsü kümtsü tshüsawo Khristo lau aghokulu shiluve pe cheni.

⁶ Eno nongu no aghokulu shilukhave kethiu hekibide kümlà shikeu kümtsü ghimeqhi nike ningu ye kutò pe ani.

⁷ Nongu ye ashou kogheküghü ju no küghathabe cheni. Khuala no panongu ye Khristo’w kepi pülükibe shi aye, ningu ghí panongu toi Khristo’w kepi kümsükutoju tsü moayesae.

⁸ Ike Ampeu no nongu xaqhive penike ghenguno kumo no aghungu lo nongu shiqhepuku peniye kükagha ningu tsüpüa keu ghenguno I no ighümo no aqheküza shi anamu ni ye tighenguno kujovemo nani.

⁹ Ni ye iw yèsüqo pesü nongu shikümsa niye pükapütsa anike kumoe.

¹⁰ Kughengu khami no ishi pi cheni, “Paw yèsüqo ye mishishei eno mükamüghai ke, ikemu lüthü lo pa ye zükulu ghola küha eno pa tsaqo ye ameküha ke.”

¹¹ Timi tipaqo pelo hi ithi pe moayesae: ningu no putou akelo yèsü lono kiu yè puwu keno ningu ampi no ighi kelo ningu kümlàqo lono pìye nani.

¹² Ningu ye alikhi ampi sheqhe chekemi khami sasü jokümtsa momu kimghi akepu kühae. Kughou panongu no pano likhi panongu pesü mighi kiléju eno pano likhi panongu pesü kimghi kilé keno, panongu ye alokütsümi ke kumoe.

¹³ Tishiaghimu, ningu ye tsaqüi kihikütha shipüa keu veche ghi aqheküza shimo nani, ikemu ningu qheküzapu ye Alhou ampi no ningu lau pichebetsü keu kümlà bocho lo anani, eno tipau bocho lo nongu ghí süküqha anike.

¹⁴ Ningu paghi no Khristo tsakiviu pesü alà kushuwa lono nongu lau ighi kehu ningu no agijivilei akeu lo ningu ye kihikütha bocho nguno alau wuve anike kumoe, ikemu ningu no nongu lau ighimo no aghí aye tishi pilu nani.

¹⁵ Momu ningu ye kütamiqo no mülave keu lo ninguw kihikütha vecheve ghi aqheküza shichemoe. Ninguw lakuju ye nongu küpülü thuwu akeu lo ningu kümlà alau shi nongu gholo pekholuni keu ke,

¹⁶ tishianguno ningu ye nongu vechesü ako-aqha kütau ghí atsakiviu pesü kütsükulupu shi niye ke. Kughengu ningu ye kütami no mülà pe qhive keu bocho lo ningu qheküza shinishi chemoe.

¹⁷ Ikemu Kuchoyesü lo pikeu toi, “Khuu no qhezani keno Ampeu no mülà keu shou qheza pelo.”

¹⁸ Kughengu timi lakhi no pa likhi pa sheqhe keu ye achipi kumoe, ikemu Alhou no sheqhe keu no achipi ke.