2 Kor. 1 - Sümi Tiqhelimi Bible

¹ Alhou pulou vechewo, Khristo Jisü’w apostol Paul eno ningu thiküzüu Timothy lau no, Korinth lo Alhou kukuhou ngò Achaia qhalo Alhou’w akimthemi kümtsü lau yèsü hipau yèlu ani:

² Ningu paPù Alhou eno Ampeu Jisü Khristo lau no ighi keu küpükini eno alokiqi nongu gholo apeniu.

Alokughuno kütsü Lhou Sheqhelo

³ Alhou eno ningu Mpeu Jisü Khristo Papù Alhou, kimiyeqhiyi keu apù eno alokughuno kümtsü tsü chekeu Lhou sheqhe ani.

⁴ Alhou ye ningu küküpüna kümtsü lo ningu lokughuno tsü acheni, tishi keu vechewo pa lau no alokughuno ithulu keu pesü ningu pelo shiluküsa jeli sholu pesü akemiqo lokughuno tsüpe niye ke.

⁵ Ningu no Khristo ghime gholo kupukuno shi küsaje keu hutoi, ningu lokughuno ghi Khristo vechewo kupukuno shi acheni.

⁶ Ningu no amloküsa shive aghí aye, tiye nongu lokughuno eno xakulupu ghenguno ke; ningu no alokughuno shi aghí aye, tiye nongu lokughunopu ghenguno ke, eno tipau no ningu no aghime shikeu toi nongu no aghime shi kelo kheakulu shi kutuulu no puqhekulu shipe niye ke.

⁷ Nongu ghenguno ninguw lakuju mutotoi ani, kughengu ningu no ithi akeu no nongu no niw shiluküsaqo lo küsaje ketoi, ni lokughuno lo ghí küsaje nani.

⁸ Athiküzümi eno achelimiqo, ningu no Asia bocho lo aküküpüna puju-shiju akeu nongu pelo mtha no ape nishimoe. Ningu no puqhe kümlapú shi shishe ningu munudaqhi ke, tishikehu ningu ye xü nani kepi pülümove.

⁹ Kuchou no ningu ye ningu pìthíve nani küghashi kümsüveke. Ikemu hipau shikeu ye ningu pelo nilikhi ni shou pükhümo no kithimi xüputhu chekeu Lhou shou pükhü peniye ke.

¹⁰ Pa no akümsa küyighüpu lono ningu xaphe ke, eno itaghi pa no xaphe tsü nani. Pa no ningu xaphe tsü anani kepi ningu ye pa shou ninguw lajupu qhivae,

¹¹ tiye nongu kighini vechewo ningu kuphutsü keu ghenguno ke. Tishi keu lono timi kutomo kighini khochile tsü ghi ningu lau küpükini kikimiye tsü keu ghenguno timi kutomo no ningu züqhu shi shikimthi tsü nani.

Paul Kukughu Kilive keu

¹² Ningu kijuvilei chekeu ye hike: Ningu no ayeghi hipau lo xü chekeu, eno akhotoshi nongu sasü akimthe eno Alhou lau no amikucho shi kütshükime keu ye ningu lolo kighithi no ashepe shitsü ani. Ningu ye ayeghi lokütsü shou pükhümoe ikemu Alhou’w küpükini shou pükhübe ke.

¹³ Kughengu ningu ye nongu no phimla kepu momu nongu no vethamla kepu lakhimu yèpüamoe. Eno I no laju akeu ye,

¹⁴ nongu no ningu ithikuthu khamla namu nongu ye ithikuthuluve nani kepi laju ani. Tishi keu vechewo Ampeu Jisü tsalà lo ningu no nongu ju pesü agijivilei ketoi nongu no ningu ju pesü agijivilei nani.

¹⁵ Ni ye hipau lo thebei akeu ghenguno atüghishi nongu xuju nishi ake tishianguno nongu pelo ghuthu kini alá shilu peniye ke.

¹⁶ Ni ye Macedonia lo wuche kikije nongu xuju nishi ake eno tilau no idechilesü Judea lo wuche kikije nongu pelo I phepuwu penishi ake.

¹⁷ I no hipau shinishi keu lo ni ye lhelheive keshea? Momu ni ye ayeghilomi ghola lono kughuve keu vechewo panongu toi kuchou lo ye “Moe, moe” ipi animu “Iye, iye” ipive ani keshea?

¹⁸ Ikemu mütsüqhei no Alhou ye pükhübekulu ke ghenguno ningu kükütsü sütsa lo nongu vilo “Iye” eno “Moe” ipimoe.

¹⁹ Kughengu Silas, Timothy eno I vechewo Alhou Nu Jisü Khristo ghili nongu lau kütsü keu hu ye “Iye” eno “Moe” kinikujo pichemoe, ikemu Alhou lau no alhokuthu lono “Iye” ipi cheni.

²⁰ Kughengu Alhou no kutomo piqhipüaghi namu, tipaqo kümtsü Khristo vechewo “Iye” ipi anike. Ikehu ningu no pa vechewo Alhou juküvü shi ghi “Amen” ipi cheni.

²¹ Alhou no ningu pelo nongu gholo Khristo lono ithamo no puthugholu pe ani. Pa no ningu nukishe ke,

²² eno paw ke ipikeu michipu ningu shou amichi shivae, eno ighi niye akeu hu ye ithulu nani pütsá ipikeu michi shi pa Ghungu pesü ningu mlo lo sǘvetsüae.

²³ I no Korinth lo ideghimo keu ye nongu loshipüsü tsümo niye ke eno Alhou no tipauw thopi ke. I no kuchou tsa pi aghimo aye Alhou no I ghime peniu.

²⁴ Ningu no nongu küpülü shou ampeu ke kumoe, ikemu ningu ye nongu lokivipu ghenguno nongu gholo mülà küqha acheni, kughengu nongu no aküpülü vechewo ithamo no puthugho acheni ke.