2 John 1 - Sümi Tiqhelimi Bible

¹ Kichimi lau no, Alhou no kisheluve keu totimi eno li nuliqo lau, khuu I no kuchou lono kimiye cheni keno—eno I likhi kumoe, ikemu kuchou ithi akemi kümtsü no kimiye cheni—

² kuchou khikhi ningu lolo xü acheni eno alhokuthu ningu gholo anani keno tipau ghenguno:

³ Apù Alhou eno Alhou Nu Jisü Khristo lau no ighi keu küpükini, kimiyekini eno aloino keu ye ningu gholo kuchou eno kikimiye lono anani.

⁴ Nongu nuliqo khami no Apù no ningu azah tsüve keu toi kuchou lo xü akeu phulu no ni ye ighono alokiqi kijè shi ani.

⁵ Eno itehi ye, kimiye chekeu totimio, ni ye O lau azakütsü akithé ye anike kumoe ikemu khikhi ningu no abothu lono acheni keno tipau hu yè anike. Ningu lakhi no lakhi kimiye kileni ipi I no qhüiniju ani.

⁶ Eno hino kikimiye ke: tiye ningu aghokulu shi pa zakütsüqo qholo xü nikeu ke. Nongu no abothu lono chiluve ketoi, pa zakütsü tiye nongu pelo kikimiye lono xüpe nikeu ke.

⁷ Pishikiqhimi kutomo khunoqo no Jisü Khristo ye ashi shi no ighike ipi ikhilu chemo keno panongu ye ayeghiqha lo ipeghiva ke ghenguno ni ye hipau pi anike. Hitoi kemi timi ye pishikiqhimi eno Khristo lakichilemi ke.

⁸ Nongu ye ningu no mülasüpüa keu hu pühavemo no qesaxu kuchopu ithulu kepu shi jukuto lo.

⁹ Khukhumu azüu powuve no Khristo kükütsü papemove aye pa lolo Alhou kühae; khukhumu Khristo kükütsü pape aye Apù eno Anu kinikujo acheni.

¹⁰ Tsalá khuala no nongu lau ighino akükütsü hipau peighimo aye, panongu pelo nongu ki lo iloghi pe kevilo momu panongu sasǘ kevilo.

¹¹ Khukhumu panongu sasǘ keu ye panonguw küsakügha kümlà lo küsaje anike.

¹² Ni ye nongu lau kutomo yè kepu shi ani, ikemu ni ye kaku ngò kiyezü peitha nishi amoe. Tishini ke züqhulo, ni ye nongu xuju ighi püzü agi no agi kinheqhi no küptsa nike laju ani, tishianguno ningu lokiqi pelo kupukülailu peniye ke.

¹³ Nongu chelimi nuliqo, khunoqo Alhou no kisheluvea keno, panongu no petha tsüpuwu ani.