1 Tim. 6 - Sümi Tiqhelimi Bible

¹ Aqüaxemi kuokhasü qholo akemi kümtsü no panongu mpeu ye gihu küzüpu kepi ikhilu moayesae, tishianguno Alhou je eno ningu kükütsü pipüsa keu shipemo nike.

² Aqüaxemi khunoqo no pano mpeuqo ghí küpülümi keno, aküpülü lakhi shivea ke ghenguno panongu mpeuqo gihumove kepu kumoe. Tishini ke züqhulo, panongu ye alau akivishi panongu mpemiqo qe moayesae kughengu aqüaxemi mpeuqo ye aküpülü lakhi shive keu vechewo aqüaxemiqo kimiye eno panongu kivipu lo amlo tsü cheni ke. No ye thime hipaqo pesü tamo no kütsü eno shikumto moayesa ke.

Kichileu Kükütsümiqo eno Pisa Kimiye keu

³ Tsalá khuala no ningu kükütsü gholo kunodi ghi kütsü no ningu Mpeu Jisü Khristo’w mütsümishei keu shikakütsü eno Alhou lau no ighi keu shiküka gholo puloküqhamo aye,

⁴ timi tipaqo ye alikhi apülü pivi chekemi eno kiumu vethalu chemoe. Panongu ye kütsala nikeu eno kiyi nikeu tsaqo lo amlo tsü keu vechewo anhekushu, kumgho keu, timi xishi keu, pülüküpüsa

⁵ eno tamo no akükümsü lhoküsami eno kuchou kühave keqo dolo kighe kilé keu süghi cheni. Eno Alhou sümsaluve aye kinikülü shive cheni ipi panongu no kümsü cheni.

⁶ Ikemu Alhou sümsaluve keu gholo alokiqi akeu ye alá kijè anike.

⁷ Kughengu ningu ye ayeghi lo kiumu pesü ighimoe eno ningu ye kiumu pesü wumla nanie.

⁸ Ikemu ningu no achuqupu eno tiphimini aghí aye, tino ningu ghenguno lukümkha ke.

⁹ Khunoqo no kinikulu shinishi cheni keno panongu ye ghukuju, alichhe, nikhanigha jeli eno shiküpüsapu kükümsü khipaqo kütsakungo keu lo timi sailove cheni keno ghukuju tipaqo lo ikiqive cheni.

¹⁰ Kughengu pisa kimiye keu ye küsakügha jeli kümtsü kuhu-aghü ke. Timi khami ye pisa kimiye kelau no aküpülü lono igho süsü wuvae eno amlokighishi kutomo no pano mlo vephopinivae.

Timothy lau Ashekhau Pichetsü keu

¹¹ Ikemu no Alhou’w timio, hipaqo kümtsü lono pove lo eno achipiumikuchou, Alhou sükümsa, aküpülü, kikimiye, kutuukulu eno mütshaivü keu phulo.

¹² Aküpülü ghüshi akivishi shilo. Thopimi kutomo gizü lono nono akivi piphe keu vechewo khikhi Alhou no lhokta küxü lo O kulù keno tipau tsüqülulo.

¹³ Thowkha kümtsü aküxü tsü chekeu Lhou eno Khristo Jisü khuu Pontius Pilate gizülo thopi shi akelo akivi pikiphe shi keno pa zülo no I no O pichetsü ani,

¹⁴ ningu Mpeu Jisü Khristo akiniù ighimo ke kutólo mütsümishei eno tukutiye küha no azakütsü hipau pelulo.

¹⁵ Pa no ighi nikeu tsalà hu ye Alhou akümghapu eno lakhi likhi akeu ayepetou, kükamiqo shou Akükau eno ampemiqo shou Ampeu no pa do achipi lono pephe-piye nani.

¹⁶ Pa likhi no thichemo keu Lhou eno pa phivilo wumla keu küvü lo xü acheni, khuu nomu pa ithulu püamo eno khuu nomu pa shou jupuku müla nani. Agigihu eno lhokta küká alhokupuju pa lau apelo! Amen.

¹⁷ Ayeghi hipau lo khunoqo no kinikülü shi ani keno panongu vilo akuchhoma shimo nikeu momu akiní khikhi pükhübelu chemo keno tipau shou panonguw lajupu qhimo no Alhou khuu no ningu lokiqipu ghenguno kinikulu shi ningu tsü cheni keno pa shou lajupu qhi penike azah tsülo.

¹⁸ Panongu pelo akivi shini keu, kupukuno shi akümlà kivi shini keu, tsükinimi eno pulopiniyi shi küsaje nikeu azah tsülo.

¹⁹ Hitoi shikeu lono panongu no pano sala kungu lo akinikhuki pekütsü pesü püalu nani eno tipau no ighi nikeu tiqheli ghenguno aboqha kumto shilu nani, tishianguno panongu pelo khipau no kuchou küxü keno tipau küxü tsüqüluve peniye ke.

²⁰ Timothy O! O pelo jukuto peniye kiu O piche püani keno tipau khekuto lo. Alhou sümsamo keu tsa eno lachile chekeu kükümsü khikhi timi no akighithi ipi cheni keno tipaqo lono putosüvelo,

²¹ timi khami ye tishi keu ghenguno aküpülü phevae. Küpükini nongu kümtsü gholo apeniu.