1 Tim. 5 - Sümi Tiqhelimi Bible

Chimemi, Kichimi eno Aqüaxemiqo

¹ Ayiküsa shi layemi lomipi kevilo, ikemu nongu papù lau toi pa qhüinijulo. Athiküzümi toi apumiqo peitha lo,

² azá toi topumiqo peitha lo, eno ilimiqo ye achepu toi müqhamiqhiyi shi peitha lo.

³ Chimemi khunoqo no aveküsa kuchou shi ani keno tipaqo kuphulo.

⁴ Ikemu chimemi lakhi no anuli momu atilimiqo aghí aye, tipaqo pelo atüghishi panongu kibolomi tucho keu vechewo panongu chineye akümlà lono pephe nikeu shikalu moayesa ke eno tishi keu vechewo panongu pù-aza eno asǘ-apüza lochilelu anani, kughengu hiye Alhou pulou ke.

⁵ Chimemi khuu no ighono aveküsa shi no li likhiveni keno li ye Alhou lau liw lajupu qhicheni eno putho-pucho kümtsü akighini shi no Alhou lau akukuphu khu cheni.

⁶ Ikemu chimemi khuu no ashi lo ghakiqipu ghenguno xü acheni keno li ye xü aphi lono thive keu paphi ke.

⁷ Shikakütsü hipaqo pesü timiqo tsülo, tishianguno timi khuu pelomu ikhikiphe shi ngukube pemo nike.

⁸ Khukhumu pano bolomiqo tuchomo eno akhotoshi pa likhi pa kibolomi vehupuqo kuphu tsümo keu ye aküpülü milivae eno pülümo kemi lakhi nguno alhoküsau ke.

⁹ Chimemi je yekithi keu lo chimemi hipaqo likhi sülu pelo, ampe lhotsügho vecheve kemi, li kimi lau amikucho shi chekemi,

¹⁰ eno li kümlà kivi ghenguno ajekipi shikemi. Akümlà kiviqo ye anuliqo saputhu keu, sasükini shikeu, Ampeu’w timiqo pukhu qhutsü keu, aveküsa shi akemi kuphu keu eno akümlà kivi jeliqo kümtsü lo amlo tsü keu ke.

¹¹ Chimemi alhotheqo ye yekithi hitoi keu lo panongu je sǘ kevilo. Kughengu kughou panongu shi-aji pulou shinishi keu no Khristo lau ikhiphetsüve keu theqhiveni keno panongu ye külakupu shive nishi nani.

¹² Tishi keu vechewo panongu ye panongu likhi panongu shou küghathabe keu süghive cheni, kughengu panongu ye panonguw tushokiqhi atüghiu hephove ke.

¹³ Tinguno alau no panongu ye akipichi shive no aki lakhi lono lakhi lo ilo keu lhoaye shiuve cheni. Eno panongu ye akipichi shive keu likhi kumo no panongu ye kütami kümlà lo chhosu keu no mighì acheni eno akiqi küha keu tsa kügha ghi pisümo kepu thimeqo lo ghi pisüwuve cheni.

¹⁴ Tighenguno ni ye chimemi alhothe shi akeqo pelo külakupu shive no anuli auve, panongu kibo tucho auve no aghümi pelo panongu pipütha nikeu lo adokivi lupemo nike panongu shikumto ani.

¹⁵ Kuchou lo chimemi khami ye Satan pape nike ghenguno tsüghüsü wuvae.

¹⁶ Totimi küpülümi khuala no liw tucho-mjo qholo chimemiqo aghí aye, li ye panongu kuphu amoayesa eno panongu ghenguno akukuhou pelo amakho mishí pe kepu kumoe, tishianguno akukuhou pelo chimemi khunoqo no ighono aveküsa lo ani keno panongu kuphulu peniye ke.

¹⁷ Kichimiqo eno akhotoshi akükütsü eno shiküka kümlà shi ache kemi khunoqo no akukuhou kümlapù lo akivishi kichetsü acheni keno panongu ye atha ajume veqabe ghí ithulu küzüpue.

¹⁸ Kughengu Kuchoyesü no ishi pike, “Amishitsü no athì qo akelo pa kichí khatsü kevilo,” eno “Akümlà kishiu ye pa jumeqo ithulu küzü ke.”

¹⁹ Thopimi kini momu küthü no süghi keu kumo aye kichimi shou ngukube keu lo ini kevilo.

²⁰ Ikemu kichimi khunoqo no axiné shi ani keno no ye kümtsü zülo no alòmi pilo, tishianguno kütamiqo pikichilu kepu shi nani ke.

²¹ Alhou, Khristo Jisü eno kungumi kishè kipheqo zülo no agikuju shimo no shikakütsü hipaqo pape pe nikeu, eno agikuju lono kiumu shipemo nike I no O pichetsü ani.

²² Akukuho lo aghinimi shipe nikeu ghenguno tsaqütsaleimo kelo ye anguagha betsü kevilo, eno kütami xinéqo gholo küsaje kevilo. O likhi o pesü akimthe shi qhilo.

²³ Azü likhi ye kevilo, eno O kive küsǜ eno nono tamo no sǜ achekeu ghenguno aji kititi peitha lo.

²⁴ Timi khami xiné ye mütsüqhei ke, eno panongu xiné no panongu sasü azüu no küghakütha-a tove cheni; ikemu kütami xiné ye athiu no ithulu keu shi cheni.

²⁵ Tipau tho lono akümlà kivi ye mütsüqhei ke, eno mütsüqheimo keqo ghí alhokuthu ghenguno küsüpe püa müla nani.