1 Tim. 4 - Sümi Tiqhelimi Bible

¹ Ashekha ghuloki lo timi khami ye aküpülü pheve no pishikiqhi ghunguqo eno tüghami no shika keu thimeqo pape wuve nani kepi Alhou Ghungu no mütsümishei pivae.

² Shiküka hitoi keqo ye kühakügha kimkimiqo lau no ighi cheni. Panongu lolo kighithi ye ayì külǘ no pitive keu toivae.

³ Panongu ye timi no külakupu shini keu lakha cheni eno achuqu hami khikhi küpülümi eno kuchou ithi akemiqo pelo shikimthi tsü ghi peitha peniye Alhou no lhosü keno tipaqo chupemo niye panongu lau azah tsü cheni.

⁴ Kughengu Alhou no lhosü keu kümtsü akivi ke, eno shikimthi tsü ghi peitha aye kiumu milive kepu kühae,

⁵ kughengu tiye Alhou tsa eno akighini vechewo kishekimthevea ke.

⁶ Nono athiküzümi eno achelimiqo lau thime hipaqo kiche tsülu aye, no ye Khristo Jisü qeu kivi lakhi shi nani. Eno nono aküpülü kuchou tsaqo eno akükütsü kivi pape chekeu hu no O lojiputhulu nani.

⁷ Alhou sümsamo keu küghakiche tsa eno topu-toghu tsaqo lo amlo tsü kevilo; tishini ke züqhu Alhou lau amlo tsü nikeu lo O likhi O qophe alo.

⁸ Kughengu aphimpi qokiphe lo ameküa hami acheni ikemu Alhou lau amlo tsü keu lo thime kümtsü ghenguno ameküapu anie. Kughengu tishi keu hu no itehi xü akeu ngò ighi niye akeu küxü küma ghenguno pikiqhi pesü anike.

⁹ Pükhübekulu küghakiche tsa hipau ye kümtsü no ikhilu küzüpu ke.

¹⁰ Tighenguno ningu ye mülà acheni eno pükapütsa acheni, kughengu ningu ye xü akeu Lhou shou ninguw lajupu qhivea ke. Pa ye timi kümtsüw Xakuluu ke, eno akhotoshi pülü chekemiqow Xakuluu ke.

¹¹ Azakütsü shilo eno thime hipaqo shikalo.

¹² Timi khuu pelomu no ye lhothemi kepi O jukünatha pe kevilo, ikemu atsapi lo, süqeghili lo, kikimiye lo, aküpülü lo eno akimthe küxü lo küpülümiqo ghenguno kiche-kipiye qhitsülo.

¹³ I no ighimo ke kutólo no ye timi mìshí lau Kuchoyesü phisü aní keu, shikumto eno shika aní keu lo amlotsüqhiyi lo.

¹⁴ Kughou kichimiqo no panongu u pesü O shou be keno tile no tungkuptsa vechewo aghungu ghò O tsü keu hu kughucho kevilo.

¹⁵ Thime hipaqo vehu lo azükini shilo; eno hipaqo vehu lo O küxü kümtsü tsülo, tishianguno timi kümtsü ow thukuwu ithulu pelo.

¹⁶ Tsaqütsalei O küxü eno akǜlü jukuto alo. Tipaqo phekevi no pükapütsalo, kughengu nono tishiaye no ye O likhi no eno O tsa chikulumi kinikujo xakulupu shi nani ke.