1 Tim. 3 - Sümi Tiqhelimi Bible

Akukuho lo Juküsüu eno Aghinimi Shiküzüpu Kukhuaye

¹ Timi khukhumu akukuho lo sakiphemi shinishiqhiyi aye pa ye ashekha aghilepu kümlà lo pa mlo belu anie, ipikeu tsa hiye kuchou ke.

² Akukuho lo sakiphemi lakhi ye akipimí küha kemi shi moayesa, pa nipu lau amikucho shi moayesa, aghibiu shi moayesa, alikhi aghasülu kemi, gihu küzüpumi, inami sasükinimi, shikathi kemi shi moayesa,

³ shomzü kepu kumo, ngukangugha shimo no iqüighai moayesa, kiyi-muto kepu kumo, eno pisa kiminemi shikepu kumoe.

⁴ Pa ye akivishi pa likhi pa kibo tucholu kemi shi moayesa eno pa nuliqo ye pa gholu aghí moayesa, eno pa ye pa nuliqo no akiqheu shi gihu nikeu ghola lono xü moayesa.

⁵ Khiuala no pa likhi pa kibo tucho mtha aye, pa ye kíshi no Alhou’w Akukuhou tucho luni kea?

⁶ Pa ye anileshi Khristo chineye lukemi shi aghí kepu kumoe, tishimo aye pa ye aqheküza shive no tüghami paphi shi küghaküthapu lo ilove nosake.

⁷ Pa ye akukuhomi kumo kemiqo gholo ghí aju-aje kivimi lakhi shi aghí moayesa, tishianguno pa pelo aju-aje küsapu lo ikiqive no tüghami lichhe lo ilove pemo niye ke.

⁸ Tipau tho lono akukuho lo aghinimiqo ghí gihukulupu eno amikucho timi shi aghí moayesae, aji shomzümoni eno amikucho kumo lono alá shini keu phu kemi shimoni.

⁹ Panongu ye alolo kighithi mütsümishei shi no aküpülü thonhei keu kuchou hu tsüqüpe moayesae.

¹⁰ Atüghishi panongu peju moayesae; eno tithiu no panongu lau akipimí tsü kepu kiumu küha aye panongu pelo aghinimi kümlà shilu pe kepue.

¹¹ Tipau tho lono totimiqo ghí gihu küzüpu shi moayesa, timi xishi kepu kumo ikemu aghibiu shi no thowkha lo pükhübekulu shi moayesa.

¹² Akukuho lo aghinimi lakhi ye pa nipu lau amikucho shi moayesa eno akivishi pa nuli eno pa kibolomiqo tucho ithi kemi shi moayesae.

¹³ Khunoqo no akivishi mülà keno panongu ye kümtsü nguno akighichéu shi alá shivae eno Khristo Jisü gholo panongu küpülü akeu lo pülüqhiyi keu kijè ithuluvae.

Paul’w Shikakütsü Kimjiqo

¹⁴ Ni ye nongu lau pai ighi niye laju ani kemu I no nongu lau shikakütsü hipaqo yè akeu ye

¹⁵ I no munuve aye nongu pelo timi ye kíshi Alhou ki lo panongu likhi panongu süqeghili pephe-piye moayesa keno ithi peniye ke. Kughengu Alhou ki ye xü akeu Lhou kukuhou, atsükucho eno kuchou boqha ke.

¹⁶ Mütsüqhei no Alhou’w tuqhou khipau vechewo ningu küpülü qò ipeghi cheni keno tiye hike: Khristo ye timi shì shi no ighi, Aghungu no pa saphu, kungumiqo no pa ithulu, shiyeqo gholo pa shepe shi, ayeghiqha no pa pülü wove, ajuküvü lono saikuve.