1 Tim. 2 - Sümi Tiqhelimi Bible

Akümlà vehu lo Shikakütsü

¹ Tishiaye I no atüghishi nongu qhüiniju akeu ye timi kümtsü ghenguno inikhu tsülo. Panongu kümtsü züqhu shi alakipikütsü eno shikimthikütsü tsülo.

² Tihutoi kükami eno kükagha lo akemi kümtsü ghenguno inikhu tsülo, tishianguno ningu pelo Alhou ithi keu eno akimthe lono iqünhei eno aloino ghi xülu penike.

³ Hiye aloke eno ni Xakulu Lhou pulou ke.

⁴ Alhou ye kümtsü pelo xaluve penishi ke eno kuchou ithiluve keu lo ighive penishi ke.

⁵ Kughengu Alhou lakhi likhi ani eno Alhou ngò timi dolo alakipiu lakhi ani, tiye Khristo Jisü timi hu ke.

⁶ Khristo Jisü ye timi kümtsü ghenguno xakipheu lakhi kimhi shi pa likhi pa ikhiphe pe tsüve ke. Hiye ado achipi lono thopi shivae.

⁷ Ni ye Jewkumomiqo lau kuchou eno pükhübekulu kütsü pe nikeu kimiji ghenguno kütüghükütsüu eno apostol lakhi shi süküsü shike—ni ye kuchou tsa pi anike thono mikí amoe—eno ni ye Jewkumomiqow kuchou eno pükhübekulu kükütsüu lakhi ke.

⁸ Tighenguno a-a kümtsü lo kipitimiqo pelo amloidemo momu kütsalamo no akimthe u peqhe no inikhu penishi ani.

⁹ Ni ye totimiqo pelo no ghí tiphimini kithikiyi, jukivi eno achipi shi pepu penishi. Panongu pelo ajeli shi asà pilipu, ameshoyi momu achiku momu amekusho tiphimini pepu keu vechewo no kumo,

¹⁰ ikemu akümlà kivi hu no ananu shipe nishi ani, kughengu hino Alhou mülá niye shuphe chekemi totimiqo ghenguno achipi ke.

¹¹ Totimi lakhi ye inaqhoi shi eno thowkha lo aqhokighe shi no ithiküpha kepue.

¹² Ni ye totimi lakhi pelo kütsü pe keu momu kipitimi lakhi shou kükagha peitha keu shipe nishimoe; li ye inaqhoi ngo moayesae.

¹³ Kughengu Adam paghi lhophe ke, eno tipau thiu no Eve lhophe ke.

¹⁴ Eno Adam pishiqhive ke kumoe; totimi hu pishiqhive ke eno axinemi lakhi shive ke.

¹⁵ Ikemu totimiqo no aküpülü, kikimiye eno akimthe gholo achipi küxü xü aye panongu ye angá punú keu vechewo xalu nani.