1 Tim. 1 - Sümi Tiqhelimi Bible

¹ Paul, ninguw xakulu Lhou eno ninguw lajupu Khristo Jisü zakütsü vechewo Khristo Jisü’w apostol lakhi no,

² Timothy khuu aküpülü lono I nu kuchou keno pa lau yèlu ani: Apù Alhou eno ningu Mpeu Khristo Jisü lau no küpükini, kimiyekini eno aloino keu nongu tsü ani.

Timothy pelo Kichileu Kükütsümiqo Mjochile nike Pichetsü keu

³ Kughou I no Macedonia lo wu keno I no O vilo qhüiniju ketoi tilau Ephesus lo ngo lo, tishianguno O pelo timi hami vilo kichileu külüqo shika pemove pe nikeu azakütsü tsüpe niye ke

⁴ eno panongu pelo küghakiche tsa eno ashekha küha keu alagha kughukoqo lo amlo tsü pemove peniye ke. Thime hitoi keqo ye aküpülü vechewo Alhou kümlà azüu hawo nikeu kumo no kütsalakulupu kümsükujuqo shikumto cheni.

⁵ Azakütsü hipau kimiji ye kikimiye ke, kikimiye hipau ye akimthe mlo, alolo kighithi kivi eno amikucho küpülü vechewo ighi cheni.

⁶ Khami ye thime hipaqo lau no wuve no akiqi küha keu tsa küghakile keu lo idewove cheni.

⁷ Panongu ye ayeza lo shikükamiqo shinishi ke, ikemu panongu ye kiu piani momu akumto shi kiu pülü cheni keno mthae.

⁸ Ningu no ithi akeu no timi lakhi no ayeza achipi shi peitha aye ayeza ye aloe.

⁹ Ningu no itaghi ithi akeu no ayeza ye achipimiqo ghenguno mülà püamoe ikemu hipaqo ghenguno mülà püani: ayeza hekibidemi eno lakichilemiqo, alhou sümsamo kemi eno axinemi, akimthe kumomi eno alhou pülümo kemi, apù eno azá noqo pìthí chekemiqo, hekiqhimiqo,

¹⁰ kipito mikuchokumomi, kipitimi no kipitimi dolo eno totimi no totimi dolo asalha kümlà shi chekemiqo, aqüaxemi pesü lhidi shi chekemiqo, akimkimiqo eno akimki shoqhi shi chekemiqo, eno tipau gholo kiu-kiumu kuchou külü nguno bidelau akeqo ghenguno ke.

¹¹ Kuchou külü ye kükümgha Lhou juküvü vehu tsakiviu gholo pulolu chekeu ke. Eno tipau ye Alhou no I pichetsü keu kümlà ke.

Paul lau Ampeu’w Küpükini

¹² I no ningu Mpeu Khristo Jisü shikimthi ani, pa no akumto I tsüke, pa no pükhübekulu shi ni ikhilu tsü no pa kümlà lo ni süküsü shitsü ke.

¹³ Ghuthu lakhi lo ni ye achine pipütha chekemi lakhi, Khristomi pishi-puju chekemi lakhi eno ngukangughami lakhi shi aghí namu, I lau kimiyekini pìye ke kughengu ni ye mtha keu eno pülü müla keu lono mülà itha cheke.

¹⁴ Khristo Jisü gholo aküpülü eno kikimiye akeu gholo no ningu Mpeu’w küpükini I lau kupukuno shi lepuku tsüke.

¹⁵ Hiye kümtsü no ikhilu küzüpu eno pülü kepu tsa pikeu lakhi ke: Khristo Jisü ye axinemiqo xalu nike ghenguno ayeghi lo ighike—eno ni ye axinemi kümtsü nguno alhoküsau ke.

¹⁶ Ikemu hi ghenguno I lau kimiyekini pìye ke, tishi keu vechewo I no kiche-kipiye lakhi shi no Khristo Jisü pelo axinemiqo kümtsü nguno alhoküsau lau paw kutuukulu ighono kijè pephe-piye niye ke. Tisheno kütami ghí pa shou pülü no lhokta küxü ithulu nani.

¹⁷ Lhokta Kükau, thive chemo keu, ithulu chemo keu, pa likhi no Alhou ke, pa lau alhokupuju lono alhokupuju kutólo agigihu eno ajuküvü ache pelo! Amen.

Timothy Piche Kithe tsü keu

^18-19 I nu Timothy, ghuthu lakhi O lau tungkuptsaqo kütüghü keu kiqi lono I no azakütsü hipau O tsü ani. Tishianguno O pelo tipaqo kümsüchilelu no aküpülü eno alolo kükümsü kivi tsüqülu püzü akivishi aghüshilu peniye ke. Timi khami ye hipaqo milive no aküpülü vehu lo zükilu kütsave keu toi imeve ke.

²⁰ Timi tipaqo gholo Hymenaeus eno Alexander pama ghí lakhi ke. Alhou thaigha pemo nikeu ithi peniye I no pama pesü Satan u lo phesüve tsüae.