1 Thes. 5 - Sümi Tiqhelimi Bible

Ampeu Tsalà

¹ Athiküzümi eno achelimiqo, ado eno aghuloki vehu lo ningu ye nongu lau yè akepu kühae,

² kughengu nongu no akivishi ithi anike Ampeu tsalà ye putho lo küpkami lakhi toi ighi nanie.

³ Timiqo no, “Külakishi eno sükusho,” ipi aphi lono kütsakungo keu no apunu küsǜ no mishí akeu totimi shikighime ketoi zülile no panongu shou ikughi nani, eno panongu ye pokajo mülave nani.

⁴ Ikemu athiküzümi eno achelimiqo, nongu ye hipau vehu mtha no anike kumoe, ikehu Ampeu tsalá ighi kelo küpkami lakhi toi nongu kichiqhi pe kepu kumoe.

⁵ Nongu kümtsü aküvü nuliqo eno puchou nuliqo ke. Ningu ye putho momu àküzǘ laumi kumo ke.

⁶ Ike tishiaye, ningu ye kütami toi zü akepu kumoe, ikemu ningu tsükhutsüvai eno alokütsü shini nolo.

⁷ Kughengu khunoqo no zü cheni keno putho lono zü acheni, eno khunoqo no shomzü cheni keno putho lono shomzü acheni.

⁸ Ikemu ningu ye aküvü lo akemi timiqo ke ghenguno ningu ye alokütsü shini nolo. Aküpülü eno kikimiye pesü amla küküzüpu toi pepulo, eno xakuluw lajupu no ayikütsüqho toi pepulo.

⁹ Kughengu Alhou ye ningu pelo pa loghukighide ithulu peniye kishelumoe ikemu ningu Mpeu Jisü Khristo vechewo ningu pelo xakulu ithulu peniye ke.

¹⁰ Pa no ningu ghenguno thive ke, tishianguno ningu no ithu aghina zü aghí namu ningu pelo pa gholo xüpe niye ke.

¹¹ Tighenguno nongu no kuchou no shi akeu toi, lakhi no lakhi shikumto eno lakhi no lakhi xaqhe lo.

Ashekhau Shikakütsü

¹² Athiküzümi eno achelimiqo, ningu no nongu qhüiniju akeu ye, nongu dolo khunoqo no ighono ime mülà acheni, khunoqo no Ampeu je lono nongu tucho acheni eno khunoqo no nongu shika tsü acheni keno panoqo qhoqhü lo.

¹³ Panongu kümlà ghenguno kikimiye lono qhoqhü ghi akiqheu-a lo panongu qhilo. Külakishi lono lakhi no lakhi sasü xülo.

¹⁴ Athiküzümi eno achelimiqo, ningu no nongu qhüiniju ani, khunoqo no akipichi eno aküpüna shi acheni keno panongu pikichi lo, aghüthisüve kemi shikumtolo, qeinai kemi kuphulo, eno kümtsü lau kheakulu shilo.

¹⁵ Khumu alhoküsa pesü alhoküsa lochile pemo nike jukuto lo, eno alhokuthu lo kiu no kütami eno kümtsü kivipu keno tipau shini keu pükapütsalo.

¹⁶ Pülhapuju alovishe alo,

¹⁷ tamo no inikhulo,

¹⁸ atüqhüdo kümtsü lo shikimthi tsülo; kughengu Khristo Jisü’w shive kemi ghengu ye hino Alhou pulou ke.

¹⁹ Aghungu Kimthe ghapinhe kevilo.

²⁰ Tungkuptsaqo thaigha kevilo

²¹ ikemu tipaqo kümtsü peju lo; kiu no akivi keno tipau shichelo,

²² küsakügha jeli kümtsü milive lo.

²³ Alokughuno tsü chekeu Lhou ampi no thowkha kümtsü lo akivishi nongu shikimthe tsü peniu. Ningu Mpeu Jisü Khristo ighi kelo nongu ghungu, angulho eno aphimpi kümtsü tukutiye küha no kupukülai shi qhilu peniu.

²⁴ Khuu nongu kulù keno pa ye pükhübekuluu ke eno pa no tipau shitsü nani.

²⁵ Athiküzümi eno achelimiqo, ningu ghenguno inikhu tsü alo.

²⁶ Khristo vechewo timi kümtsü sasü petha shilo.

²⁷ I no Ampeu je lono athiküzümi eno achelimiqo kümtsü lau yèsü hipau phisü penike O pichetsü ani.

²⁸ Ningu Mpeu Jisü Khristo’w küpükini no nongu gholo apeniu.