1 Thes. 4 - Sümi Tiqhelimi Bible

Alhou Pulou shi Xü nikeu

¹ Athiküzümi eno achelimiqo, kütau vehuqo shélo ye kíshi Alhou pulou lono xüni keno ningu no nongu shikavae. Kuchou lo nongu ye tishi xüani. Itehi ningu no Ampeu Jisü vechewo nongu qhüiniju akeu ye itaghi hitoi alau shi xüa penike nongu kite ani.

² Kughengu Ampeu Jisü kükagha vechewo ningu no shikakütsü kiu nongu tsü keno nongu no ithi anie.

³ Alhou pulou ye nongu pelo shikimtheluve pe moayesa keu ke: nongu ye kipito xüküpsa lau no putosü moayesa;

⁴ nongu kümtsü no akimthe eno gihukulupu ghola lono nongu likhi nongu phimpi ghasüni keu shikalu moayesa.

⁵ Jewkumomi khunoqo Alhou mtha keno panongu toi ashi-aji pulou shikepu kumoe.

⁶ Eno hipau vehu lo khumu athiküzümi momu achelimi lakhi shou alhoküsa shikepu kumo momu alikhi alá ghenguno adokivi lu kepu kumoe. Ningu no azüu no nongu vilo pive eno pikichive keu toi, hitoi keu xiné shikemi kümtsü Ampeu no ghimeqhi nani.

⁷ Kughengu Alhou no ningu kulù keu ye ningu pelo mithekumo lo xüpe niye ke kumoe, ikemu akimthe shi xüpe niye ke.

⁸ Tighenguno, khukhumu hipau shikakütsü milive keu ye timi milive anike kumoe ikemu Alhou khuu no pa Ghungu Kimthe pesü nongu tsü keno pa milive anie.

⁹ Itehi nongu vilo lakhi no lakhi kimiye nikeu vehu lo ningu ye nongu lau yè akepu kiumu kühavae, kughengu nongu lakhi no lakhi kimiye nikeu vehu ye Alhou ampi no nongu kütsüvae.

¹⁰ Eno kuchou lo, nongu ye Macedonia qha kuchopu lo Alhou timi kümtsü kimiye acheni ke. Tishiaghi namu, athiküzümi eno achelimiqo, nongu pelo itaghi alau tishi apenike ningu no nongu hakite ani,

¹¹ eno iqünhei keu küxü xü nikeu no nongu kimiji shilo: ningu no nongu vilo pike toi nongu ye nongu likhi nongu kümlapù lo amlotsüqhiyi amasa eno nongu u no mülà amasa ke,

¹² tishi keu lono nongu küxü lhoaye vechewo Alhou pülü chemo kemiqo pelo nongu gihu peniye ke eno nongu pelo khuu shoumu pükhü pemo niye ke.

Küpülümi Thive Kemiqo

¹³ Athiküzümi eno achelimiqo, ningu ye nongu pelo kithimi ye kíshivea kela ipi avehuizü penishi amoe. Tishianguno nongu pelo lajupu küha kemiqo toi amlokighishi shi apemo niye ke.

¹⁴ Kughengu ningu no Jisü ye thive eno xülethuve kepi pülü cheni, ikehu ningu no pülü chekeu ye khunoqo Jisü pülü che no thive keno Alhou no Jisü akiniù ideighi kelo pa gholo no tipaqo xüputhu nani.

¹⁵ Ampeu tsa kiqi lono ningu no nongu vilo piakeu ye ningu khunoqo Ampeu tsalá ighimo ke kutólo xü aghíni keno, ningu ye kithimi züu no Ampeu sasü kusholumo nanie.

¹⁶ Kughengu Ampeu ampi no ighamuku azah tsü ghi, kungumi atou sütsa eno Alhou ku akeu fuko küigha ghi kungugha lono ikighi nani eno Khristo pülü che no thive kemi paghi xüputhu nani.

¹⁷ Tipathiu no ningu thimo no xü aghí kemiqo ghí amlhü lono Ampeu sasü kusho nike panongu gholo no khüngküsü lo ikuve nani. Eno ningu ye Ampeu gholo alhokupuju acheuve nani.

¹⁸ Tighenguno atsa hipaqo pesü nongu lakhi no lakhi shikumto alo.