1 Thes. 3 - Sümi Tiqhelimi Bible

¹ Ike kughou ningu no nongu kümsükütü auve keno, ningu ye Athens lo ngove keumu pavi ipi kümsüve.

² Eno nongu küpülü shikumto no akumto shilu penike ghenguno ningu no Khristo tsakiviu pikülha keu vechewo Alhou kümlà shi akeu lo kümtsa mülà küqha akeu eno ningu thiküzüu Timothy nongu lau puwuve ke,

³ tishianguno khuu pelo nomu pekuju hipaqo vechewo avehuizü pemo niye ke. Kughengu nongu no akivishi ithi akeu toi ningu pelo hipaqo sholu penike azüu no kughuchho pe qhivetsü ake.

⁴ Kuchou lo ye kughou ningu no nongu gholo akeno, ningu ye pishi-puju nani kepi tamo no nongu vilo pi acheke. Eno nongu no akivishi ithi ake toi, titoi shivae.

⁵ Hi ghenguno, kughou I no kutuu khamlave keno nongu küpülü chheju peniye I no Timothy nongu lau puwu ke. Ghukujuu no alaghi hami lono nongu ghujuqhive no ningu no ichhe-ime mülàpüa keu adou shive aghí nosa kehu ni ye msàve ke.

Timothy’w Shikumtokütsü Kipithi

⁶ Ikemu Timothy ye itehi no anileshi ningu lau ighi ani eno nongu küpülü eno kikimiye vehu lo asütsa kivi pesü ighi anie. Pa no ningu vilo pikeu no nongu ye alhokuthu lono ningu kümsüpivi acheni eno ningu no nongu sasü kusholu nishi akeu toi nongu ghí ningu sasü kusholu nishi ani ipi ke.

⁷ Tighenguno athiküzümi eno achelimiqo, ningu no aghime kitikhi eno pishi-puju sholu ke kümtsü lo nongu küpülü vechewo ningu shikumtolu acheni.

⁸ Eno nongu no ithamo no Ampeu gholo akumto shi puthugho akeu ghenguno ningu ye kuchou no xü anie.

⁹ Ningu ye nongu ghenguno ningu Lhou zülo alokiqi akeu theli lo kíshi nongu ghenguno lukümkha shi Alhou shikimthini kea?

¹⁰ Nongu sasü kusholu kithe no nongu küpülü lo tomo no akeu shepichhilu penike ghenguno ningu ye putho-pucho shishe pulopiniyi shi inikhu acheni.

¹¹ Itehi ye ningu pelo nongu lau ighilu penike ningu Papù Alhou ampiu eno ni Mpeu Jisü pelo alaghi khaqhi tsü peniu.

¹² Ningu no nongu kimiye keu toi, Ampeu no nongu pelo lakhi no lakhi kimiyelu eno timi kümtsü kimiye keu lo alau thuwulu eno qochili apeniu.

¹³ Pa pelo nongu mlo shikumto tsü peniu, tishianguno Ampeu Jisü no paw akimthemiqo kümtsü sasü ighi kelo ningu Papù eno Alhou zülo tukutiye küha no akimthe shi ighilu peniye ke.