1 Thes. 2 - Sümi Tiqhelimi Bible

Thessalonica lo Paul Pichebekümlà

¹ Athiküzümi eno achelimiqo, ningu no nongu xuju keu ye adou shimo kepi nongu no ithi ani.

² Nongu no ithi akeu toi ningu ye püzüu Philippi lo imeve eno ighono ningu peithapüsa ke, ikemu ningu Lhou kukuphu vechewo ghokichile kumto sholu anamu nongu vilo Alhou tsakiviu pini keu lo amlo kumto shilu ke.

³ Kughengu ningu no kütsü chekeu ye shikipimi momu mithekumo kimiji lono kumo ke, momu ningu ye nongu pishiqhi niye pükapütsa anike kumoe.

⁴ Ikemu, ningu ye Alhou no pulove tsü no atsakiviu pesü pichetsü kemi toi pi acheni. Ningu ye timi pulou shi niye ke kumoe, ikemu Alhou khuu no ningu mlo peju acheni keno pa pulou shini ke pükapütsa anie.

⁵ Nongu no ithi akeu toi ningu ye khilemu timi müqüqhi chemo, tilikhi kumo no ningu ye ni lakimine ghenguno müqümgha shichemoe. Tiye Alhou no ninguw thopi ke.

⁶ Ningu ye Khristo’w apostolmi ke ghenguno nongu lau no kiu avehupu shi ani keno khulu kepu kükagha anie, ikemu ningu ye timi lau no momu nongu lau ke kumo no khuu lau nomu akishé lu niye phu amoe.

⁷ Tishini ke züqhulo ningu ye nongu gholo itimiqo toi shike. Angá kughunu pìní akeu azá lakhi no li ngá tucho-mjo akeu toi,

⁸ ningu ye nongu tucho-mjo acheni. Kughengu ningu ye ighono nongu kimiye cheni kehu, ningu ye Alhou tsakiviu likhi kumo no ningu küxü ghí nongu gholo küsaje nike alokiqi shike.

⁹ Athiküzümi eno achelimiqo, ningu no ghichhe-ghime shi mülà keu nongu ye mütsümishei ithi anie; ningu ye Alhou tsakiviu pesü nongu lau pikülha ake ghuloki lo khiumu pünanishimo keu ghenguno ningu ye putho-pucho mülà acheke.

¹⁰ Ningu ye kíshi akimthe shi, amikucho shi eno tukutiye küha no nongu pülüluve kemiqo gholo ache keno nongu ye tipauw thopimiqo ke, eno Alhou ghí tipauw thopi ke.

¹¹ Kughengu nongu no ithi akeu toi, apù lakhi no pa nuliqo tucho akeshi ningu ye nongu lakhi-khi tucho püani ke.

¹² Ningu ye nongu shikumto tsü, lokughuno tsü eno Alhou khuu no pa kükaphu eno ajuküvü lo nongu kulù keno pa pulou küxü xülo pi nongu kite acheke.

¹³ Eno ningu ye alhokuthu lono Alhou shikimthi acheni, kughengu kughou nongu no Alhou tsa khikhi ningu lau no chilu eno ikhilu keno, nongu ye timi tsa lakhi paphi shi ikhilumoe, ikemu Alhou tsa lakhi toi kuchou shi ikhilu ke, eno Alhou tsa ye nongu khunoqo no pülüluvea keno tipaqo gholo kuchou no müla anie.

¹⁴ Kughengu athiküzümi eno achelimiqo, nongu ye Judea lo Khristo Jisü vechewo Alhou kukuhou akeqo kishishi shiluvea ke: Judea lo akukuhouqo no Jewmiqo lau no aghime sholu keu hutoi nongu ghí nolikhi nonguw timiqo lau no aghime sholu ke.

¹⁵ Jewmiqo no Ampeu Jisü ngò tungkupumiqo pìthíve ke eno tisheno ningu ghí hapheve ke. Panongu ye Alhou loshipüsü cheni eno timi kümtsü ghümi shi cheni.

¹⁶ Jewmiqo ye ningu no Jewkumomiqo vilo atsakiviu pikülha no xakulupu shini keu lo ningu lakha acheni. Hitoi keu ghola lono panongu ye alhokuthu akumou lono panongu xiné pekütsü acheni ke. Ikemu ashekha lo Alhou loghu no panongu shou ikughivae.

Paul no Thessaloniamiqo sasü Kusholu nishi keu

¹⁷ Ikemu athiküzümi eno achelimiqo, kughou ado ikhonhei ghenguno nongu lau no kütüta shive keu (akükümsü lono kumo püzü aphimpi lono) vechewo ningu likhive keno ningu ye nongu sasü kusho nishiqhiyi kelau no alaghi jeli kümtsü lono pükapütsaju ke.

¹⁸ Kughengu ningu ye nongu lau ighi nishiqhiyi anike. Ni Paul ye kuchou no ighi niye anguno-anguno pükapütsa ke ikemu Satan no ningu laghi lakhavetsü ke.

¹⁹ Kughou ningu Mpeu Jisü no ighini keno pa gizülo nongu jekipipu shini keu ghenguno ninguw lajupu, ningu lokiqi, momu ningu kütsükuqho ye kiu kea? Tiye nongu ke kumo keshea?

²⁰ Kuchou no nongu ye ningu jekipipu eno ningu lokiqipu ke.