1 Peter 5 - Sümi Tiqhelimi Bible

Kichimiqo eno Alojimiqo Lau

¹ Nongu gholo kichimiqo lau, I no nongu dolo kichimi lakhi shi eno Khristo ghimeqow thopimi khuu ajuküvü pephe-piye niye shi akeu lo ghí küsaje niye ani keno nongu lau qhüiniju ani:

² Alhou’w ambe loji nonguw tucho-mjokütsü qholo akeqo hu akivishi khekuto kepu shilo, panongu shou jukuto alo—tsükhomo shilo pikeu ghenguno kumoe, ikemu Alhou no nongu pelo shipe nishi akeu lo puloniqhiyi tipau shilo. Ajume ithulu keu ghengu likhi no kumoe ikemu amlo lono qe nikeu puloniqhiyi pù püzü shilo.

³ Nongu pelo tucho-heju peniye pichebetsü kemiqo shou ampeu shi kevilo, ikemu Alhou’w ambe lojiqo zülo xüpiye kemi shilo.

⁴ Eno kughou Ambe khemi shou Atou no ipeghini keno, nongu ye khilemu ighüyive chemo keu juküvü kütsükuqho ithulu nani.

⁵ Tipau tho lono, nongu khunoqo no alhothe shi ani keno, nonguw kichimiqo lau aghokulu shilo. Nongu kümtsü lakhi no lakhi lau aqhokigheu shilo, kughengu, “Alhou ye aqheküzami lachile cheni ikemu aqhokighemi kümgha tsü cheni.”

⁶ Tighenguno, nongu ye Alhou kumto u qholo nolikhi nongu pesü akuchunumi shilo, tishianguno pa no pa dokivi lono nongu sünheqhe nani ke.

⁷ Nongu mloghime kümtsü pesü pa lau qhive tsülo kughengu pa no nongu tucho-mjo acheni ke.

⁸ Kutokughoi lo eno tsükhüi shi alo. Nongu ghümi tüghami ye abongushuu lakhi toi khukhumu tsüqhichuve niye mqüijoi shi no igha iqho-iqi ju acheni ke.

⁹ Pa mjochile lo, aküpülü lo ithamo no puthugho lo, kughengu ayeghiqha kuchopu lo athiküzümi eno achelimi küpülümi kümtsü no hitoi keu ghimeqo puju-shiju ani kepi nongu no ithi anike.

¹⁰ Eno küpükini Lhou khuu no nongu pelo ado kitila imeve kethiu Khristo lono lhokta juküvü küsaje peniye kulù keno, pa no nongu athoputho tsü no nongu pelo akumto shi ithamo no mutotoi ngolu pe nani.

¹¹ Alhokupuju lono alhokupuju kutólo aküka ye paw shi ache peniu. Amen.

Ashekha Petha

¹² Silas, khuu I no pichebekulu athiküzüu lakhi toi ikhilu acheni keno, pa kukuphu vechewo ni ye nongu lau ikhonhei keu lono nongu shikumto ani eno hiye Alhou’w kuchou küpükini kepi thopiu shi ghi yèsü yèvae. Tipau lo mutotoi puthugho lo.

¹³ Li khuu Babylon lo ani keno, nongu gholo no kümtsa kishelu keu, li no petha nongu tsü ani, eno I nu Mark ghí petha tsü ani.

¹⁴ Kikimiye kümüma vechewo lakhi no lakhi sasü petha shilo. Khristo lono kümtsü lau aloino keu alo.