1 Peter 4 - Sümi Tiqhelimi Bible

Alhou Ghenguno Xü Akeu

¹ Tighenguno, Khristo ye pa phimpi lo imeve ake ghenguno, nongu ghí titoi keu kükümsü athoshi pulo, kughengu khukhumu aphimpi lono ime keu ye axiné shichemoe.

² Hi ghenguno, panongu ye ayeghi lo xü ake thaqhülo ye timiw shinishiqhiyi keu küsakügha küxü lo xü chemoe, ikemu tishini ke züqhu Alhou pulou ghenguno xü acheni.

³ Kughengu nongu ye wove keu lo Jewkumomiqo no shi chekeu lo aghakiqi shi ado kutomo puwovae—tiye ghüpoghüzü küxü, ghaghu, shokümzü, ghaghu-ghale ghulhu, itho-igho keu lono eno kuchubekütsüla julho mülá keu lono ke.

⁴ Panongu ye nongu no panonguw inapügha eno xükümtha küxü lo kulojimo keu lo akichiqhive no panongu no nongu shou alòmi pipuku ke.

⁵ Ikemu panongu ye khuu no küxümi eno kithimi shou küghathabe nike kutò pe ani keno pa lau kihikülai tsü moayesa nani.

⁶ Hi ghenguno atsakiviu ye itehi thive no akemiqo lau ghí kütsü ke, tishianguno panongu ye aphimpi küxü lo ye kütami lau toi küghaküthapu pesü panongu shou beve kemu, aghungu küxü lo ye panongu pelo Alhou pulou kiqi lono xülu peniye ke.

⁷ Thime kümtsü ashehove nikeu ye kupunúvae. Tighenguno kutokughoi lo eno tsükhütsüvai keu kükümsü xapu ngo lo tishianguno nongu ye akighini shilu peniye ke.

⁸ Kümtsü nguno alau, amlotsüqhiyi shi lakhi no lakhi kimiye lo, kughengu kikimiye no axiné kutomo nhavetsü cheni ke.

⁹ Nhenheshimo no lakhi no lakhi sasü kilé lo.

¹⁰ Milakhi-khi no Alhou no küpükini ghò jeli kiu-kiu tsüpüa ghí namu jukükütsümi shi püzü Alhou lau no kiu ghò ithulu keno tipau pesü kütamiqo qe nikeu ghenguno peitha moayesae.

¹¹ Tsalá khuala no kütsü cheghi aye, panongu ye Alhou tsa piche kemi toi shi moayesae. Tsalá khuala no hukuthu kümlà shi cheghi aye, panongu ye Alhou no akumto panongu tsü keu pesü huthu moayesae, tishi keu vechewo thime kümtsü lo Jisü Khristo vechewo Alhou sheqhe peniye ke. Alhokupuju lono alhokupuju kutólo ajuküvü eno aküka ye paw ke. Amen.

Khristomi shi akeu Ghenguno Ime keu

¹² Kimiye chekemi shompamiqo, nongu peju niye shiluküsa ghime nongu shou ikughi keu lo kiuala müza keu nongu lau shi ani küghashi akichiqhi kevilo.

¹³ Ikemu nongu no Khristo ghime lo küsaje akeu qhemi alovishelo, tishianguno kughou pa juküvü pephe-piye nike no nongu pelo shishe alovishelu peniye ke.

¹⁴ Tsalá Khristo je ghenguno nongu shikukujo aye, nongu ye müghae, kughengu ajuküvü Ghungu eno Alhou Ghungu no nongu shou anie.

¹⁵ Tsalá nongu no ime aye, tiye hekiqhimi momu küpkami momu ayeza heküxami toi keu, momu kütami pünaqhi chekemi no ime chekeu toi kepu kumoe.

¹⁶ Ikemu, tsalá nongu Khristomi lakhi shi no ime aye, kujo akevilo, ikemu nongu no aje tipau xapu akeu lo Alhou sheqhelo.

¹⁷ Kughengu hiye Alhou kibolomi dolo no küghakütha huthu nikeu do tovae; eno tsalá ningu lau no huthu aye, khunoqo no Alhou tsakiviu gholu chemo keno panongu ghengu ye kiu shive nani kea?

¹⁸ Eno, “Tsalá amikuchomi ghenguno xalu nikeu kushokütsü shi aghí aye alhou kümthami eno axinemi ghengu ye kiu shive nani kea?”

¹⁹ Ike tishiaye, khunoqo no Alhou pulou kiqi lono ime ani keno panongu ye panonguw pükhübekulu Pulhoküsüu lau pano likhi panongu ikhiphe pesü tsüve no akivi kümlà mülakibe moayesa nani.