1 Peter 3 - Sümi Tiqhelimi Bible

¹ Anipuqo, tipau tho lono nongu likhi nongu ikhiphe pesü nongu kimiqo lau tsülo tishi keu vechewo tsalá panongu khuala no Alhou tsa shou pülümo aye, atsa pimo no panongu nipuqo ghiliaye vechewo züluve peniye ke,

² tiye panongu no nongu kimthe eno Alhou sümsaqhiyi keu küxü ithuluve nani.

³ Nongu jukivi ye khalau tünatunu lono pìye kepu kumoe, tiye hitoi keu; paküta keu shi asà ghokünapu keu eno ameshoyi chiku pukeu momu amekusho phimini pepu keu.

⁴ Tishini ke züqhu nongu jukivi ye nongu lolo, idive chemo keu iqüighai keu ngò iqünhei keu ngulho, khikhi Alhou zülo ighono amekusho keno, tipau no nongu jukivi shi moayesa ke.

⁵ Kughengu khaghi akimthemi totimi khunoqo no Alhou shou panonguw lajupu qhiche keno panongu ye hipau ghola lono pano likhi panongu nanu shiche ke. Panongu ye pano likhi panongu pesü panongu kimi qhoqhü cheke,

⁶ tiye Sarah no Abraham ghokulu shi no pa vilo I mpeu ipi ku chekeu toi ke. Kiu no achipi keno nongu no tipau shi eno msàmo aye nongu ye liw angáqo ke.

⁷ Akiminoqo, tipau tho lono nongu no nongu nipùnoqo sasü akelo akümtsha shi xülo, eno panongu ye miqemilei keu tüna kehu panongu gihu ghi tucho-mjo eno panongu ghí nongu gholo küpükini küxü ghò mheghi ighílu keu toi sasü xülo, tishi keu vechewo kiunomu nongu kighiniqo lakhamo nani ke.

Akivi Shikeu Ghenguno Ime keu

⁸ Ashekha shi, nongu kümtsü akükümsü lakhi shilo, lokughuno kilé lo, lakhi no lakhi kimiyekilé lo, kimiyeqhiyi lo eno akuchunu shilo.

⁹ Küsakügha pesü küsakügha lochile kevilo momu thogha keu pesü thogha keu lochile kevilo. Tishini ke züqhulo, kükümgha pesü küsakügha lochile lo, kughengu nongu ye hipau ghenguno kulùvea ke eno tishi keu vechewo nongu pelo kükümgha ighílu peniye ke.

¹⁰ Kughengu, “Khuno no aküxü kimiyeni eno atsala kiviqo ithuluni keno panongu ye küsakügha lau no panongu mili ghasüve moayesae. eno panongu mtsü pelo pishikiqhi tsapiqo pìní keu lono ghasüve moayesa.

¹¹ Panongu ye küsakügha lau no tsüghüve no akivi kümlà shi moayesa; panongu ye külakishi phu eno tipau pape moayesae.

¹² Kughengu Alhou nhethi ye amikuchomi shou ani eno pa kìní ye amlotsüqhiyi panongu kighini ini tsü acheni, ikemu khunoqo no küsakügha kümlà shi cheni keno Alhou gi ye panongu lau no kugho pe acheni.”

¹³ Tsalá nongu no akivi kümlà shini keu lo minemighei aye khuu no nongu shipüsani kea?

¹⁴ Ikemu tsalá nongu no kiu no achipiu keno tipau ghenguno imeve kepu shi aghimu, nongu ye akümghapu ke. “Panongu no kichiqhi keqo lo msà kevilo; nongu shikümsave pe kevilo.”

¹⁵ Ikemu nongu mlo lo Khristo ye Ampeu kepi gihu lo. Nongu no lajupu akeu kiqi iniju kemi kümtsü vilo khochile tsüní ke alhokuthu lo kutò pe alo. Ikemu iqüighai eno agigihu,

¹⁶ eno alolo kighithi mütsümishei shi pesü alo, tishi keu vechewo khunoqo no tixe kükümsü xapu no nongu no Khristo vechewo aghiliaye kivi akeu pipüsani keno panongu pelo panongu no pipüsa keu lo kujove peniye ke.

¹⁷ Kughengu tsalá Alhou pulou shi aghí aye küsakügha kümlà shikeu ghenguno ime akepu ye akivi kümlà shikeu ghenguno ime keu pavi ke.

¹⁸ Kughengu Khristo ghí Alhou lau ningu saighi nike axiné ghenguno ghuthukhavi no kümtsü ghenguno imeve ke, amikuchou no amikucho kumomi ghenguno thive ke. Pa phimpi ye pìthíve ke ikemu Aghungu lono xüputhuveke.

¹⁹ Xüputhuve kethiu, pa ye khathape akeu ghunguqo lau wu no asheshu ke—

²⁰ tiye khaghi Noah ghuloki lo ashuka mülà akelo Alhou no kutuukulu shi khe akelo agholumove kemiqo ke. Ashuka tipau lo timi aghulo, aqó lo pano tache, likhi azü lono xalu ke,

²¹ eno azü hipau ye baptiz khikhi itehi nongu xalu ani keno tipau michi ke—tiye nongu phimpi lo axiné akeu shikimtheve keu kumoe ikemu Alhou lau mütsümishei keu alolo kighithi aní keu shoqhi ke. Hino Jisü Khristo’w xüleputhu vechewo nongu xalu cheni ke,

²² Jisü Khristo ye kungugha lo wuvea eno Alhou u ajeu küdau iqa ani. Eno kungumi, kükagha eno akükaqo no pa qhoqhü ghi anie.