1 Peter 2 - Sümi Tiqhelimi Bible

¹ Tighenguno, nongu likhi nongu lolo axeküsü jeli ngò pishikiqhi jeli, kühakügha, anhekushu, eno pipütha keu jeli kümtsü qhivelo.

² Angá kughunuqo toi, aghungu kichhizü kitiqemo keu ye nikeu mineqhiyi lo, tishianguno tipau vechewo nongu pelo nonguw xakulu küxü lo thuwulu peniye ke,

³ kughengu Ampeu ye aloke ipi nongu no ithive ake.

Aküxüpu Tu eno Kisheluve Keu Timiqo

⁴ Nongu no pa lau ighi. Pa ye aküxüpu Tu ke. Aküxüpu Tu ye timiqo no milive ke ikemu Alhou no pa kishelu eno pa ye Alhou ghenguno akughupu ke.

⁵ Nongu ghí aküxüpu tuquqo toi akimthe chine kümlamì lakhi shi no aghungu xülo aghakishi kümlagho pe Jisü Khristo vechewo Alhou no ikhilu küzüpu shi mülá peniye aghungu lo ki lakhi gholo no nongu shiqhepuku anike.

⁶ Kughengu Kuchoyesü lo ishi pipüani: “Julo, I no Zion lo atu lakhi qhi ani, tiye kisheluve keu eno akughupu boqha-tu lakhi ke, eno timi khuu no pa shou pükhübeni keno pa ye khilemu kujove pemo nani.”

⁷ Itehi nongu khunoqo no pülü ani keno, atu hipau ye akughupu ke. Ikemu khunoqo no pülümo keno, “Aki kishimi no atuqu milive keu no akhotou tuqu shivae,”

⁸ eno, “Atu khipau no timiqo pelo püsüpukulu pe cheni eno atuqu khipau no panoqo pelo veqhive pe cheni keno.” Panongu no akükütsütsa gholumo ke ghenguno panongu ye küpüxa cheni eno panongu ye hitoi shipe nikeu shi kughuchho pe qhive ke.

⁹ Ikemu nongu ye kisheluve kemi timiqo, akükau chine kümlamì, akimthe shiye eno Alhou’w paküta keu mheghiqo ke, tishi keu vechewo nongu pelo khuu no paw akichiqhipu küvü lo süghi niye àküzǘ lono nongu kuphelu keno pa sheqhe ghi asheshu peniye ke.

¹⁰ Ghuthu lakhi lo nongu ye Alhou’w timiqo kumo ke, ikemu itehi nongu ye Alhou’w timiqo shivea; ghuthu lakhi lo ye nongu ye kimiyekini ithumla no ake, ikemu itehi nongu ye kimiyekini ithuluvae.

Jewkumomi Qo-aho Lakhi lo Alhou Sükümsa Küxü Xü nikeu

¹¹ Kimiye chekemi shompamiqo, inami eno hapheve kemiqo kehu, ni ye nongu pelo axiné kümlà shinishiqhiyi chekeu, khikhi nongu ngulho sasü aghüshi acheni keno, tipau lau no putosü apenike hakite ani.

¹² Jewkumomiqo gholo akivishi xülo. Panongu no nongu ye achipikumo kümlà shi ani kepi nguku aghí namu Alhou no ningu xuju ighi keu tsalà lo panongu pelo nongu kümlà kivi ithulu no ajuküvü pesü Alhou tsü pelo.

¹³ Ampeu je ghenguno timiw kükagha kümtsü lau nongu likhi nongu ikhiphe pe tsülo: tiye akiqheu kükagha akeu qhasükükau lau shi aghina,

¹⁴ momu khunoqo achipikumo kümlà shi cheni keno ghime peniye eno khunoqo achipi shi cheni keno akishé tsüpe niye qhasükükau no anghqo nongu lau puwu keqo shi aghí namu panongu ghokulu shilo.

¹⁵ Kughengu nongu ye akümlà kivi shikeu vechewo nikhanighamiqow akümtha tsa hasülu moayesa keu no Alhou pulou ke.

¹⁶ Kuqhopheve kemi toi xülo, ikemu nongu ye kuqhophevea kepi tipau pesü küsakügha nhave nikeu ghenguno peitha kevilo; Alhou qüaxemi toi xülo.

¹⁷ Kümtsü lau agigihu achipi shi pìyelo, athiküzümi eno achelimi küpülümiqo kimiye lo, Alhou sümsa lo, qhasükükau gihu lo.

¹⁸ Aqüaxemiqo, Alhou sümsa keu gigihu lono nongu likhi nongu pesü nongu mpemiqo lau ikhiphe pe tsülo, tiye khunoqo akivimi eno akümtshami keno panongu lau likhi kumoe ikemu khunoqo no müghachhoi keno panongu lau ghí tishilo.

¹⁹ Kughengu tsalá khuala no Alhou ithi aghí keu ghenguno achipikumo ghime küsǜ xapuqheluve aye tiye sheqhe küzüpu ke.

²⁰ Ikemu tsalá nongu no achipikumo kümlà ghenguno nongu heqhi keu lo kutuuluve aye tiye kíshi no nongu ghenguno alá shilu nani kea? Ikemu tsalá nongu no akivi shikeu ghenguno ghime keu lo kutuuluve aye, hiye Alhou zülo sheqhe küzüpu ke.

²¹ Hipau ghenguno nongu kulùvea ke, kughengu Khristo ye nongu ghenguno ime keu vechewo nongu ghenguno kiche-kipiye lakhi qhivetsüae, eno nongu ye pa nepa lo pape moayesae.

²² “Pa ye axiné lakhimu shimoe, eno pa kichí lo pishikiqhi tsa lakhimu phumlae.”

²³ Kughou panongu no panonguw thogha keu pesü pa shou puku keno, pa ye mjochilemoe; kughou pa no ime akeno, pa ye khumu kichiqhi keu shimoe. Tishini ke züqhulo pa ye pa likhi pa pesü khuu no achipi shi küghathabe cheni keno pa pichebevetsüe.

²⁴ Khristo ampi no kros lono “Pa phimpi no ningu xinéqo puluve tsüke,” tishi keu vechewo ningu pelo axiné lo ye thive no achipiumikucho ghenguno xüpe niye ke; “Pa zakuqo vechewo nongu ye shipivi luvae.”

²⁵ Kughengu “nongu ye ambe no kawuve ake toi ke,” ikemu itehi nongu ye Ambe Kheu eno nongu ngulhoqo Jukükütsüu lau ideghivae.