1 Peter 1 - Sümi Tiqhelimi Bible

¹ Peter, Jisü Khristo’w apostol lakhi, Alhou no kisheluve kemiqo, Pontus, Galatia, Cappadocia, Asia eno Bithynia bocho kümtsü lo hapheve no apanagha pe akemiqo lau,

² Apù Alhou lokütsü vechewo kisheluve kemiqo, Aghunguw shikimthe keu kümlà vechewo Jisü Khristo gholu peniye eno pa jì no küzüteve kemiqo: Küpükini eno aloino keu no kupukuno shi nonguw shilu peniu.

Xü akeu Lajupu Ghenguno Alhou Sheqhe keu

³ Sheqhe keu pesü Alhou eno ningu Mpeu Jisü Khristo Papù tsü ani! Paw kikimiye kijè lono pa no akithí lono Jisü Khristo xüleputhuve keu vechewo ningu pelo xü akeu lajupu lo punú kitheluve

⁴ eno khilemu tsümavemo, shikuchubevemo momu kühavemo nikeu mheghi lakhi pe ningu tsüke. Amheghi hipau ye nongu ghenguno kungugha lo qhipüani ke,

⁵ tiye ashekha ghuloki lo xakulu pephe-piyemo ke kutólo aküpülü vechewo Alhou küká no azüto shipe qhipüa nani.

⁶ Itehi ado kitila ghenguno nongu ye pekuju jeli kümtsü lo amlokighishi shi ime moayesa kepu shi aghí namu hipaqo kümtsü lo nongu ye alokivipu kijè anike.

⁷ Nongu küpülü ye kuchou kepi kimchitsü niye pekuju jeliqo ighike. Hiye ameshoyi khikhi ami lono piti kütsüghǘ pühave chekeu nguno amekushou ke. Eno tishi keu vechewo kughou Jisü Khristo pephe-piye nike no akishé, ajuküvü eno agigihu ithulu peniye ke.

⁸ Nongu ye pa ithulu mphi kemu, nongu no pa kimiye ke; eno nongu no itehi pa ithumla namu, nongu no pa shou pülü ke eno piphekümlapu eno ajuküvü lokiqi no chhitoi anike,

⁹ kughengu nongu ye nongu küpülüw ashekhau visavili ithulu anie, ike tiye nongu ngulho xalu nikeu ke.

¹⁰ Xakulu hipau vehu lo tungkupumi khunoqo no nongu lau küpükini ighi niye akeu ghili pi keno panongu ye ighono amlotsüqhiyi shi phu eno shishe kutokughoi ke.

¹¹ Khristo Ghungu pano lolo akeu no Messiah aghime shi ime niye akeu eno tipau thiu ajuküvü ighi niye akeu azünatha ghi pipüa keu ye kiu do eno kiu tüqhüdo lono kichetsü ani keno phuphe niye pükapütsa ke.

¹² Alhou no tungkupmi lau piyesü keu no panongu no mülà akeu ye pano likhi pano ghenguno kumo no hi nongu ghenguno ke; tihu itehi ye nongu lau kungugha lono ighi keu Aghungu Kimthe vechewo atsakiviu pikülhave keu vehu ke. Kungumiqo ghí thime hipaqo lo jusünishikütü cheke.

Akimthe Shilo

¹³ Tighenguno kutokughoi eno tsükhütsüvai keu kükümsü xapusü nonguw lajupu kuchopu pe Jisü Khristo pephe-piye ghi ighi kelo küpükini süghi niye akeu shou belo.

¹⁴ Aghokulumi itimi toi shilo, nongu no kümthami küxü lo xüache ke ghuloki lo küsakügha shinishiqhiyi keu nongu lolo achekeu lau puloküqha kevilo.

¹⁵ Ikemu khuu nongu kulù keno pa ye akimthe ke, tighenguno nonguw süqesüli kümtsü lo akimthe shilo;

¹⁶ kughengu ishi yèpüani: “Akimthe shilo, kughengu ni ye akimthe ke.”

¹⁷ Kughengu nongu no Apù khuu agi jumo no timi lakhi-khi shou xatha chekeu ku keu ghenguno, nongu no hilehi ake dolo inamiqo toi agigihu sükümsa lono xülo.

¹⁸ Kughengu nongu ye ghükayi momu ameshoyi toi keu khikhi tsümave chekeu thime keno tipaqo pesü nongu pù-asüqo no abokümsa küxü laghi nongu lau pekishesü ighi keu lono nongu xaphelu pe püamoe,

¹⁹ ikemu ambeti lakhi jì toi keu Khristo jì mekusho, tukutiye küha keu eno azaku küha keu no nongu xaluvea ke.

²⁰ Pa ye ayeghiqha pulhosü mphi lono kisheluve ke, ikemu nongu ghenguno ashekhau do hipaqo lono pa pephe-piye ke.

²¹ Pa vechewo nongu no Alhou khuu akithí lono Jisü xüputhu no pa juküvü shitsü keno pa shou pülü ke, ike tighenguno nongu küpülü eno lajupu ye Alhou lau anike.

²² Itehi ye nongu pelo kuchou gholu keu vechewo amikucho shi lakhi no lakhi kimiyekilé penike ghenguno nongu ye thakütsüghüvea ke amlo lono thonhei shi no lakhi no lakhi kimiyekilé lo.

²³ Kughengu nongu ye tsümave nikeu piti kumo no tsümavemo nikeu piti, tiye xü akeu eno pühavemo nikeu Alhou tsa vechewo punú kitheve ake.

²⁴ Kughengu, “Timi kümtsü atsüni toi ke, eno panongu juküvü kümtsü alu lo axamunuqo toi ke; atsüni ye ighüyive cheni eno axamunu ye ighiqive cheni,

²⁵ ikemu Ampeu tsa ye pühavemo no pülhapuju ache nani.” Eno nongu lau kütsüve keu ye atsakiviu hipau ke.