1 Kor. 9 - Sümi Tiqhelimi Bible

Paul no Apostol Shi Akeu Chipiu

¹ Ni ye kuqhopheve kemi ke kumo keshea? Ni ye Apostolmi lakhi ke kumo keshea? Ni ye ningu Mpeu Jisü ithuluva ke kumo keshea? Nongu ye I no Ampeu kümlà shi akeu xathi ke kumo keshea?

² Ni ye kütami ghenguno ye apostolmi lakhi shi aghimo namu nongu ghenguno ye mütsüqhei no ni ye apostolmi lakhi ke! Kughengu ni ye Ampeu’w apostolmi lakhi ke ipi akeu ye nongu no chishida keu toi amichi shitsü anike.

³ Hiye khunoqo no I shou küghathabe ani keno panongu lau iw sükusho tsa ke.

⁴ Ningu ye chu-sho nikeu chipiu anike kumo keshea?

⁵ Apostol kütamiqo eno Ampeu thiküzümiqo ngò Peter noqo toi ningu ye küpülümi anipu sasü izüwulu nikeu chipiu anike kumo keshea?

⁶ Ikeo tiye Barnabas nikujo likhi no xü anikeu ghenguno mülà moayesa keu chipiu ani kea?

⁷ Ghüshimi khuu no ajume lumo no ghüshimi shi cheni kea? Alukichimi khuu no atsaibo shosü no tipau lo atsaithi xochu chemo kea? Ambe khemi khuu no ambe lojiqo jukuto no tipau kichhizü ye chemo kea?

⁸ Ni ye timi no picheghi keu kükagha lono hipau piani keshea? Ayeza lo ghí tishi pipüani ke kumo keshea?

⁹ Kughengu Moses Yeza lo ishi yèpüani: “Amishitsü no athì qo akelo pa kichí khatsü kevilo.” Ike Alhou ye amishitsü ghenguno alokümsü shi ani keshea?

¹⁰ Mütsüqhei no pa ye ningu ghenguno hipau pike kumo keshea? Iyei, hiye ningu ghenguno yèpüani ke, kughengu timi khukhumu alu hokide eno athì mununi keno pa ye ghile ghuloki lo asaje ithulu nikeu lajupu qhi no mülà moayesae.

¹¹ Ningu no aghungu lono nongu lau apitì xusü aye, ningu no nongu lau no ashi lo pimhe kepu tinhemügha ithulu keu ye aküzüpu ke kumo keshea?

¹² Kütamiqo no nongu lau no akukuphu hipau luni keu chipiu aghí aye, ningu ye tinguno akichiùmu aghí moayesa ke kumo keshea? Ikemu ningu ye hipau chipiu peithamo ke. Tishini ke züqhulo, ningu ye Khristo tsakiviu lakükhapu shimo nike ghenguno kiu-kiu lomu kutuukulu shive tsüke.

¹³ Khunoqo no achineki lo mülà acheni keno panongu ye achineki lono panongu chuqupu ithulu cheni, eno khunoqo no akümlá-khache lo mülà acheni keno panongu ye akümlá-khache lo kiu mülá keno tipau küsaje acheni kepi nongu ye mtha keshea?

¹⁴ Tihutoi, khunoqo no atsakiviu kütsü cheni keno panongu ye atsakiviu kütsü keu vechewo xülu pe moayesa kepi Ampeu no azah tsüke.

¹⁵ Ikemu ni ye hipaqo chipiu lakhimu peitha pe püamoe. Eno ni ye nongu pelo I ghenguno titoi shipe nikeu lakuju qhi ghi hipau yè anike kumoe. Kughengu I no achipiu hipau lo agijivilei atsakiviu kütsü chekeu lo khiuala pelo shipühave pe nikeu züqhulo ni ye thive keumu pavi ke.

¹⁶ Kughengu kughou I no atsakiviu kütsüni keno, ni ye qheza akepu kühae, kughengu ni ye kütsü moayesa pütsa ke. I no atsakiviu kütsümo aye I ghenguno ahasapu ke!

¹⁷ I no akutoshi no kütsü aye, I ghenguno qesaxu ani; eno I no akutoshi no kütsü aghimo aye, ni ye I shou pükhübe no shipe niye pichetsü keu kümlà likhi shi anike.

¹⁸ Tishiaye iw qesaxu ye kiu kea? Hipau ke: Ni ye ame lumo no kümsá no atsakiviu kütsü nikeu ke, eno tisheno ni ye atsakiviu kükütsümi lakhi shiaghi namu I chipiu kuchopu peithamo niye ke.

Paul no Pa Chipiu Peitha Keu

¹⁹ Ni ye kuqhophevea eno khuu laumimu kumo kemu ni ye tolukivi thaqhülo timi kutomo Khristo lau sasü ighi nike ghenguno I likhi I pesü kümtsü qeu lakhi shivae.

²⁰ Khristo lau Jewmiqo sasü ighi nike ghenguno Jewmiqo lau ni ye Jewmi lakhi toi xü cheni. Khunoqo no ayeza qholo ani keno panongu sasü Khristo lau ighi nike ghenguno (ni ye ayeza qholo kumo kemu) ayeza qholo akemi lakhi toi xü cheni.

²¹ Jewkumomi Moses yeza pe chemo kemi Khristo lau süghi nike ghenguno (tishiepimu I no Khristo yeza qholo akeu ghenguno ni ye Alhou yeza pemo keumu shichemoe), ni ye Moses yeza pemo kemi lakhi toi xü cheni.

²² Miqemilei kemi sasü Khristo lau ighi nike ghenguno ni ye miqemilei kemi lau miqemilei shi xü cheni. Ni ye timi khami likhimu xakulupu shilunimola yé tolukivi thaqhü timi kümtsü gholo thowkha kümtsü shi acheni.

²³ I no hi kümtsü shikeu ye atsakiviu ghenguno shike, tishianguno atsakiviuw kükümgha lo küsajelu niye ke.

Alikhi Aghasükulu

²⁴ Pokuxu kelo akupomiqo kümtsü po cheni, ikemu lakhi likhi no asaxu ithulu cheni kepi nongu ye mtha keshea? Tishiaye asaxu ithulu kepu shi polo.

²⁵ Aghili kukuxu lo ilo kemi kümtsü alikhi ampi ghasülu ghi qokiphe shi cheni. Panongu no tishi keu ye pepushumo nikeu kütsükuqho ithulu nikeu ghenguno ke, ikemu ningu no alikhi ampi ghasükulu shi achekeu ye lhokta kutólo pepushu anikeu kütsükuqho ithulu nikeu ghenguno ke.

²⁶ Tighenguno ni ye akimiji küha kemi lakhi toi po chemoe; Ni ye au kichishi chekemi lakhi no amlhü lo chishi jupüha akeu toi kichighi chemoe.

²⁷ Moe, ni ye I phimpi lo chishi puku achenie eno I phimpi pesü I likhi I qüaxe shive achenie, tishianguno ni ye kütamiqo kütsüve püzü I likhi ni ye asaxu ithulu nikeu lono kideqhive keu shimo niye ke.