1 Kor. 8 - Sümi Tiqhelimi Bible

Ajulho Müláve Keu Chuqu

¹ Itehi ye achuqu pesü ajulho lhouqo lau aghakishi shive keu vehu lo juni: Ningu no ithi akeu toi “Ningu kümtsü akighithi anike.” Ikemu akighithi no aqheküza shi cheni pe eno kikimiye no shiqhepuku acheni.

² Khunoqo no panongu ye kiuala ithi ani kepi kümsü cheni keno panongu ye panongu no ithi moayesa kepu shi akeu ithimo no aphie.

³ Ikemu timi khuno no Alhou kimiye cheni keno Alhou no pano ithi acheni.

⁴ Tishiaye, ajulho lhouqo lau aghakishi shive keu chuqu chu akeu vehu lo: Ningu no ithi akeu no “Ajulho lhou lakhi ye ayeghi hipau lo kiumu kumoe” eno “Alhou ye lakhi thono kütau kühae.”

⁵ Ike tsalá alhouqo ipi chekeu atsütsǘ lo aghí na ayeghi shou aghí pinamu (kuchou lo timi khami ye “alhouqo” eno “ampeuqo” kutomo mülá acheni),

⁶ ningu ghengu ye Alhou lakhi likhi ani, pa ye Apù ke eno pa vechewo thowkha kümtsü ighi eno ningu ye pa ghenguno xü acheni ke; eno Ampeu lakhi likhi ani, tiye Jisü Khristo ke, pa vechewo thime kümtsü ighi eno ningu ye pa ghenguno xü acheni.

⁷ Ikemu timi kümtsü no hipau ithi anike kumoe. Timi khami ye itehi kutólo ajulho lhou lau mülá keu lhoaye peitha acheni kehu kughou panongu no aghakishi shive keu chuqu chuni keno panongu no tiye alhou lau aghakishi shive akeu toi kümsüve cheni, eno panongu lolo kighithi ye miqemilei ke ghenguno tiye kitiqevae.

⁸ Ikemu achuqupu vechewo ningu sasü Alhou lau kupunú ighilu chemoe; ningu no chumo aye ningu ye alhoküsau shive nike kumoe, eno ningu no chuve keu ghenguno akiviu shive anike kumoe.

⁹ Tishiepimu nongu no kiu shinishi keno shilu akeu vechewo miqemilei kemi pelo axiné lo ikiqive pemo nike kutokupui lo.

¹⁰ Kughengu khiuala alolo kighithi miqemilei kemi lakhi no nongu akighithimiqo no ajulho lhou chineki lo chu aghí keu ithulu aye, timi tipau ye ajulho lhou lau kiu pesü aghakishi shivea keno tipau chuni keu shikumtove nani ke kumo keshea?

¹¹ Tishive aye athiküzümi momu achelimi miqemilei keu hipau khuu ghenguno Khristo thive keno O kighithi vechewo shipüsavae.

¹² Kughou nongu no hipau ghola lono athiküzümi lau axiné shini eno panonguw alolo kighithi miqemilei akeu ghüzave nike no, nongu ye Khristo lau axiné shi anie.

¹³ Tighenguno, I no kiu chu cheni keno tino I thiküzümi momu I chelimi pelo axiné lo ikiqi ilove pe aghí aye, ni ye khilemu akiniù ashi chumae, tishianguno I vechewo panongu pelo ikiqive pemo nike.