1 Kor. 6 - Sümi Tiqhelimi Bible

Küpülümiqo Dolo Atsa Kükügha

¹ Nongu dolo khiuala no kütami sasü kütsala keu aghí aye nongu ye küghakütha ghenguno Ampeu’w timiqo zülo wuni ke züqhulo ighümo no alhou kümthami zülo pewu cheni keshea?

² Ikeo nongu ye Ampeu’w timiqo no ayeghiqha shou küghatha nani kepi mtha kea? Eno nongu no ayeghiqha shou küghatha kepu shi aye, nongu ye tachutaghu tsa küküghaqo küghathalu nani ke kumo keshea?

³ Ningu ye kungumiqo shou küghatha nani kepi nongu ye mtha keshea? Tishiaye ningu ye hipau küxü lo küküpünaqo xathalu moayesae!

⁴ Tighenguno, nongu no hipau vehu toi keu lo kütsala keu aghí aye, nongu ye kushiye ashou küxümi akukuhou lo kihimomithe chekeqo pelo xakütha shitsü penike iniju cheni kea?

⁵ Nongu shikukujo nike ghenguno I no hi piani. Nongu gholo khumu küpülümiqo dolo kütsala akeu xathavelu kepu lokütsü küha keshea?

⁶ Ikemu tishini ke züqhulo, athiküzümi lakhi no lakhiu sasü atsa küküghaki lo wucheni—eno ti ghí pülümo kemiqo zülo wucheni.

⁷ Kuchou no nongu dolo atsa kügha akeu kiqi ye nongu ye mütsüqhei no tomokuchou shivae. Tishini ke züqhulo kushiye achipikumoumu shivemo kea? Kushiye pishiqhive pe keumu shivepemo kea?

⁸ Tishini ke züqhulo, nolikhi nongu no pishiqhi eno achipikumo keu shike, eno nongu no nongu thiküzümi eno achelimiqo lau hipau shike.

⁹ Ikeo achipikumo shi chekemiqo ye Alhou kükaphu ighí mülà nani kepi nongu ye mtha kea? Nongu pishiqhive pe kevilo: Kipito kimthe kumo kümlà shi chekemi na ajulho mülá chekemi na shupumi na kipitimi-totimi michimo no ashi-aji küqha xü chekemi na

¹⁰ küpkami na alakiminemi na shokümzümi na kütami pipütha chekemi na pishiqhi chekemi namu Alhou kükaphu ighí mülae.

¹¹ Ike nongu khami ye hitoi xüche ke. Ikemu nongu ye qhukimthevae, nongu ye shikimthevae, nongu ye Ampeu Jisü Khristo je lono eno ningu Lhou Ghungu vechewo achipikaluvae.

Kipito Xüküpsa

¹² Nongu no, “Ni ye kiu-kiumu shilu kepu chipiu ani,” ipi cheni; ikemu thowkha kümtsü ye alá shilu chemoe. “Ni ye kiu-kiumu shilu kepu chipiu ani,” ikemu kiunomu I kügha pesü aqüaxe shive pe müla nani.

¹³ Nongu no ishi pi cheni, “Achuqupu ghenguno akive eno akive ghenguno achuqupu, ikemu Alhou no küma kinikujo kütsave nani.” Tishimu aphimpi ye kipito xüküpsa shipe nike ghenguno kumoe ikemu Ampeu ghenguno ke, eno Ampeu ye aphimpi ghenguno ke.

¹⁴ Alhou no pa küká vechewo akithí lono Ampeu xüputhu ke, eno pa no ningu ghí xüputhu nani.

¹⁵ Nongu phimpi ye Khristo phi-au kepi nongu ye mtha keshea? Tishiaye ni ye Khristo phi-au ikhipesü kütüqhalimi lakhi gholo küqhave tsüní keshea? Khilemu tishimoe!

¹⁶ Timi khuu no pa likhi pa pesü kütüqhalimi lakhi gholo küqhaveni keno pa ye li phimpi gholo lakhi shivea kepi nongu ye mtha keshea? Kughengu Kuchoyesü lo ishi pipüani, “Pama ye aphi-ashi lakhi shive nani.”

¹⁷ Ikemu khukhumu Ampeu gholo küqhave aye pa ye aghungu lono pa gholo lakhi shivae.

¹⁸ Kipito xüküpsa lau no pove lo. Timi lakhi no axiné kütau shikeu kümtsü aphimpi nguno khalau ke, ikemu timi khuu no kipito xiné shini keno, pa ye pa likhi pa phimpi shou axiné shipuku anie.

¹⁹ Nongu phimpi ye Aghungu Kimthe chineki ke, pa ye nongu lolo akeu eno Alhou no nongu tsü keu kepi nongu ye mtha keshea? Nongu ye nolikhi nonguw kumovae;

²⁰ Alhou no ame no nongu qhüluvae. Tishiaye nongu phimpi pesü Alhou juküvüpu shitsülo.