1 Kor. 5 - Sümi Tiqhelimi Bible

Akibolomi Kipito Dolo Mithekumo Vehu

¹ Nongu dolo kipito xüküpsa kümlà shi akeu sütsa kuchou no ighivae, eno tikithipu ye Jewkumomiqo dolo ghí shichemo keu ke: Tiye timi lakhi no papù nipu sasü küghünave keu ke.

² Eno nongu ye aqheküza shi ani ipie! Tishini ke züqhu nongu ye qanimlo akepu eno timi khuu no hikithipu kümlà shi ani keno nonguw kuposhukulu lono pa je ikhive tsü kepu ke kumo keshea?

³ I shélo ye, ni ampi no nongu gholo küha pinamu ni ye aghungu lono nongu gholo ani. Aghungu lono nongu gholo ngo ake toi ni ye ningu Mpeu Jisü Khristo je vechewo timi khuu no akümlà lhoküsa shi cheni keno pa shou küghathabevae.

⁴ Ike kughou nongu no kumqoni keno ni ghí aghungu lono nongu gholo anani, eno ningu Mpeu Jisü küká ghí nongu gholo anani,

⁵ ike timi tipau hu ye aphi-ashi kütsave penike ghenguno ikhiphe pesü Satan u lo phesüve tsülo, tishianguno Ampeu tsalá lo pa ghungu xalutsü penike.

⁶ Nongu no aqheküza shi akeu ye alo keu kumoe. Kholaqhi kitila lakhi no asho kunú pe püakeu kuchopu ingughoive tsü chekeu nongu ye mtha keshea?

⁷ Kholaqhi aqa hu ye shikimtheve lo, tishianguno nongu ye kholaqhi sümo keu asho kukunu akitheu shilu peniye ke—kuchou lo nongu ye kholaqhi sümo keu sho akitheu ke. Kughengu ninguw Hechekulu ambeti Khristo no ningu ghenguno aghakishi shivea ke.

⁸ Tighenguno ningu ye kholaqhi aqau, ti axeküsü ngò küsakügha, pesü Tiqhitini ghulhu shimoni, ikemu kholaqhi sümo keu sho, ti amikucho eno kuchou, pesü hipau ghulhu shinie.

⁹ Ni ye iw yèsü lo nongu vilo kipito kimthe kumo kümlà shi chekemiqo gholo kuloji kevilo ipi yè ke—

¹⁰ ni ye ayeghiqha lo timi khunoqo no kipito kimthe kumo, momu alakiminemi eno pükaqhi chekemi momu ajulho mülá chekemiqo piamoe. Tishiaghi aye nongu ye ayeghi hipau qhive moayesa nani ke.

¹¹ Ikemu I no nongu lau yè akeu ye khukhumu nongu thiküzümi momu nongu chelimi lakhi kepi pükha püzü kipito kimthe kumo kümlà shi momu alakimine shi, ajulho mülá momu timi pipüsa, shomzü momu pishikiqhi ishi kemi gholo nongu pelo kuloji pemo niye hipau yè anike. Hikithipu timi sasü ye kümtsa ghí chu-sho kevilo.

^12-13 Akukuhou nguno khalau akemi shou küghathebe akepu I vehu kiu ani kea? Khunoqo no akukuho nguno khalau ani keno Alhou no panongu shou küghathabe nani. Ikemu nongu ye akukuhomi khunoqo axiné shi cheni keno panongu shou küghathabemo nani keshea? “Nongu dolo küsaküghau timi hu ye hapheve lo.”