1 Kor. 4 - Sümi Tiqhelimi Bible

Apostolmi Kuchou Lhoaye

¹ Tishiaye, nongu ye hitoi ningu ikhilu kepue: tiye Khristo qemiqo toi eno Alhou no paw tuqhou pephe-piyeve keu pichebeve kemiqo toi ikhilu kepu ke.

² Ikehu khunoqo pichetsü ani keno nongu ye pichebekulu shi kimchitsü moayesa nani.

³ Nongu no I shou küghathabe momu timi no shi chekeu ghola lono I shou küghathabe anamu ni ye kíshiveni kela ipi akepu kühae; mütsüqhei no ni ye I likhi I shoumu küghathabe chemoe.

⁴ I lolo kighithi ye mütsümishei ani, ikemu tipau no I pelo akipimí küha kemi shilu pe anike kumoe. Ikemu tiye Ampeu no I shou küghathabe anike.

⁵ Tighenguno kughupüa keu do tomphi züu ye kiumu küghathabe kevilo; Ampeu no ighimo ke kutólo khe aghílo. Pa no àküzǘ lo kiu küsüpüani eno amlo lo kiu kümsüpù ani keno kümtsü aküvü lo pekiphe shive tsü nani. Tipau dolo no kümtsü Alhou lau no akishé ithulu nani.

⁶ Ikehu, athiküzümi eno achelimiqo, Apollos nikujo ye nongu kivipu ghenguno thime hipaqo kümtsü nikujo küxü lono kiqi pesü pi anike, tishi keu vechewo nongu pelo ningu lau no küghakiche tsa, “Kiu yèpüani keno tipau veche kevilo,” ipikeu ithilu peniye ke. Tishianguno nongu ye ningu sakiphemi dolo lakhi ju pesü qheza no lakhiu phimove keu shipemo niye ke.

⁷ Kughengu khuu no kütami kümtsü nguno nongu küta shilu pe kea? Alhou no nongu tsümo keu nongu ye kiu ani kea? Eno nongu no kiu ani keno tiye Alhou no nongu tsü aye, nongu ye kushiye pa no nongu tsümo ketoi qheza ani kea?

⁸ Nongu ye nongu no lunishi keu kümtsü auvea keshea! Nongu ye kiními shivea keshea! Nongu ye ningu sümo no Alhou yekipe lo ka auvea keshea! Ni ye nongu pelo ka aghive penishi anie, tishianguno ningu ghí nongu gholo ka niye ke!

⁹ Kughengu I no kümsüju kelo Alhou ye ningu Apostolmiqo pesü akikichighi-a lo pìthíve peniye kiléqhive püzü timi shekujo che no ashekha lono pephe-piye niye qhive keu toi ke. Ningu pesü ayeghiqha kuchopu zülo eno kungumi ngò timiqo zülo qheghüi jukepu lakhi shive tsüe.

¹⁰ Ningu ye Khristo ghenguno anikhami ke, ikemu nongu ye Khristo lono shishe alokütsümi ke! Ningu ye miqemilei kemi ke, ikemu nongu ye akumtomi ke! Nongu ye qhoqhü-gihu ke, ikemu ningu ye thaigha ke!

¹¹ Itehi kutólo ningu ye müzüthi eno tüghüthi cheni, ningu ye tiphimini küixü pepu cheni, shishe ningu heqhi-buqhi achephi, ningu ye kupo-kichemi ke.

¹² Ningu ye nilikhi ni-u pesü aghime shi mülà acheni. Kughou ningu ghushoni keno, ningu ye kümgha tsü cheni; kughou ningu pishi-pujuni keno ningu ye tipau lo kutuuve cheni;

¹³ kughou ningu pipüthani keno ningu ye akümtsha shi khochile cheni. Itehi kutólo ningu ye ayeghiqha’w tübatüzü pekütsüpüa keu eno ayeghiqha’w xinexigha toivea ke.

Paul no Qhüiniju eno Pikichi keu

¹⁴ I no hipau yè akeu ye nongu shikukujo niye ke kumoe ikemu I no kimiye chekemi nuliqo lau toi nongu pikichi niye yè anike.

¹⁵ Tsalá nongu no Khristo lono nongu kiche-piye tsüní kemi qhethonhe chighí aghí namu, nongu ye apù kutomo anike kumoe, kughengu Khristo Jisü lono eno atsakiviu kütsü keu vechewo ni ye nongu papù shiluvea ke.

¹⁶ Tighenguno I toi shipe nike I no nongu hakite ani.

¹⁷ Hi ghenguno I no Khristo lono kimiye chekeu eno pülübe chekeu I nu Timothy nongu lau puwuva ke. Pa no nongu vilo I no Khristo Jisü pape ghi xü chekeu ghola nongu vilo pikithe nani. Tino aqha kuchopu lo eno akukuhou kümtsü lo I no kiu kütsü cheni keno tipau gholo kimshilu nani.

¹⁸ Ni ye nongu lau ighima küghashi kümsüve püzü nongu khami ye akuchhoma shivae.

¹⁹ Ikemu Ampeu no pulo aghí aye ni ye kighithe nongu lau ighi nani, eno tisheno I no akuchhoma shi akemiqo no kíshi piani keno tipau likhi kumo püzü panongu ye kiu küká ani keno ti ghí phuju nani.

²⁰ Kughengu Alhou kükaphu ye atsa no piakeu vehu kumoe ikemu aküka vehu ke.

²¹ Nongu ye kiu pulo ani kea? Ni ye ghasü chekeu asǜ pesü nongu lau ighini keo kikimiye lono eno ivünhei keu mlo kükümsü lono ighilo pi kea?