1 Kor. 3 - Sümi Tiqhelimi Bible

Akukuhou lo Sakiphemiqo

¹ Athiküzümi eno achelimiqo, ni ye Aghungu lono xü chekemi pütsa ketoi nongu pütsa mülae ikemu itehi kutólo ayeghilomi küxü ghola lo akemi, tiye Khristo lono angá kughunu shi akemiqo toi nongu pütsa anike.

² I no mükamüghai keu chuqu kumo püzü akichhizü nongu tsüke, kughengu nongu ye mükamüghai keu chuqu chumla ke. Mütsüqhei no itehimu nongu ye chumla nani ke.

³ Nongu ye itehimu ayeghilomi küxü qhemi lo aphike. Kughengu itehi kutólo nongu dolo anhekushu eno kütsala keu aphike, nongu ye ayeghilomi küxü ghola lo xü aphike kumo keshea?

⁴ Kughengu kughou timi lakhi no, “Ni ye Paul papemi,” eno kütami no, “Ni ye Apollos papemi,” ipi pìní keno tiye nongu ye ayeghilomi küxü ghola lo xü aphike kumo keshea?

⁵ Tishiaye Apollos ye kiu shi chekemi kea? Eno Paul ye kiu shi chekemi kea? Panongu ye aqemiqo ke, eno Ampeu no pama lakhi-khi lau akümlà tsüpüa keu kiqi lono panongu vechewo nongu ye pülülu ke.

⁶ I no asübo shosü, Apollos no azü pusǘ, ikemu Alhou no tipau thuwulu pe ke.

⁷ Ikehu shosü keu pina azü pusǘ keu pinamu akhoto kumoe, ikemu Alhou khuu no abòqo thuwulu pe cheni keno pa likhi no akhotou ke.

⁸ Timi khuu no asübo shosü eno timi khuu no azü pusǘ keno pama ye akimiji lakhi ke, eno pama kinikujo pama kümlà kiqi lono qesaxu tsü kepu shi nani.

⁹ Kughengu ningu ye Alhou kümlà lo mülà küqha akemiqo ke; eno nongu ye Alhou’w aki-alu ke.

¹⁰ Alhou no küpükini I tsüpüa keu vechewo ni ye aki kishimi alokütsümi lakhi toi aboqha qhapüa tsü ani, ikelo ye kütami khami no tipau shou aki shipuku anie. Ikemu khukhumu aboqha hipau shou shipukuni aye, kutokughoi moayesa nani.

¹¹ Kughengu aboqha khikhi qhavea keno tiye Jisü Khristo ke, tinguno alau ye khunomu aboqha kütau qhamla nani.

¹² Khiuala no ameshoyi, ghükayi, amekusho-tu, asǜ, atsüni momu aghijini pesü aboqha shiqhepuku aye,

¹³ tiye kiu keno panongu kümlà vechewo pìye nani, kughengu tipau Tsalá lono aküvü lo saipeghive nani. Tiye ami gholo no pephe-piye nani, eno ami no timi lakhi-khi kümlà meküa pitiju nani.

¹⁴ Kiu mülà pepüa keno tipau pitivemo aye, akümlàu ye qesaxu ithulu nani.

¹⁵ Ikemu tipau pitive aye, akümlàu ye amhekiqi shive nani ikemu tishiaghimu xaluve nani—eno tiye akushukulu ami küqü mtá lono pokajolu akeshi nani ke.

¹⁶ Nongu likhi nongu ye Alhou’w achineki eno Alhou Ghungu no nongu gholo acheni kepi nongu ye mtha keshea?

¹⁷ Timi khukhumu Alhou chineki kütsave aye, Alhou no timi tipau kütsave nani; kughengu Alhou chineki ye akimthe ke, eno nongu kümtsü Alhou chineki tipau ke.

¹⁸ O likhi O pishiqhi kevilo. Nongu khiuala no hipau tiqheli küxü ghola kiqi lono alokütsümi kepi kümsü aye, no ye alokütsü shilu nike ghenguno “nikhanigha” shive moayesae.

¹⁹ Kughengu hipau yeghiqha lokütsü ye Alhou gizülo nikhanigha ke. Tiye Kuchoyesü lo ishi yèpüa keu toi ke: “Pa no alokütsümi müqükini lono panoqo meluve cheni”;

²⁰ eno itaghi ishi yèpüani, “Ampeu ye alokütsümi kükümsü ye ameküha kepi ithi ani.”

²¹ Tishiaye, timi sakiphemi khumu pükhü pe qheza akepu kühae! Kughengu thowkha kümtsü nonguw ke,

²² Paul na Apollos na Peter na ayeghiqha na aküxü na akithí na itehi akeu na ighi nikeu pinamu—thowkha kümtsü nonguw ke,

²³ eno nongu ye Khristo’w ke, eno Khristo ye Alhou’w ke.