1 Kor. 2 - Sümi Tiqhelimi Bible

¹ Athiküzümi eno achelimiqo, kughou I no nongu lau ighi keno ni ye atsapikithi momu timi lokütsü lono Alhou’w tuqhou ghili pesü asheshu ighimoe.

² Kughengu I no nongu gholo ngo ake lono ni ye Jisü Khristo eno pa yeda pìthíve keu nguno alau ye kütau kumu mthave nikeu shi xathave ke.

³ Ni ye miqemilei keu gholo shishe msà khokhoshi nongu lau ighike.

⁴ I tsapi ngò I kükütsü ye alokütsü gholo zükulupu tsaqo pesü pimo ke, ikemu Aghungu küká shikipiye vechewo ke,

⁵ tishi keu vechewo nongu küpülü ye timi lokütsü shou kumo no Alhou küká shou bepe peniye ke.

Aghungu no Alhou Lokütsü Pephe-piye

⁶ Tishimu ningu ye alayemi gholo alokütsü tsa pi cheni, ikemu hipau tiqheli momu hipau tiqheliw ayekipemiqo lokütsü kumoe, panoqo lokütsü ye hauve niye akeu ke.

⁷ Moe, ningu ye Alhou lokütsü pesü asheshu cheni ke, tiye Alhou’w tuqhou küsüpüa keu eno Alhou no azüu no ningu jekipipu ghenguno kimishì pe püakeu ke.

⁸ Hipau tiqheli yekipemiqo lakhimu ti vethamla ke, kughengu panongu no vethalu ke aye panongu ye ajuküvü Mpeu yedapithive moni cheke.

⁹ Ikemu ishi yèpüa ani: “Anhethi no kiu ithumla aphi keno, akìní no kiu chimla aphi keno, timi mlo no kiu kümsüphe müla aphi keno”— khunoqo no Alhou kimiye cheni keno tipaqo ghenguno pa no thime hipaqo kutò pe qhipüani ke—

¹⁰ hipaqo ye Alhou no pa Ghungu vechewo ningu lau pephe-piyevae. Aghungu no thowkha kümtsü lheju cheni, tiye Alhou kukughu thonhei küsüpüa keu kutólo lheju cheni.

¹¹ Kughengu timi lakhi lolo aghungu akeu no kumo aye khuu no timi lakhi-khi kükümsüqo ithi cheni kea? Tipau paphi shi Alhou Ghungu likhi no thono khuu nomu Alhou kükümsüqo ithi amoe.

¹² Ningu no kiu ithuluvea keno tiye ayeghi hipau lo ghungu kumoe, ikemu Alhou lau no ighi keu Ghungu ke, tishi keu vechewo ningu pelo Alhou no kümsá no kiu ningu tsü keno tipau vethalu peniye ke.

¹³ Ningu no piche keu ye hike, timi lokütsü no ningu shika keu tsaqo lono kumoe ikemu Aghungu no ningu shika keu tsaqo vechewo ke, eno Aghungu no shika keu tsaqo vechewo aghungu küxüw kuchouqo hepho-piye cheni.

¹⁴ Aghungu Kimthe pighimo kemi ye Alhou Ghungu lau no ighi keu thimeqo ikhilu chemoe ikemu tipaqo ye nikhanigha kepi kümsü cheni, eno panongu ye tipaqo vethalu chemoe kughengu tipaqo ye Aghungu vechewo likhi no jupililu pe cheni ke.

¹⁵ Aghungu Kimthe pighi kemi lakhi ye thowkha kümtsü kiqiphelu cheni, ikemu kütami khunomu pa no ameküapu akeu kiqiphelumlae,

¹⁶ kughengu, “Khuu no Ampeu kükümsü ithi kea? eno khuu no Ampeu kichetsü kulupu kea?” Ikemu ningu ye Khristo kükümsü pesü ache kemi ke.