1 Kor. 15 - Sümi Tiqhelimi Bible

Khristo Xülethuve keu

¹ Athiküzümi eno achelimiqo, itehi ni ye nongu lau I no atsakiviu kütsü keu, khikhi nongu no ikhilu eno tipau shou puthugholuva keno, tipau nongu lau pikithe nishi ani.

² I no nongu lau Alhou tsa kütsü keu nongu no ithamo no tsüqüpe aye, atsakiviu no nongu xaluvae. Tishimo aye, nongu ye adou lono pülüvae.

³ Kughengu I no kiu ithulu keno ni ye akhotou shi nongu lau pekishe tsü anike; ike Kuchoyesü kiqi lono Khristo ye ningu xinéqo ghenguno thive,

⁴ pa ye qhove eno Kuchoyesü kiqi lono pa ye atsala aküthüni lo ye xülethuve,

⁵ eno pa no Peter lau ipeghi pìye, eno tithiu akhopemi chighikini lau ipeghi pìye ke.

⁶ Tipathiu pa no ado lakhi lono athiküzümi eno achelimi 500 nguno akichiù lau ipeghi pìye ke. Panongu khami ye thivae ikemu kutomo no itehi ghí xü aphie.

⁷ Tisheno pa no James lau ipeghi pìye, eno tithiu no apostolmiqo kümtsü lau ipeghi pìye,

⁸ eno kümtsü nguno ashekhau shi pa no ni lhonima toi punú keu lau ghí ipeghi pìye ke.

⁹ Kughengu ni ye apostolmiqo dolo ghí anisüu ke eno apostolmi lakhi kepimu kuküzü kumoe, kughengu ni ye Alhou kukuhou pishi-puju cheke.

¹⁰ Ikemu Alhou’w küpükini vechewo I pelo apostolmi lakhi shilu pe ke, eno I lau paw küpükini tsü keu hu ye adou shivemoe. Moe, ni ye panongu kümtsü nguno alau aghime shi mülà acheke—tishiaghimu tiye I no kumoe, ikemu Alhou’w küpükini I gholo achekeu hu no ke.

¹¹ Tishiaye, I no kütsü keu shi aghina, apostolmiqo no kütsü keu shi aghí namu ningu kümtsü kükütsü sütsa ye atho ke, eno nongu no pülüluve keu ye hipau ke.

Kithimi Xülekuthu Vehu

¹² Tsalá Khristo ye akithí lono xüputhuve kepi kütsü che ghí aye nongu gholo khami ye kíshi no kithimi xülekuthu shikeu küha ipi cheni kea?

¹³ Kithimi xülekuthu keu küha ipi aye Khristo ghí akithí lono xüputhu pepüamovae.

¹⁴ Eno Khristo xüputhu püaghimo ke aye ningu no kütsü akeu ghí adou eno nongu no pülü akeu ghí kiumu amekühae.

¹⁵ Tinguno alau, ningu ye akumoakühau lono Alhou ghili pesü ashepe shi chekemiqo shiniae, kughengu ningu ye Alhou no akithí lono Khristo xüputhu kepi thopi shi acheni ke. Ikemu kuchou no kithimi xüputhumo aye Alhou ye Khristo xüputhu pe püamoe.

¹⁶ Kughengu kithimiqo xüputhu pe püaghimo ke aye Khristo ghí akithí lono xüputhumoni cheke.

¹⁷ Eno Khristo xüputhu pe püaghimo ke aye nongu küpülü ye ameküha ke; eno nongu ye nongu xiné lo aphike.

¹⁸ Tishiaghi ke aye Khristo pülü che no zü akemiqo ghí pühavae.

¹⁹ Ningu no hipau yeghi lo küxü ghengu likhi no Khristo shou lajupu qhi aye ningu ye timi kümtsü nguno alau kimiye kepue.

²⁰ Ikemu Khristo ye mütsüqhei no akithí lono xüputhuvae. Pa ye kithimi xüputhu niye akemiqo dolo amsüu ke.

²¹ Kughengu timi lakhi vechewo akithí ighike toi kithimi xülekuthu ghí timi lakhi vechewo no ighike.

²² Kughengu Adam vechewo timi kümtsü thive ketoi Khristo vechewo timi kümtsü püxüve nani.

²³ Ikemu hitoi küpasü ghi shi nani: Khristo no amsüu; tithiu no kughou pa no ideghini kelo paw timiqo xüputhu nani.

²⁴ Kughou Khristo no akükaphu jeli, kükagha eno aküka jeli kümtsü kütsave no akükaphu pesü Apù Alhou lau tsüveni keno tithiu no ashekha tsalà ighi nani.

²⁵ Kughengu Khristo ye pa ghümiqo kümtsü pesü pa pukhu qholo qhivemo ke kutólo ayè pe moayesa nani.

²⁶ Eno aghümi ashekhau kütsave nikeu hu ye akithí ke.

²⁷ Kughengu Kuchoyesü no pikeu toi, “Alhou no thowkha kümtsü pesü pa pukhu qholo qhivetsü ake.” Ike kughou “thowkha kümtsü” pa qholo qhivetsü ipi keno, tiye mütsümishei no Alhou khuu thowkha kümtsü Khristo qholo qhivetsü keno pa ampi ye kihisü amoe.

²⁸ Kughou Anu no hi kümtsü shiqhiveni keno tipathiu pa ampi ghí Alhou khuu thowkha kümtsü pe pa qholo qhivetsü keno pa qholo ngove nani, tishianguno Alhou pelo thowkha kümtsü shou ayè peluve peniye ke.

²⁹ Ike tsalá xülekuthu küha ipi aye, khunoqo no kithimi ghenguno baptiz lupüani keno panongu ye kiu shive nani kea? Kithimi ye khilemu xüputhu chemo aye kushiye kithimi ghenguno timiqo ye baptiz shi acheni kea?

³⁰ Eno ningu ye kushiye ado kümtsü lo ningu likhi ningu pesü akümsapü-a lo qhi aní kea?

³¹ Ni ye tsalà kipetsü akithí sholu acheni—iyei, tishimu ni ye kuchou no ningu Mpeu Khristo Jisü lono nongu lau kiu mülave tsü akeno tipau ghenguno I kijuvilei acheni ke.

³² Timi küxü ghola kiqi lono pìní aye, I no Ephesus lo panongu sasü aghasa lo tüghashiqo sasü kichighi akeshi kichighi keu lo ni ye kiu alá shilu kea? Tsalá kithimiqo xüputhu pe püamo aye, “Ningu chu eno sho aní nolo, kughengu ningu ye thoghiu thiveni ake.”

³³ Nongu pishiqhive pe kevilo: “Aküsàmi lhoküsa no ghushoghili kivi shipüsave cheni.”

³⁴ Nongu no shi moayesa keu toi nongu ye alopütsü kithe luvelo, eno axiné shiauve kevilo; kughengu I no hi piakeu lo nongu shikukujove ani kemu nongu gholo Alhou mtha-mithe kemi khami anike.

Xülekuthu Phimpi

³⁵ Ikemu timi khami no ishi inijuluvi, “Kíshi no kithimiqo xüputhuve cheni kea? Panongu ye kiutoi keu phimpi lono ighi nani kea?”

³⁶ Tiye kiutoi nikhanigha tsa kea! Nono apitì kiu yisü keno tipau ye akola thivemo ke thaqhülo abò lho ipeghimo nani.

³⁷ Kughou nono kiu-kiumu yisüni keno no ye abò lhoipeghive keu yisü chemoe, ikemu alothi yisü cheni, ike tiye aghì lothi keo kütau lothiqo keno yisü cheni ke.

³⁸ Ike Alhou no pa pulou lono alothi lakhi-khi pelo abò ipeghilu pe cheni, eno pa no alothi lakhi-khi pelo pütütaw abò ipeghilu pe cheni.

³⁹ Ashi-aji kümtsü aphiphi kumoe: Timi shi-aji küta eno lhoxüqo shi-aji kütashi acheni, aghauqo shi-aji küta eno akhaqo shi-aji küta ishi acheni ke.

⁴⁰ Kungugha lo phimpiqo ghí ani eno ayeghi lo phimpiqo ani; ikemu kungugha phimpiw qhivütsüni keu ye paküta ke, eno ayeghi phimpiw qhivütsüni keu küta ishi ke.

⁴¹ Khetsünhe ye qhivütsüni akeu jeli lakhi ke, aqhi no qhivütsüni akeu küta eno ayepuqo no qhivütsüni akeu küta ke; eno ayepuqo dolo ghí qhivütsüni akeu yepu küta ke.

⁴² Tihutoi kithimi xüleputhu kelo ghí tishi nani ke. Aphimpi khikhi tsümave kepu shi qhove cheni keno tiye tsümave müla kepu shi xüputhuve nani,

⁴³ aphimpi ye juküsapu shi qhove cheni, ikemu tiye ajuküvü lono xüputhuve nani; tiye tomo-chhimo keu shi qhove cheni, ikemu aküka kumto lono xüputhuve nani;

⁴⁴ tiye ashi phimpi lakhi shi qhove cheni; ikemu tiye aghungu phimpi lakhi shi ghi xüputhuve nani. Ashi phimpi ani aye aghungu phimpi ghí anike.

⁴⁵ Ike ishi yèpüani: “Timi atüghiu Adam ye aküxü küami lakhi shi lhophe ke”; ikemu Adam ashekhau, tiye Khristo ke, ye aküxü-kütsüu ghungu shive ke.

⁴⁶ Aghungu no atüghiu shi ighimoe, ikemu ashi no atüghiu shi ighi, eno tipathiu no aghungu ighike.

⁴⁷ Timi atüghiu Adam ye ayeghi mkhu lono ighike; ikemu timi akiniù Khristo ye kungugha lono ighie.

⁴⁸ Khunoqo no ayeghilomi keno panongu ye ayeghi mkhu lono lhokeu timi toi ke; eno khunoqo no kungughalomi keno panongu ye kungugha lono ighi keu timi hutoi ke.

⁴⁹ Eno ningu no ayeghi lo timi julho xapu akeu toi, ningu ye kungughalomi julho xapuve nani ke.

⁵⁰ Athiküzümi eno achelimiqo, I no nongu lau asheshu ani, ashi eno ajì ye Alhou kükaphu ighi müla nani, momu tsümave nikeu ye tsümave müla nikeu ighí mülae.

^51-52 I no nongu vilo Alhou’w tuqhou tsa pinike inilo: Ningu kümtsü khilemu thimo nani, ikemu kughou ashekhau fuko ighani keno ningu ye pai anhethi kütsükhavi ajuhi kilive nani. Kughengu kughou afuko ighani keno kithimiqo ye tsümavemo kepu shi xüputhuve nani, eno ningu ye ajuhi kilive nani.

⁵³ Kughengu tsümave nikeu ye tsümavemo nikeu no pa likhi pa pesü küzüluve moayesa nani, eno thiveniküau ghí khilemu thivemo nikeu pe pa küzüluve moayesa nani.

⁵⁴ Kughou tsümave nikeu no khilemu tsümavemo nikeu küzüluve eno thive nikeu no khilemu thivemo nikeu küzüluveni keno, tipathiu küghakiche tsa yèpüa keu ye kuchou shive nani: “Tokulu no akithí munovae.”

⁵⁵ “O akithí, ow tokulu ye khilehi ani kea? O akithí, ow ghüzakulupu sahu ye khilehi ani kea?”

⁵⁶ Akithíw ghüzakulupu sahu ye axiné ke, eno axiné küká ye ayeza ke.

⁵⁷ Ikemu Alhou lau shikimthi ani! Pa no ningu Mpeu Jisü Khristo vechewo tokulu ningu tsüke.

⁵⁸ Tighenguno, I no kimiye chekemi athiküzümi eno achelimiqo, mutotoi puthugho lo. Kiu pelo nomu nongu süküghütha pe kevilo. Pülhapuju lo nongu likhi nongu dokivi kümtsü pesü Ampeu kümlapù lo tsülo, kughengu nongu no ithi akeu toi Ampeu ghenguno mülà keu lo khilemu adou shive chemoe.