1 Kor. 14 - Sümi Tiqhelimi Bible

Akümlá lo Vethakulupu

¹ Kikimiye no nongu kimiji shilo eno Aghungu no aghò tsü keu lo akhoto no tungkuptsa pikeu lo nongu mlo tsüqhiyilo.

² Kughengu timi khuu no amili kithé lono piani keno pa ye timi pütsa anike kumoe ikemu Alhou pütsa anike. Kuchou lo ye, timi khunomu panongu no piakeu vethalu chemoe; panongu ye Aghungu vechewo Alhou’w tuqhouqo piqhi cheni.

³ Ikemu timi khuu no tungkuptsa pi cheni keno pa ye timiqo xaqhepuku, shikumto eno alokughuno tsü nikeu ghenguno pi cheni.

⁴ Timi khuno no amili kithé lono pi cheni keno pano likhi pano shikumtolu cheni, ikemu khuno no tungkuptsa pi cheni keno pano ye akukuhou shikumtolu cheni.

⁵ Ni ye nongu kümtsü pelo amili kithé lono pi penishi, ikemu tinguno alau ni ye nongu pelo tungkuptsa pi penishi ke. Timi khuu no tungkuptsa pi cheni keno pa ye amili kithé lono piche kemi nguno akhotou ke, kughengu amili kithé ye khiuala no pebidemo kelo ye akukuhou shikumto mülae.

⁶ Athiküzümi eno achelimiqo, I no nongu lau ighino amili kithé lono pinamu I no nongu lau piyeküsü momu akighithi momu tungkuptsa momu kichekütsü tsa kiuala süghilumo aye ni ye nongu ghenguno kiu alá shilu nani kea?

⁷ Aküxü küha keu nhemügha khipaqo aghügha igha cheni keno kümsüjulo, akiqi tsa lo fulili momu aheo ghí leyephiqo dolo kütüqü keu küha kelo timi lakhi ye kíshi no kiu le küigha ani keno ithi nani kea?

⁸ Afuko küigha chekeu no mütsümishei shi küighatsümo aye aghüshini ke ghenguno khuu no kutokughoilu nani kea?

⁹ Nongu lau ghí tihutoi ke. Nongu no nongu mili lono vethakulupu tsaqo piqhimo ke thaqhülo khuu no nongu no piakeu vethalu nani kea? Nongu ye amlhü lo pisü auve ake.

¹⁰ Mütsümishei no ayeghiqha lo atsa jeliqo kutomo ani, ikemu atsa lakhimu akiqi küha keu kühae.

¹¹ Tishiaye timi lakhi no kiu piani keno I no vethamla aye atsapiu ghenguno ni ye inami lakhi ke, eno atsapiu ye I ghenguno inami lakhi ke.

¹² Nongu lau ghí tihutoi ke. Kughengu nongu no Aghungu ghòqo ithulu nikeu lo minemighei ani kehu aghò khipaqo no akukuhou shiqhepuku cheni keno tipaqo lo akiqheu shini ke pükapütsa alo.

¹³ Hi ghenguno timi khuu no amili kithé lono pi cheni keno panongu ye panongu no amili kithé lono piakeu pekililu penike ghenguno inikhu moayesa ke.

¹⁴ Kughengu I no amili kithé lono inikhu aye I ngulho ye inikhu ani, ikemu I kükümsü ye kiumu alá shilu amoe.

¹⁵ Tishiaye ni ye kiu shini kea? Ni ye I ngulho lono inikhu nani, ikemu ni ye I tsa vethalu ghi inikhu nani; ni ye I ngulho lono ale phe nani, ikemu ni ye I tsa vethalu ghi phe nani.

¹⁶ Tishimo aye nongu no Aghungu lono Alhou sheqhe akelo kuchou phu chekemiqo ye kíshi no nongu no shikimthi tsü akeu lo “Amen” ipilu nani kea, kughengu panongu ye nongu no kiu piani keno mtha ke?

¹⁷ Nongu ye akiqheu shi shikimthi tsü aghiluvi, ikemu timi kütami shiqhepukulu movae.

¹⁸ Ni ye nongu kümtsü nguno alau amili kithé lono pilu akeu ghenguno Alhou shikimthi ani.

¹⁹ Ikemu ni ye akukuho lo ye amili kithé lono atsa 10,000 pinike züqhulo panoqo kichetsü nike ghenguno vethakulupu tsa punguu pive nani.

²⁰ Athiküzümi eno achelimiqo, itimi toi kümsü chekeu tavelo. Küsakügha shini keu lo ye itimi toivelo, ikemu nongu kükümsü lo ye asathevelo.

²¹ Ayeza lo ishi yèpüani: “Amili kütauqo lono eno inamiqo tsau no I no timi hipaqo vilo pi nani, ike tishi keghi panongu ye I tsa ini tsümo nani, ipi Ampeu no pi.”

²² Tishiaye, amili kithé hu ye küpülümiqo ghenguno kumo püzü pülümo kemiqo ghenguno amichipu lakhi ke; ikemu tungkuptsa ye pülümo kemiqo ghenguno kumo püzü küpülümiqo ghenguno ke.

²³ Ike akukuhomi kümtsü no ighi kumqo püzü kümtsü no amili kithé lono atsa pi ake lono kuchou phu chekemiqo momu pülümo kemiqo no iloghi aye, nongu ye izüuva kepi panongu ye pimo nani keshea?

²⁴ Ikemu kughou pülümo kemi momu kuchou phu chekemiqo no nongu kümtsü no tungkuptsa pi ake lono iloghini keno, panongu no xiné shikeu ghenguno akipimí tsü nani eno Alhou no küghathabe nani ipi vethalu nani,

²⁵ kughengu tungkuptsa chilu kelo panongu mlo tuqhou lo akeu hu ye pephe-piyeve nani. Tisheno panongu no qhoqhünhe no ishi ighamuku ghi Alhou mülá nani, “Alhou ye kuchou no nongu gholo anie!”

Akukuho lo Kithikiyi Ghola

²⁶ Athiküzümi eno achelimiqo, tishiaye ningu ye kiu pìní kea? Kughou nongu no aqoshi kusholuni keno, nongu lakhi-khi no Alhou kishé le, momu kichekütsü tsa, piyeküsü, amili kithé lono pikeu momu pebidekulupu ghò süghiluvi. Ikemu thowkha kümtsü akukuhou shiqhepuku nikeu ghenguno shi moayesa ke.

²⁷ Timi khukhumu amili kithé lono pi aye pikhavi lo timi kini momu küthü no akichiù shi pi moayesa eno panongu ye lakhi-khi no pi moayesa ke. Eno timi khami no pebide tsü moayesa ke.

²⁸ Pebide chekemi küha aye amili kithé lono piakeu hu ye akukuho lo inaqhoi ngove moayesa eno pa likhi pa pütsa eno Alhou pütsa auve moayesa ke.

²⁹ Tungkuptsa kipími ghí timi kini momu küthü no pi moayesa eno kütamiqo no kiu piani keno tsaqütsalei huju moayesa ke.

³⁰ Eno tilehi iqa akemi khiuala lau piyeküsü pìye aye, tungkuptsa piakeu hu ye pitave moayesa ke.

³¹ Kughengu hitoi shi anguno nongu kümtsü kivetsüghü ghi tungkuptsa pilu nani eno tishi keu vechewo timi kümtsü kiché tsülu eno shikumtolu nani ke.

³² Alhou tsape shini kemi nguagha ye akipiu no alikhi aghasükulupu shikepu ke.

³³ Ampeu’w timiqo kuhokumqo keu kümtsü lo shi chekeu toi ke Alhou ye kübangü chekeu Lhou kumoe ikemu külakishi Lhou ke.

³⁴ Totimiqo ye akukuho lo kuho akelo inaqhoi ngo kepue. Panongu ye atsa pipe kepu kumo, ikemu Jewmi yeza lo pipüa keu toi panongu ye aqhokigheu shi moayesa ke.

³⁵ Panongu no kiuala vehu lo ighiju nishi aghí aye panongu ye aki lono akimi vilo ighiju moayesa ke; kughengu kuho ake lono totimi lakhi no kiuala ighiju aye tiye li ghenguno akukujopu ke.

³⁶ Korinthiamiqo! Alhou tsa ye nongu gholo no huthuphe keshea? Ikeo Alhou tsa ye nongu lau likhi ighi kea?

³⁷ Timi khukhumu pa ye tungkupumi lakhi momu Aghungu no aghò tsüpüani kepi kümsü aghí aye I no nongu lau kiu yè ani keno tiye Ampeu zakütsü kepi panongu pelo ikhilu pelo.

³⁸ Ikemu khukhumu hipau ikhilumove aye, tiye pano likhi panongu kihimove anike.

³⁹ Tighenguno I thiküzümi eno I chelimiqo, tungkuptsa pi nishiqhiyi pilo, eno amili kithé lono pìní keu lakha kevilo.

⁴⁰ Ikemu thowkha kümtsü kithikiyi eno tsaqütsalei keu ghola lono shi moayesae.