1 Kor. 13 - Sümi Tiqhelimi Bible

¹ Ni ye timi mili momu kungumi mili lono atsa pi aghiluvi, ikemu kikimiye küha aye ni ye ayì kihe ghügha lakhi paphi ke momu küghapayi pesü kügha keu ghügha lakhi paphi ke.

² Ni ye tungkuptsa pikulupu ghò aghiluvi eno akümzapu tuqhou jeli ngò akighithi kümtsü ithikutolu aghiluvi, eno ni ye naghuto tukiqeve kulupu küpülü aghiluvi, ikemu kikimiye küha aye ni ye kiumu kumoe.

³ I no pighi akeu kümtsü pesü athokhamiqo lau tsüve aghiluvi eno I phimpi pesü pitive peniye ikhiphe pesü tsüve keu lo qheza aghiluvi, ikemu kikimiye küha kelo ni ye kiumu alá shimlae.

⁴ Kikimiye ye küsüqhikulu eno küpüqhiyi keu ke. Kikimiye ye anheshu chemo, kikimiye ye akuchhoma shichemo, kikimiye ye aqheküza shichemo.

⁵ Kikimiye ye kütami thaigha chemo, kikimiye ye alikhi asala phu chemo, kikimiye ye amlokighide shichemo, kikimiye ye timiw shikipimiqo kihikülai pesü qhichemo.

⁶ Kikimiye ye küsakügha kümlà lo alokiqi shichemo ikemu kuchou gholo alovishe cheni.

⁷ Kikimiye ye alhokuthu süsho cheni, alhokuthu pükhübe cheni, alhokuthu lajupu qhicheni, eno alhokuthu theqhikulu shi khe acheni.

⁸ Kikimiye ye khilemu ashekha shivemo nani. Khilehi tungkuptsaqo ani keno tipaqo ghí kishekhave nani; khilehi amili kithé no pikeu ani keno tipaqo ghí inaqhoive nani; khilehi akighithi ani keno ti ghí ashekha shive nani.

⁹ Kughengu ningu ye kupukülai ithi mphi ke eno ningu no tungkuptsa piche keu ye kupukülai mphi ke,

¹⁰ ikemu kughou kupukülai keu ighiveni keno, kupukülaimo keu kiu ani keno tiye hauve nani.

¹¹ Kughou I no itimi lakhi shi ache keno, ni ye itimi lakhi toi atsa piche, ni ye itimi lakhi toi kümsüche, ni ye itimi lakhi toi kiqiju cheke. Kughou I no kichimi lakhi shive keno, ni ye ititunu lhoaye kümtsü I thikhau qhikhave ke.

¹² Kughengu itehi ningu ye ahiju lakhi lo yekibide likhi ithulu akeu toi anike; ikemu hithiu ningu ye agi no agi kinheqhi ghi ithuluve nani. I no itehi ithi akeu ye kupukülai khamphi ke; ikemu hithiu ye thowkha kümtsü kupukülai ithive nani, eno tiye Alhou no kupukülai ni ithi akeu toi ke.

¹³ Tishiaye thime hipano küthü ani: aküpülü, lajupu, eno kikimiye. Ikemu hipaqo gholo akiqheu ye kikimiye ke.