1 Kor. 12 - Sümi Tiqhelimi Bible

Aghungu Kimthe Ghò Ghili

¹ Athiküzümi eno achelimiqo, itehi ye nongu pelo Aghungu Kimthe ghò ghili akivishi ithive penishi ani.

² Nongu no ithi akeu no nongu no Jewkumomi shi ache kelo kishikela shi püzü nongu sasü atsa pimla keu julho lhouqo lau saküghüzü sawuve pe cheke.

³ Tighenguno I no nongu pelo ithi penishi akeu ye khukhumu Alhou Ghungu vechewo piche kemi ye, “Jisü ye müsüinivea,” kepi pimo nani, eno Aghungu Kimthe vechewo likhi no kumo aye khunomu, “Jisü ye Ampeu,” kepi pimla nani.

⁴ Aghò jeli kütüta acheni, ikemu Aghungu lakhi no tipaqo kijé tsü cheni.

⁵ Akümlapu jeli kütüta acheni, ikemu ningu kümtsü Ampeu lakhi qe anike.

⁶ Mülàkulupu jeli kütüta anie, ikemu timi kümtsü pelo pütüta shélo mülàlu pe akeu Lhou ye lakhi ke.

⁷ Aqó kivipu ghenguno timi lakhi-khi lau Aghungu ghò tsü cheni.

⁸ Timi lakhi lau Aghungu vechewo alokütsü kükütsü tsa pilu kepu ghò tsü cheni, Aghungu tipau vechewo kütami lau akighithi tsa pilu pe kepu ghò tsü cheni,

⁹ eno Aghungu tipau hu no lakhi lau aküpülü ghò tsü cheni, kütami lau Aghungu tipau vechewo shikipivi ghò tsü cheni,

¹⁰ kütami lau akümzapu mülàlu kepu küká tsü cheni, lakhi lau tungkuptsa pikulupu ghò tsü cheni, kütami lau ye Alhou Ghungu lau no ighi keo mokeno kimchi kulupu ghò tsü cheni, lakhi lau ye amili kithé jeli lono pikulupu ghò tsü cheni, eno kütami lau amili kithé jeliqo pebidekulupu ghò tsü cheni.

¹¹ Hi kümtsü Alhou Ghungu kümlà ke, pa no kiqiju no tipaqo pesü timi lakhi-khi lau kijé tsü acheni.

Aphimpi lo Aphi-au Kutomo

¹² Aphimpi ye lakhi shi aghí namu aphi-au kutomo anike, eno aphi-au kutomo no aphimpi lakhi kughulho chekeu toi Khristo phimpi ghí titoi ke.

¹³ Kughengu ningu no Jewmi momu Jewkumomi shi aghina, aqüaxemi momu kuqhopheve kemi shi aghí namu aphimpi lakhi shive penike ghenguno ningu kümtsü Aghungu lakhi lono baptiz shike eno ningu kümtsü lau Aghungu lakhi tsüke.

¹⁴ Tishimu aphimpi ye aphi-au lakhi no kughulho pe püamoe ikemu aphi-au kutomo no kughulho pe püani ke.

¹⁵ Tishiaye tsalá apukhu no, “Ni ye au kumo ke ghenguno aphimpi gholo kumoe,” ipi aghí namu apukhu ye aphimpi gholo kumove keu shimlae.

¹⁶ Eno tsalá akìní no, “Ni ye anhethi kumo ke ghenguno aphimpi gholo kumoe,” ipi aghí namu akìní ye aphimpi gholo kumovea keu shimlae.

¹⁷ Tsalá aphimpi kuchopu no anhethi shi aghí ke aye, khile no chilu aghíni che kea? Tsalá aphimpi kuchopu no akìní shi aghí ke aye, khile no tsüngülu aghíni che kea?

¹⁸ Ikemu kuchou lo ye Alhou no pa pulou lono aphi-au kuchopu pesü pa gholau no aphimpi lo kithipe püatsü ake.

¹⁹ Tsalá aphi-auqo kümtsü ajeli lakhi likhi shi aghí ke aye, aphimpi ye khile aghíni che kea?

²⁰ Ikehu, aphi-au jeli ye kutomo ani ikemu aphimpi ye lakhi ke.

²¹ Anhethi ye au vilo, “Ni ye no avehupu shi amoe!” ipi mülae. Eno akütsü ye apukhu vilo, “Ni ye no avehupu shi amoe!” ipi mülae.

²² Monimo aye, aphimpi lo khipaqo no miqemilei kepi pi cheni keno tipaqo sümo kelo kiumu shimla ke,

²³ eno ningu phi-au lo khipaqo no ighono akhoto kumo kepi kümsü cheni keno tipaqo ye ningu no akivishi tucho-mjo acheni. Eno ningu phi-au lo khipaqo juküsa kepi kümsü cheni keno tipaqo akivishi jukuto moayesave cheni,

²⁴ eno ningu phi-au lo juküsapu kumo kepi kümsü keqo ye ighono jukuto moayesa keu shimove cheni. Ikehu Alhou no aphimpi kumqo pesü qhitsü keu ye aphi-au lo miqemilei keu jukuto moayesa keu alau shipe niye ke,

²⁵ tishi keu vechewo aphimpi lo kijetha keu ipeghipemo püzü aphimpi lo aphi-auqo kümtsü pelo lakhi no lakhi ghenguno alokümsü ape niye ke.

²⁶ Aphimpi gholo aphi-au lakhi no imeve aye, aphi-au kümtsü tipau gholo ime küqhave cheni; eno aphimpi lo aphi-au lakhi sheqhe aye, aphi-au kümtsü tipau gholo alovishe cheni.

²⁷ Ikehu nongu ye Khristo phimpi ke, eno nongu kümtsü pa phi-auqo ke.

²⁸ Ike Alhou no akukuhou lo hitoi qhipüatsü ani: atüghishi apostolmi, akiniù shi tungkupumi, aküthüu shi kükütsümi, tithiu no akümzapu kümlamì, tithiu no shikipivi ghò tsüpüa kemi, kuphukulumi, saphekulumi eno amili kithé lono pilu kemi.

²⁹ Panongu kümtsü apostolmi keshea? Panongu kümtsü tungkupumi keshea? Panongu kümtsü kükütsümi keshea? Panongu kümtsü no akümzapu kümlà shi cheni keshea?

³⁰ Panongu kümtsü no shikipivi ghò ani keshea? Panongu kümtsü no amili kithé lono pi cheni keshea? Panongu kümtsü no amili kithé lono pikeu pebidelu cheni keshea?

³¹ Tishiaye akiqheu ghò ithulu nikeu lo minemigheilo. Tinguno alau I no nongu vilo kümtsü nguno akighiché laghi lakhi kiche-piyeni.