1 Kor. 1 - Sümi Tiqhelimi Bible

¹ Alhou pulou lono Khristo Jisü’w apostol lakhi shipe niye kulùve keu Paul, eno ningu thiküzüu Sosthenes lau no,

² Alhou kukuhou Korinth lo Khristo Jisü lono shikimtheve no paw akimthemi shilu peniye kulùve kemi, tipau gholo ningu Mpeu Jisü Khristo, khuu ningu eno panongu Mpeu keno, pa jeku chekemi kümtsü lau yèlu ani:

³ Ningu paPù Alhou eno Ampeu Jisü Khristo lau no ighi keu küpükini eno alokiqi nongu gholo apeniu.

Shikimthikütsü

⁴ Khristo Jisü vechewo küpükini nongu tsü keu ghenguno ni ye alhokuthu I Lhou shikimthi acheni.

⁵ Kughengu Jisü Khristo vechewo nongu ye alaghi kümtsü lono alá shiluvea. Tiye atsapi jeli eno akighithi jeli kümtsü lono alá shiluvae.

⁶ Hipau vechewo Alhou no ningu pelo nongu gholo Khristo’w thopi shi akeu shikumto tsü ani.

⁷ Tighenguno nongu no ningu Mpeu Jisü Khristo pephe-piye nikeu minemighei khe akeu dolo nongu ye aghungu lo ghòqo lakhimu mikhe keu shi amoe.

⁸ Pa no ashekha kutólo ghí nongu pelo mutotoilu pe nani, tishianguno nongu pelo ningu Mpeu Jisü Khristo tsalà ighi kelo tukutiye küha no aghí peniye ke.

⁹ Alhou ye pükhübekuluu ke. Pa no pa Nu eno ningu Mpeu Jisü Khristo gholo kuposhu peniye nongu kulù ke.

Akukuhou lo Kijethave Keu

¹⁰ Athiküzümi eno achelimiqo, I no ningu Mpeu Jisü Khristo je lono nongu kümtsü pelo nongu no pikeu lo lakhi no lakhi gholo puloküqha tsü eno nongu dolo kijethave keu shimo no amlo eno akükümsü lo kupukülai shi küqhalu penike qhüiniju ani.

¹¹ I thiküzümi eno I chelimiqo, nongu dolo kütsala kilé ani kepi Chloe kibolomi dolo khami no I vilo kütüghüvae.

¹² Ike I no piakeu ye hike: Nongu dolo khami no, “Ni ye Paul papemi ke”; kütami no, “Ni ye Apollos papemi ke”; khami no, “Ni ye Peter papemi ke”; itaghi khami no, “Ni ye Khristo papemi ke,” ipi akhani ke.

¹³ Khristo ye kijethavea keshea? Paul ye nongu ghenguno yeda pìthíve keshea? Nongu ye Paul je lono baptiz shi keshea?

¹⁴ Crispus ngò Gaius pama nguno alau ni ye nongu khumu baptiz shitsümo ke ghenguno I no Alhou shikimthi ani,

¹⁵ kughengu nongu khumu I je lono baptiz shi kepi pimla nani ke.

¹⁶ (Iyei, ni ye Stephanas kibolomiqo ghí baptiz shitsü ke; tinguno alau ye ni ye khumu baptiz shitsü keu kümsülu amoe.)

¹⁷ Kughengu Khristo ye baptiz shipe niye I puwumoe, ikemu atsakiviu kütsü peniye ke. Eno tiye alokütsü eno pikulu vechewo kumoe, tishianguno Khristo’w kros küká hu ye adou shivepemo niye ke.

Khristo Yeda Pìthíve Keu ye Alhou Küká eno Alokütsü ke

¹⁸ Kughengu khunoqo no pühaveni cheni keno panongu ghenguno kros kükütsü sütsa ye nikhanigha tsa ke, ikemu ningu xaluve kemi ghenguno kros ye Alhou küká ke.

¹⁹ Kughengu Kuchoyesü lo ishi yèpüani: “I no alokütsümiw alokütsü kütsave tsü nani; I no vethakulumiw vethakulu ghütsü shikümkave tsü nani.”

²⁰ Alokütsüu ye khile ani kea? Ayeza kükütsüu ye khile ani kea? Hipau tiqheliw phukuthomiqo ye khile ani kea? Alhou no ayeghilomi lokütsü pesü nikhanigha shive tsüke kumo keshea?

²¹ Alhou ye pa lokütsü lono ayeghilomi ye khilemu ayeghi lo lokütsü vechewo pa ithimo nani kepi ithive ke ghenguno Alhou ye khunoqo no pülüni keno tipaqo xalu nike ghenguno nikhanigha vechewo kiu kütsü keno tipau ju amlokiqi shike.

²² Jewmiqo no amichipuqo khu cheni eno Greekmiqo no alokütsü phu cheni.

²³ Ike kughou ningu no yeda pìthíve keu Khristo ghili kütsüni keno, tiye Jewmiqo ghenguno apukhu küpsüpu shive cheni eno Jewkumomiqo ghenguno nikhanigha shive cheni.

²⁴ Ikemu Alhou no Jewmi eno Greekmi khunoqo kulùvea keno panongu ghenguno Khristo ye Alhou küká eno Alhou lokütsü ke.

²⁵ Kughengu Alhou’w nikhanigha ye timi lokütsü nguno alokütsüu ke, eno Alhou’w miqemilei keu ye timi kumto nguno akumtou ke.

²⁶ Athiküzümi eno achelimiqo, nongu kulù kelo nongu ye kiutoi ache keno kümsüjulo. Timi lhoaye kiqi lo ye nongu kutomo no alokütsümi kumo ke; nongu kutomo no timi müsükulumi kumo ke; eno nongu kutomo no aküxü kivi lono ighi kemi kumo ke.

²⁷ Ikemu Alhou no alokütsümi shikukujo niye hipau yeghi lo nikhanighamiqo kishelu ke; eno Alhou no akumtomi shikukujo niye hipau yeghi lo miqemilei kemiqo kishelu ke.

²⁸ Alhou no hipau yeghi lo chuninei kemi ngò timi no thaigha chekemiqo kishelu ke—eno thime akhotoqo pimhemove nike ghenguno kiumu kumo keu thimeqo kishelu ke,

²⁹ tishianguno timi khumu Alhou zülo qheza müla peniye ke.

³⁰ Alhou ghenguno nongu ye Jisü Khristo gholo anike, eno Khristo Jisü vechewo Alhou lau no ighi keu lokütsü ningu tsüke—tiye ninguw achipiumikucho, akimthe eno xachilekulu ke.

³¹ Tighenguno ishi yèpüani: “Khuu no qhezani keno Ampeu no mülà keu shou qheza pelo.”