1 John 5 - Sümi Tiqhelimi Bible

Timishi Shive Keu Alhou Nu shou Aküpülü Akeu

¹ Jisü ye Khristo kepi pülü chekemi kümtsü Alhou lau no ighi keu nuliqo ke, eno apù kimiye chekemi kümtsü pa nuliqo ghí kimiye acheni.

² Ningu ye Alhou nuliqo kimiye cheni kepi ningu no hitoi ithi cheni: tiye Alhou kimiye keu eno pa zakütsüqo papelu keu vechewo no ke.

³ Kuchou lo ye, Alhou ghengu ye hino kikimiye ke: pa zakütsüqo pape aní keu. Eno pa zakütsüqo ye amakho kimshi kumo ke,

⁴ kughengu Alhou lau no punúve kemi kümtsü ayeghiqha theqhilu cheni. Ningu küpülü vechewo ayeghiqha shou theqhikulu shilu keu ghí tokulu hipau ke.

⁵ Ayeghiqha theqhilu chekeu hu ye khuu kea? Khunoqo no Jisü ye Alhou Nu kepi pülü cheni keno tipaqo ke.

⁶ Azü eno ajì vechewo ighi keu ye hipau ke—tiye Jisü Khristo ke. Pa ye azü vechewo likhi no ighike kumoe, ikemu azü eno ajì vechewo ighike. Eno Aghungu hu no thopi shi acheni, kughengu Aghungu ye kuchou ke.

⁷ Kughengu thopi shi chekeu küthü ani:

⁸ Aghungu, azü eno ajì; eno küthü ye pulokile acheni.

⁹ Ningu ye timi shepe ikhilu cheni, ikemu Alhou shepe no akijeu ke kughengu tiye Alhou’w ashepe ke, tiye pa no pa Nu ghili tsü keu ke.

¹⁰ Khukhumu Alhou Nu shou pülü keu ye ashepe hipau ikhilu cheni. Khukhumu Alhou shou pülübemo keu ye Alhou pesü kimkimi lakhi shive tsü ani, kughengu panongu ye Alhou no pa Nu ghili ashepe tsü akeu pülübemo ke.

¹¹ Eno ashepe ye hike: Alhou no lhokta küxü ningu tsüvae, eno aküxü hipau ye pa Nu gholo anike.

¹² Khukhumu Anu akemi ye aküxü ani; khukhumu Alhou Nu küha keu ye aküxü kühae.

Ashekuho Iqhikumto Keu

¹³ Ni ye nongu khunoqo no Alhou Nu je shou pülü cheni keno nongu lau thime hipaqo yè ani, tishianguno nongu pelo nongu ye lhokta küxü ani kepi ithi peniye ke.

¹⁴ Alhou lau ighilu achekeu lo ningu ye pülükibe hipau ani: tiye ningu no pa pulou kiqi lono kiu-kiumu khu aye, pa no chilutsü cheni.

¹⁵ Eno tsalá ningu no kiu-kiumu khu keu pa no chilutsü cheni kepi ningu no ithi aye, ningu ye ningu no pa vilo kiu khu keno tipau ani kepi ithi cheni.

¹⁶ Tsalá nongu no athiküzümi momu achelimi khuala no akithipu lo sawuvemo kepu xiné shive keu ithulu aye, nongu ye akighini shi moayesa eno Alhou no aküxü panongu tsü nani. Ni ye axiné khipaqo no akithipu lo sawuve chemo keno tipaqo pi anike. Akithipu lo sawuve chekeu xiné lakhi ani. Ni ye nongu vilo tipau ghenguno akighini shilo pi anike kumoe.

¹⁷ Achipikumo shikeu kümtsü axiné ke, eno akithipu lo sawu chemo keu xiné acheni.

¹⁸ Ningu no ithi akeu no khukhumu Alhou nuli shiluve kemi ye axiné shiauve chemoe; Timi khuu no Alhou nuli shiluvea keno tipaqo ye süsho pe qhive cheni, eno küsaküghau hu ye panongu shipüsa müla nani.

¹⁹ Ningu ye Alhou nuliqo, eno ayeghiqha kümtsü küsaküghau ghaküsü qholo ani kepi ningu no ithi ani.

²⁰ Ningu no itaghi ithi akeu ye Alhou Nu ye ighivea eno vethakulu pesü ningu tsüvae, tishianguno ningu ye khuu no kuchou keno ithilu peniye ke. Eno ningu ye pa Nu Jisü Khristo khuu kuchou keno pa gholo xü kimepe keu vechewo pa lolo ani. Pa ye kuchou Lhou eno lhokta küxü ke.

²¹ Kimiye chekemi anuliqo, thime khipaqo no Alhou theli lo nongu mlo lo ngo luvi keno tipaqo lau putosü pe achelo.