1 John 4 - Sümi Tiqhelimi Bible

Alhou no Timishi Shive Keu lo Milive Keu

¹ Kimiye chekemi shompamiqo, aghungu kümtsü pülü kevilo, ikemu aghunguqo hu ye Alhou lau no ighi keu keo mokeno peju lo, kughengu kichileu tungkupumiqo kutomo ayeghiqha lo ipeghivae.

² Nongu no hitoi Alhou Ghungu kimchilu nani: Alhou lau no ighi keu ghungu kümtsü Jisü Khristo ye ashi shi no ighi kepi ikhilu cheni,

³ ikemu Jisü Khristo ikhilu chemo kemi kümtsü Alhou lau no ighi keu ghungu kumoe. Hipau ye Khristo lachile chekeu ghungu ke, tiye khikhi ighini cheni ipi nongu no chiluvae eno itehi ghí ayeghiqha lo auve ake.

⁴ Kimiye chekemi anuliqo, nongu ye Alhou lau no ighike eno kichileu tungkupumiqo theqhiluvea ke, kughengu nongu lolo akeu ye ayeghiqha lo küau nguno akijeu ke.

⁵ Panongu ye ayeghiqha lono ighike eno tighenguno ayeghiqha kükümsü kiqi lono pi cheni, eno ayeghiqha no panongu tsa ini acheni ke.

⁶ Ningu ye Alhou lau no ighike, eno khukhumu Alhou ithi kemi ye ningu tsa ini acheni; ikemu khukhumu Alhou lau no ighimo kemi ye ningu tsa ini chemoe. Hitoi ningu ye kuchou Ghungu eno kichileu ghungu kimchilu cheni.

Alhou’w Kikimiye eno Ninguw Kikimiye

⁷ Kimiye chekemi shompamiqo, ningu lakhi no lakhi kimiye kileni nolo, kughengu kikimiye ye Alhou lau no ighi cheni. Khunoqo no kimiye cheni keno panongu ye Alhou lau no ighike eno Alhou ithi akemi ke.

⁸ Khunoqo no kimiye chemo keno panongu ye Alhou mthae, kughengu Alhou ye kimiyekiniu ke.

⁹ Alhou no hitoi paw kikimiye ningu lau pìye ke: Pa no pa Nu lakhi likhi akeu pesü ayeghi lo puwu ke, tishianguno ningu pelo pa vechewo xülu peniye ke.

¹⁰ Kikimiye ye hipau ke: ningu no Alhou kimiye ke kumoe, ikemu pa no ningu kimiye eno ningu xinéqo ghenguno aghakishiu shi pa Nu puwu ke.

¹¹ Kimiye chekemi shompamiqo, Alhou no shishe ningu kimiye ke ghenguno ningu ghí lakhi no lakhi kimiye moayesae.

¹² Timi khuu nomu khilemu Alhou ithumla aphie; ikemu ningu no lakhi no lakhi kimiye aye, Alhou no nilo lo xüani eno paw kikimiye ye ningu vechewo kupukülai shilu anike.

¹³ Ningu no pa lolo xü eno pa no ningu lolo xü akeu ningu no hitoi ithi cheni: Pa no pa Ghungu pesü ningu tsüvae.

¹⁴ Eno ningu no ithulu eno thopi shi achekeu ye Apù no pa Nu pelo ayeghiqha Xakuluu shipe niye puwu ke.

¹⁵ Tsalá khukhumu Jisü ye Alhou Nu kepi ikhilu aye, Alhou no panongu lolo xü cheni eno panongu no Alhou lolo xü acheni.

¹⁶ Ike tighenguno ningu no ithi no Alhou’w kikimiye ningu ghenguno akeu shou pükhü acheni. Alhou ye kimiyekiniu ke. Khukhumu kikimiye lo xü keu ye Alhou gholo xü cheni, eno Alhou no panongu gholo xü acheni.

¹⁷ Ningu pelo küghakütha tsalà lo pülüqhiyilu penike ghenguno ningu gholo kikimiye ye hitoi kupukülailu cheni: Hipau yeghi lo ningu ye Jisü toi acheni ke.

¹⁸ Kikimiye lo akümsa kühae. Ikemu viwotolu keu kikimiye ye akümsa hapheve cheni, kughengu akümsa ye aghime tsü chekeu ke. Timi khuu no msà cheni keno pa ye kikimiye lono kupukülai mphie.

¹⁹ Ningu ye pa no atüghishi ningu kimiye keu ghenguno kimiye cheni.

²⁰ Khukhumu Alhou kimiye cheni ipi pükha cheni püzü athiküzümi momu achelimi lakhi mithi aye tiye kimkimi lakhi ke. Kughengu khukhumu athiküzümi eno achelimi, khikhi panongu no ithulu cheni keno, kimiyemo kemi ye Alhou khuu panongu no ithulu mphi keno, kimiye mülae.

²¹ Eno pa no azakütsü hipau ningu tsüvae: Khukhumu Alhou kimiye chekemi ye panongu thiküzümi eno achelimi ghí kimiye moayesae.