1 John 3 - Sümi Tiqhelimi Bible

¹ Ningu pelo Alhou nuliqo ipi kulù pe moayesa keu ghenguno Apù no kiutoi kikimiye kijè eno kupukuno shi ningu shou tsü keno julo! Eno kuchou no ningu ye tike! Ayeghiqha no ningu mtha keu kiqi ye panongu no pa mtha keu ghenguno ke.

² Kimiye chekemi shompamiqo, itehi ningu ye Alhou nuliqo ke, eno ningu ye kiu shive nani keno tipau pephe-piye mphie. Ikemu kughou Khristo ipeghini keno ningu ye pa toive nani kepi ningu no ithi ani, kughengu pa ye kiutoi keno ningu no ithulu nani.

³ Pa ye akimthe kehu pa shou lajupu qhi kemi kümtsü panongu likhi panongu shikimtheve cheni.

⁴ Axiné shi chekemi kümtsü ayeza hebide ani; kuchou lo ye, axiné ye ayeza küha ke.

⁵ Ikemu nongu no ithi akeu toi pa ye ningu xinéqo ikhipe wuve nike ghenguno ipeghi ke. Eno pa lolo ye axiné küha ke.

⁶ Pa gholo xüluve kemi ye axiné shiauve chemoe. Tamo no axiné shi ache kemi ye khunomu pa ithulu ke kumo no pa mtha aphie.

⁷ Kimiye chekemi anuliqo, khuu pelomu nongu saküghüzü pe kevilo. Khukhumu kiu achipi keno tipau shi chekemi ye amikucho ke, kughengu pa ye amikucho ke.

⁸ Khukhumu kiu no axiné keno tipau shi chekemi ye tüghamiw ke, kughengu tüghami ye abothu lonomu axiné shisü chephi ke. Alhou Nu no ipeghi keu kiqi ye tüghami kümlà kütsakungo nikeu ghenguno ke.

⁹ Khukhumu Alhou lau no punú kitheve kemi ye axiné shiauve chemoe, kughengu Alhou tsa no pano lolo acheni ke; panongu ye axiné shiauve mülae, kughengu panongu ye Alhou lau no punú kitheluvea ke.

¹⁰ Khunoqo no Alhou nuliqo eno khunoqo no tüghami nuliqo keno ningu ye hipau lono ithive cheni: Khukhumu kiu no achipi keno tipau shimo kemi ye Alhou nuli kumoe, momu khukhumu panongu thiküzümi eno achelimi kimiyemo kemi ye Alhou nuli kumoe.

Kikimiye eno Akimithi Ghili

¹¹ Kughengu nongu no abothu lono akükütsütsa chilu keu ye hipau ke: Ningu ye lakhi no lakhi kimiyekilé moayesae.

¹² Cain toi shi kevilo, pa ye küsaküghau laumi lakhi shi no pa thiküzüu ghiqhive ke. Eno pa ye kushiye pa thiküzüu ghiqhive kea? Kughengu pa likhi pa kümlà no küsakügha ke eno pa thiküzüu kümlà ye amikucho ke.

¹³ I thiküzümi eno I chelimiqo, ayeghiqha no nongu mithi aye akichiqhi kevilo.

¹⁴ Ningu no ithi akeu no ningu ye akithí vechesü aküxü lo ipeghi luvea, kughengu ningu ye lakhi no lakhi kimiye cheni. Khuno no kimiye chemo keno akithí lo achephi ke.

¹⁵ Khukhumu athiküzümi momu achelimi mithi chekemi ye ghikiqhimi lakhi ke, eno ghikiqhimi lakhimu lhokta küxü pano lolo ngo chemo kepi nongu no ithi ani.

¹⁶ Kikimiye ye kiu keno ningu no hitoi ke ipi ithi acheni: Jisü Khristo no ningu ghenguno pa küxü tsüve ke. Eno ningu ye athiküzümi eno achelimiqo ghenguno ningu küxü tsü moayesa ke.

¹⁷ Tsalá khuala no ashi lo küakini aghí eno athiküzümi momu achelimi lakhi no avehupu shi akeu ithulu anamu panongu shou kimiye keu küha aye, kíshi no Alhou’w kikimiye timi tipau lolo aghílu nani kea?

¹⁸ Kimiye chekemi anuliqo, ningu atsa momu atsapi lo likhi no kimiyemoni ikemu akümlà eno kuchou lono kikimiye pepheni nolo.

¹⁹ Ningu ye kuchou laumi eno ningu mlo ye kíshi pa zülo akulhoqhilu cheni keno ningu no hitoi ithi acheni:

²⁰ Tsalá ningu mlo no ningu kiléqhi aye, Alhou ye ningu mlo nguno akijeu kepi ningu no ithi cheni, eno pa no kümtsü ithi acheni.

²¹ Kimiye chekemi shompamiqo, tsalá ningu mlo no ningu kiléqhimo aye, ningu ye Alhou zülo pülükibe shilu nani

²² eno ningu no kiu-kiumu khu kelo pa lau no ithulu nani, kughengu ningu no pa zakütsüqo pelu cheni eno kiu no pa pulou keno tishi cheni ke.

²³ Eno pa zakütsü ye hipau ke: pa Nu Jisü Khristo je lo pülübe nikeu, eno pa no azah tsüve keu toi lakhi no lakhi kimiye nikeu ke.

²⁴ Timi khuno no Alhou zakütsüqo pape cheni keno panongu ye Alhou lolo xü acheni eno Alhou no panongu lolo xü acheni. Eno pa ye ningu lolo xüani kepi ningu no hitoi ithi cheni: Ningu ye pa no Aghungu ningu tsü keu vechewo ithi cheni.