1 John 2 - Sümi Tiqhelimi Bible

¹ I no kimiye chekemi anuliqo, I no nongu lau hipau yè akeu ye nongu pelo axiné shipemo niye ke. Ikemu tsalá khukhumu axiné shi aye, ningu ye Apù gholo Shikumtokütsüu lakhi ani—tiye Jisü Khristo, Amikuchou Lakhi hu ke.

² Pa ye ningu xinéqo ghenguno aghakishiu ke, eno ningu ghengu likhi no kumoe ikemu ayeghiqha kümtsü xinéqo ghenguno ghí ke.

Küpülümi Aküsàmiqo Ghenguno Kikimiye eno Akimithipu

³ Ningu no pa zakütsüqo pelu aye ningu ye pa ithivea kepi mütsüqheilu anike.

⁴ Khukhumu, “Ni ye pa ithi ani,” ipi no pa no azah tsü keqo shimo aye pa ye akimkimi ke, eno timi tipau lolo kuchou kühae.

⁵ Ikemu khukhumu pa tsa ghokulu shi aye, Alhou kimiye chekeu ye kuchou no panongu vechewo shikupuvae. Hitoi shikeu vechewo ningu ye pa lolo ani kepi ithi cheni:

⁶ Khukhumu pa ye Alhou gholo xüani kepi pükha aghí aye Jisü no xü keu toi xü moayesae.

⁷ Kimiye chekemi shompamiqo, ni ye nongu lau azakütsü akithé yè anike kumoe ikemu aqau hu ke, tiye khikhi abothu lonomu nongu no ache keno tipau ke. Azakütsü aqau hipau ye nongu no akükütsütsa chiluve keu ke.

⁸ Tishimu ni ye nongu lau azakütsü akithé lakhi yè anie; tipauw kuchou ye pa lolo eno O lolo no ithulu cheni, kughengu àküzǘ ye wove ani eno aküvü kuchou hu ye vüipeghivae.

⁹ Khukhumu aküvü lo ani kepi pükha püzü athiküzümi momu achelimi lakhi mithi aye àküzǘ lo aphie.

¹⁰ Khukhumu panongu thiküzümi eno achelimi kimiye aye aküvü lo xü anie, eno tiye pano lolo panongu pelo küpüxalu pe kepu kiumu kühae.

¹¹ Ikemu khukhumu athiküzümi momu achelimi lakhi mithi aye àküzǘ lo ani eno àküzǘ lo xü anike. Panongu ye khilau wucheni keno mtha ke, kughengu àküzǘ no panongu nhethi kighicheve tsü ake.

Yè akeu Kiqiqo

¹² Kimiye chekemi anuliqo, I no nongu lau yè akeu ye pa je lono nongu xinéqo qhivetsü ake ghenguno ke.

¹³ Apùnoqo, I no nongu lau yè akeu ye nongu no abothu lono khuu acheghi keno pa ithi akeu ghenguno ke. Lhothemiqo, I no nongu lau yè akeu ye nongu no küsaküghau theqhiluve keu ghenguno ke.

¹⁴ Kimiye chekemi anuliqo, I no nongu lau yè akeu ye nongu no Apù ithi akeu ghenguno ke. Apùnoqo, I no nongu lau yè akeu ye nongu no abothu lono khuu acheghi keno pa ithi akeu ghenguno ke. Lhothemiqo, I no nongu lau yè akeu ye nongu no akumto shi, eno Alhou tsa no nongu lolo xü acheni, eno nongu no küsaküghau theqhiluve ke ghenguno ke.

Ayeghiqha Kimiyemo Nikeu

¹⁵ Ayeghiqha momu ayeghiqha lo akeu thimeqo kimiye kevilo. Tsalá khuala no ayeghiqha kimiye cheghi aye, panongu lolo Apù kimiye nikeu kühae.

¹⁶ Kughengu ayeghiqha lo thime kümtsü—ashi-aji no mine chekeu, anhethi no mine chekeu, eno aküxü qheküza—hipaqo ye Apù lau no ighi chemoe ikemu ayeghiqha lau no ighi cheni.

¹⁷ Ayeghiqha eno tipau lo mine chekeu ye wove nani, ikemu khukhumu Alhou pulou shikeu ye alhokuthu xüache nani.

Anu Mili Akeu Ghenguno Pikichikeqo

¹⁸ Kimiye chekemi anuliqo, hiye ashekhau tüqhüdo ke; eno Khristo lakichilemi chekeu nongu no chiluve keu toi, itehi ghí Khristo lakichilemi kutomo ighivae. Hitoi keu no ashekhau tüqhüdo kepi ningu no ithi nani ke.

¹⁹ Panongu ye ningu lau no ipeve ke, ikemu kuchou lo ye panongu ye ningu laumi kumo ke. Kughengu panongu no nilaumi shi aghí ke aye, panongu ye ningu gholo ngo aghíni cheke; ikemu panongu no wuve keu ye panongu lakhimu ningu laumi kumo kepi pìyevae.

²⁰ Ikemu nongu ye Akimtheu Lakhi hu no nukishe püani, eno nongu kümtsü no kuchou ithi ani.

²¹ Ni ye nongu no kuchou mtha ke ghenguno nongu lau yè anike kumoe, ikemu nongu no ti ithi akeu ghenguno eno kuchou lau no akimiki lakhimu ighi chemo keu ghenguno ke.

²² Khuu no akimikiu kea? Tiye khukhumu Jisü ye Khristo kepi milive akemi ke. Hitoi kemi timi ye Khristo lakichilemi ke—Apù eno Anu milive akemi ke.

²³ Khukhumu Anu milive aye pano lolo Apù kühae; khukhumu anu ikhilu aye Apù ghí pano lolo anie.

²⁴ Nongu ghengu ye, nongu no abothu lono kiu chilu keno tipau nongu lolo aní keu jukuto alo. Tishilu aye, nongu ghí Anu eno Apù gholo anani.

²⁵ Eno pa no ningu lau piqhipüa keu ye hike—tiye lhokta küxü ke.

²⁶ I no nongu lau thime hipaqo yè akeu ye khunoqo no nongu saküghüzü niye pükapütsa ani keno panongu ghili yè anike.

²⁷ Nongu ghengu ye, nongu no pa lau no nukishe keu ithulu keu nongu lolo anike, eno nongu ye nongu shika penike khumu avehupu shi amoe. Ikemu pa no nukishe keu no thime kümtsü nongu shika cheni eno nukishe keu tipau ye kuchou ke, kichileu kumoe—nongu shikave keu toi, pa gholo achelo.

Alhou Nuliqo eno Axiné

²⁸ Eno itehi ye, kimiye chekemi anuliqo, pa gholo cheche lo, tishianguno kughou pa no ipeghi keno ningu pelo pa zülo kujovemo no pülüqhiyilu peniye ke.

²⁹ Tsalá nongu no pa ye amikucho kepi ithi aghí aye, khukhumu kiu no achipi keno tipau shi chekemi ye pa vechewo punuluvea kepi nongu no ithi ani.