Hebreo 1 - Sug Begu Ne Keligenan

Sung Minsahi ned Diwata pebiyan ri seg Bata'en

¹ Seng melaun gaid neg higayun bu' mikelinelin nek pebiyan nud diin, migasuy sud Diwata tu se nga gepu'an ta pebiyan se ngak propeta.

² Ma'ad se ketapusan ne nga gendaw keni, migasuy giin senita pebiyan ri seg Bata'en nek tinendu' neng menenunud se dlaun ne ngag betang; bu' pebiyan ri seniin, binaal ned Diwata suk tibuuk ne dlangit bu' dlupa'.

³ Diin Seniin, me'ita' su kesanag ned Diwata. Bu' diin gupiya Seniin sug betasan ned Diwata. Giining migawid sek tibuuk ne dlangit bu' dlupa' pebiyan ma'ad ri seng mekegega'em nek talu'en. Bu' peketubusen limpiyuway su ngak sala' ne nga getaw, migingkud giin ritu se dlangit tu sed dapit dlintu ned Diwata, su Dlabi Ge'eman.

Sug Bata' ned Diwata Labaw pa se ngag Anghel

⁴ Sug Bata' labaw pa ri se ngag anghel. Maa' run rema, binegayan giin ned Diwata ne ngalan ne dlabaw pa nek penggelal sinangkali' se nga ngalan ne ngag anghel.

⁵ Ay nda'irun gairig anghelen nek tinelu'an ned Diwata ne, “Dya'a Bata'u; bu' nandaw mbaalu ne Gama' mu.” Bu' nda' pektalu' sud Diwata se isan ta' ne ngag anghel, “Gaku' mbaal ne Gama'en, bu' giin mbaal neg Bata'u.”

⁶ Ma'ad sek pawit na ned Diwata su guna neg Bata'en rini seg benwa, miktalu' giin, “Kina'enlan meksimba ri seniin su dlaun ne ngag anghel ned Diwata.”

⁷ Giin nini suk tinalu' ned Diwata metendeng se ngag anghel, “Binaal ned Diwata su ngag anghelen maa' ne nga genus, bu' su ngak sesugu'enen maa' ne nga dliga' ne gapuy.”

⁸ Ma'ad metendeng ri seg Bata'en, laungen, “Suk pedlegeri'an mu, Uu Diwata nda' gairi gekteben! Bu' suk pedlegeseg mu tu se ngak sakup mu metareng.

⁹ Liyagan mu su ketareng bu' ginemetan mu sung melaat. Aas sud Diwata, ned Diwata mu, mikpili' seni'a, binegayaan'a ne dleliyag bu' pekpesiddengeg ne dlabaw pa kampuun seg binegain tu se ngak sementaun mu.”

¹⁰ Miktalu' rema giin, “Dya'a, Ginu'u, se getaran sung migbaal ri seg benwa, bu' se gegulingen ne nga gemeg mu, binaal mu su nga dlangit.

¹¹ Me'alep su dlaun nilan, ma'ad mekpebilin'a; meranul su dlaun nilan maa' nek penepeten.

¹² Lukuten mu ilan maa' ne dlambung, bu' metelesan ilan maa' nek penepeten. Ma'ad dya'a giin da gusay bu' su ketubu' mu genda'i gekteben.”

¹³ Sud Diwata genda' pektalu' tu se ngag anghelen: “Gingkud'a rini rapit dlintuu tampan mbetang'u su nga kuntra mu maa' ne gindegan ne nga geksud mu.”

¹⁴ Gena' ba su dlaun ne ngag anghel ne nga gispiritu ma'aray, nek sinugu' ned Diwata neng migabang tu se nga getaw ned dumawat se keluwasan?