Moeklesia 7 - BIBELE

Bohlale

¹ Bitso le letle le feta menkwane ka ho rateha, tsatsi la lefu le molemo ho feta la tswalo.

² Ho molemo ho etela lapa le aparetswe ke bofifi, ho ena le ho etela lapa la moketeko, hoba lefu ke pheletso ya motho ka mong; ba phelang hona ba ho nahane hantle.

³ Maswabi a molemo ho feta ditsheho; pelo e ka thaba fahleho se ntse se swabile.

⁴ Pelo tsa bahlalefi di lapeng la bofifi, pelo tsa dithoto di lapeng la menyanyako.

⁵ Ho molemo ho mamela kgalemo ya mohlalefi, ho ena le ho mamela pina ya dithoto.

⁶ Meutlwa ha e beseletsa pitsa e a qhoma; tsheho la dithoto le lona le jwalo. Hona le hona ke lefeela la mafeela.

⁷ Mohlalefi wa mohatelli o a thotofala, tjotjo yona e senya pelo ya motho.

⁸ Pheletso ya taba e molemo ho feta qaleho ya yona, momamelli o molemo ho feta moikakasi.

⁹ O se itlwaetse ho halefa kapele, thoto di kwetlile kgalefo ka difubeng tsa tsona.

¹⁰ Se ke wa re: “Ke hobaneng ha tshiu tsa kgale di bile molemo ho feta tsa kajeno?” Ho botsa potso ena ke ho hloka bohlale.

¹¹ Bohlale bo molemo jwaloka lefa, bo atlehisa batho ba ntseng ba phela.

¹² Bohlale bo a sireletsa, tjhelete e a sireletsa; molemo o moholo wa tsebo ke ona: Ba ruileng, bohlale bo ba nea bophelo.

¹³ Ako tadime mesebetsi ya Modimo: Se kgopamisitsweng ke Modimo, se ka kgopamollwa ke mang?

¹⁴ Mohla tsatsi la thabo nyakalla le wena, mohla tsatsi la mahlonoko ako hopole sena: Matsatsi ana, bobedi, a entswe ke Modimo; kahoo tsa kamoso motho a ke ke a di tseba.

¹⁵ Bophelong bona ba ka ba lefeela ke bone dintho tsena: Motho o a shwa leha a ntsa lokile, motho o a tsofala leha a ntsa le kgopo.

¹⁶ Se itokafatse ho feta tekanyo, kapa wa itlhalefisa ho feta tekanyo; ebe o ipolaelang ka ho etsa jwalo?

¹⁷ Se be kgopo ho tlola moedi, le teng o se ke wa iketsa sethoto; o tla bo shwellang pele ho nako ya hao?

¹⁸ Molemo ke ho itshwarella ka polelo ya pele, le ya bobedi o se ka e nyahlatsa; ya tshabang Modimo o phema tsietsi tsena bobedi!

¹⁹ Bohlale bo matlafatsa motho, motho wa mohlalefi, a fete babusi ba motse ba le leshome.

²⁰ Ha ho ya lokileng mona lefatsheng, ya etsang ho molemo, ya sa etseng sebe.

²¹ Se mamele dipuo tsohle tsa batho, esere wa utlwa mohlanka wa hao a o rohaka.

²² Le wena ka pelong o tseba hantle, ke ka makgetlo ba bang le wena o ba rohaka.

²³ Ka bohlale, tsena tsohle ke di lekile, ka re: “Le nna ke sa tla be ke hlalefe!” Empa bohlale ke sitwa ho bo fihlela.

²⁴ Seo se hole, se tebileng hakaalo, ebe ya ka se sibollang ke mang?

²⁵ Ka pelong ka labalabela ho batla tsebo, ho fuputsa le ho sibolla bohlale, ho fumana mabaka a boleng ba dintho; ho tseba ha bokgopo e le bothoto, bothoto bona e le bohlanya.

²⁶ Mosadi ya tshwasang ka maqiti a hae, eo pelo ya hae e tshwanang le sefi, matsoho a hae a kang mahlaahlela, ka fumana a tshabeha ho feta le lefu. Ya kgahlisang Modimo o tla phonyoha atleng tsa hae, athe moetsadibe yena o tla tshwaswa.

²⁷ “Ako bone mona,” ho rialo Moruti, “seo ke se sibolotseng ke sena: “Ha ke ntse ke nahana taba ka nngwe, ho fumana mabaka a boleng ba dintho;

²⁸ ha ke ntse ke fuputsa, ke sa fumane letho, ka fumana monna wa banna ho ba sekete, hara basadi teng ha ke a fumana le ya mong!

²⁹ Seo ke se fumaneng feela ke sena: Modimo o bopile motho a lokile, batho ba iqapetse mamenemene a mangata.”