Moeklesia 10 - BIBELE

¹ Jwalokaha ntsintsi tse shweleng di nkgisa menkwane, bothotwana le bona bo senya bohlale le botumo.

² Pelo ya ya bohlale e sekamela ho lokeng, pelo ya ya sethoto e sekamela bokgopong.

³ Sethoto se tsamaya tseleng se se na kelello, bohle se ba bolella hore dithoto ke bona.

⁴ Haeba kgalefo ya mmusi e o tlokela, tulo tsa hao o se ka sutha ho tsona, hoba boikokobetso bo fedisa diphoso tse kgolo.

⁵ Ho na le bokgopo boo ke bo boneng mona lefatsheng, phoso eo sesosa sa yona e leng mmusi:

⁶ Thoto di bewa ditulong tse phahameng haholo, barui bona ba bewe ho tse tlasetlase.

⁷ Ke bone makgoba a kaletse dipere, mahosana wona a tasola seka makgoba.

⁸ Ya tjhekang lemena a ka nna wela ho lona, ya heletsang lerako a ka nna longwa ke noha.

⁹ Ya thuang majwe a ka nna pitlwa ke wona, ya rathang patsi a ka nna hlajwa ke phatsa.

¹⁰ Ha selepe se le nthithi, se sa leotswe, eka kgona moratha-patsi a be sefea; athe setsebi se thuswa ke bohlale ba sona.

¹¹ Ha noha e ka loma pele e khwefuwa, mokhwefi wa dinoha a ke ke a putswa.

¹² Polelo tsa ya bohlale di a kgahleha, athe tsa sethoto tsona di a se timetsa;

¹³ ha se bua se ye se qale ka ho phorohla, se qetelle ka ho pota sa motho wa mapokaetsi.

¹⁴ Sethoto ha se hehla ha se kgaotse! Motho a ke ke a tseba tse tla etsahala; tse tla hlaha hoba a fete di ka senolwa ke mang?

¹⁵ Thoto se tepeletswa ke mosebetsi wa sona, le tsela e yang motseng ha se e tsebe.

¹⁶ Ho madimabe naha e buswang ke kgosi ya moshanyana, eo mahosana a vona a ketekang e sa le hoseng!

¹⁷ Ho lehlohonolo naha e buswang ke kgosi e tswalehileng, eo mahosana a yona a ketekang ka nako ya teng, a jelang ho matlafala, e seng hore a tahwe.

¹⁸ Bokgoba bo etsa hore maballo a ntlo a kobehe, ha matsoho a sa tshware, ntlo eo e ye e nele.

¹⁹ Mokete o etsetswa boithabiso, veine yona e natefisa bophelo, empa ka tjhelete o ka fumana tsohle.

²⁰ Se rohake kgosi, leha e le ka mehopolong ya hao, kapa morui ha o le ka kamoreng ya ho robala, hoba nonyana e fofang e ka utlwa polelo tsa hao, tlhatsinyane ha e rura ya tsamaya e di bolela.