Jobo 9 - BIBELE

Matla a Modimo le bofokodi ba motho

¹ Jobo a araba, a re:

² “Ruri ke a tseba, ho fela ho le jwalo; motho a ka loka jwang mahlong a Modimo?

³ Haeba motho a ka phea kgang le Modimo, Modimo a ka mmotsa potso di le sekete, motho a pallwa ke ho araba leha e le nngwe.

⁴ Modimo o bohlale, o bile o matla: Ke mang ya ka mo hanyetsang, yaba o a atleha?

⁵ Hanghang o suthisa dithaba, ha a halefile a di phethole.

⁶ O sisinya lefatshe madulong a lona, ditshiya tsa lona di be di reketle.

⁷ O laela letsatsi, le se ke le tjhaba, a ba fifatse kganya ya dinaledi.

⁸ Ke yena ya sarolotseng mahodimo, a a sarolla a le mong, a tsamaya le hodima maqhubu, maqhubu a Lewatle;

⁹ a etsa Bere e Kgolo, le Makolobe, le Selemela, a etsa le molala ka borwa ho lehodimo.

¹⁰ O etsa dikgolo tse fetang tlhalohanyo ya motho, o etsa dimakatso tse ke keng tsa balwa.

¹¹ “Ha a feta pela ka ha nke be ke mmone, ha a itsamaela le teng ha ke lemohe.

¹² Ha a inkela, a ka thibelwa ke mang? Ke mang ya ka reng ho yena: ‘Jwale o etsa jwang?’

¹³ Modimo ha a halefile eba o halefile, mahlahana a Rahaba a tjapaletse maotong a hae.

¹⁴ “Jwale nna ekaba nka mo arabisa jwang? Mantswe a dikgang ke a kgethe jwang?

¹⁵ Leha ke se na molato ke ne nke ke ka mo araba, haese feela ho kopa mohau ho Moahlodi wa ka.

¹⁶ Leha nka mo isa kgotla, yaba o a tla, ha ke dumele a ka ntshekehela tsebe.

¹⁷ A ka mpidila ka sefefo sa kganyapa, a nkekeletsa maqeba ho se lebaka.

¹⁸ A ke ke a ntumella ka phefumoloha, a ka ntshithabetsa ka tse bohloko.

¹⁹ Haeba ho uwa ka matla, Yena ke seqhobane! Haeba ho uwa ka toka, yena o tla qoswa ke mang?

²⁰ Leha eba ke se molato, ke tsuwa ke molomo wa ka, leha eba ke se na kodi, wona o tla nthwesa molato.

²¹ “Le hoja ke se na kodi, ke se ke itenne; ke nyedisa bophelo ba ka, ke a bo nyatsa.

²² Ke ditshwantshwang feela; ke ka hona ke reng: ‘O timetsa ba lokileng le ba kgopo.’

²³ Ha kotlo e bolaya ka ho tsometsa, O tla tsheha ha ba otlwa ba se molato.

²⁴ Lefatshe le matsohong a ba kgopo, o kwahela baahlodi ba lona ka lesira mahlong; haeba e se yena, ebe jwale ke mang?

²⁵ “Tshiu tsa ka di lebelo ho feta semathi, di baleha di eso bone molemo;

²⁶ di fefoha jwaloka sekepe sa lehlaka, jwaloka ntsu ha e ubella phofu ya yona.

²⁷ Ha nka re: ‘Ke tla lebala pelaelo tsa ka,’ fahleho sa ka se tla ela, ke bobothehe.

²⁸ Tlokotsi tsa ka tsohle ke a di tshaba, ke a tseba o ke ke wa re ha ke molato.

²⁹ Kaha ke fumanwe ke le molato, ke hobaneng ha ke sebeletsa lelea?

³⁰ Leha eba nka itlhatswa ka lehlwa, ka sesepa matsoho a ka ka a hatlela,

³¹ wena o tla nkakgela ka tebetebeng, aparo tsa ka le tsona di be di nnyonye!

³² “Modimo hase motho jwaloka nna, ka hona nke ke ka ba ka mo araba, fahleho bobedi tsa thulana re le ka kgotla.

³³ Hoja pakeng tsa rona mmoelanyi o teng, a sebedisa matla a hae hodima rona;

³⁴ thupa Modimo e ke e shape fatshe, kgalefo ya hae e se ke ya ntshosa;

³⁵ ke bue ka bolokolohi ke se ne tshabo, athe hona jwale nna ke tletswe ke tshabo.”