Jobo 8 - BIBELE

Biledade o re Jobo o loketswe ke kotlo

¹ Jwale Biledade ya tswang Shua a araba, a re:

² “O tla bua ntho tsee ho fihlela neng? Polelo tsa hao di ka moya wa sefefo!

³ Na Modimo a ka sokamisa kahlolo, Ya Matla wohle a sokamisa ho loka?

⁴ Haeba bara ba hao ba mo sitetswe, o ba otlile ho ya ka ho sitwa ha bona.

⁵ Haeba o ka fela wa batla Modimo, wa ithapella ho Ya Matla wohle;

⁶ haeba o hlwekile, mme o lokile, ruri le yena o tla o hlokomela, lapa la hao a le tsose e le sesupo sa ho loka ha hao.

⁷ Maruo a pele e ne le dinyane, a morao wona e tla ba boiyane.”

Ya furallang Modimo o tla timela

⁸ “Ako fuputse ho meloko ya pele, o batlisise ditsebo tsa bo-ntata yona.

⁹ Rona ba maobane re hloka tsebo; matsatsi a rona ho lena lefatshe a ka moriti ha o falola.

¹⁰ Ba tla o jwetsa, ba o rupele, ba o kgokgothele bohlale ba bona.

¹¹ “Na lodi le ka mela ho se na mokgwabo, lehlaka la ata ho se na mohlaka?

¹² Ha le sa helwe le sa le letalana, le pona pele jwang bo omella.

¹³ Tsela tsa bohle ba lebalang Modimo di jwalo, letshepa la ya kgopo le fela jwalo;

¹⁴ tshepo ya hae e a thekesela, letshepa la hae le ka bolepo ba sekgo;

¹⁵ o itshetleha ka bona, bo hana ho tsitsa, o itshwarella ka bona, ha bo tshwarehe.

¹⁶ O ka fate se tlokomang ha tsatsi le tjhabile, seo makala a sona a thathallang le tshimo yohle.

¹⁷ Metso ya sona e rarahana hara qubu ya majwe, e itshwarella hodima matlapa.

¹⁸ Ha se fotholwa bakeng seo, baka seo se tla latola, se re: ‘Nna ha ke o tsebe!’

¹⁹ Bophelo ba sona bo fela jwalo, mela tse ding di mela hape mobung oo.

²⁰ “Modimo a ke ke a lahla ya se nang molato, kapa a thusa ba etsang bokgopo;

²¹ o tla boela a etsa hore o tshehe, molomo wa hao o howe ka thabo.

²² Ba o hloileng ba tla apeswa dihlong, malapa a ba kgopo a nyamelle ruri.”