Jobo 6 - BIBELE

Jobo o araba Elefase

¹ Empa Jobo a araba, a re:

² “Ao! hoja ho komakoma ha ka ho ka lekanngwa, tsietsi tsa ka tsa bewa sekaleng,

³ di ne di tla feta hlabathe la lewatle ka boima; ke ka hona ke ileng ka phatloha feela.

⁴ Metsu ya Ya Matla wohle e ntlhabile, mahloko a yona a tjhatjhametsa le moya wa ka, matshabeho a Modimo a nteetse theko!

⁵ Na tonki e ka lla kgulo le le lengata? kapa pholo ya bohla e ntse e fula?

⁶ Dijo tse bosula di ka jewa ho se letswai? Na mothwebe o mosweu wona o a latsweha?

⁷ Dijo tse jwalo ha ke di lakatse, di tshwana le tse nqhuqhumisang mala!

⁸ “Hoja kopo ya ka e ne ka ananelwa, Modimo a nnea seo ke se labalabelang;

⁹ Modimo a kgahlwa ke ho mphetshela, a nkisa letsoho, a ntimetsa.

¹⁰ Ke ne ke tla thaba, ke tshedisehe, ke tsebe ho mamella ditlokotsi tsa ka, hoba polelo tsa Ya Halalelang ha ke a di hanyetsa.

¹¹ “Ke sa na le matla afe, a ho nnea letshepa? Ke tla fella kae, ha ke qenehetse ho phela?

¹² Na mmele wa ka o thata jwaloka lejwe? Kapa nama ya ka e entswe ka lethose?

¹³ Matla o ho ithusa a mpheletse, sehlaha sa bohlale se setse feela.”

Jobo o swabiswa ke polelo tsa metswalle

¹⁴ “Ya nyahameng pelo eka kgona a hauhelwe, ke metswalle, leha eba a sa tshabe Ya Matla wohle.

¹⁵ Bana beso ha ba tshepahale sa melatswana, ba ka melatswana e tlala, e ba e feta,

¹⁶ e ba maduke ke qhoqhwaane ho qhibidiha, e patehe ke lehlwa ho kgetheha.

¹⁷ Ha motjheso o fihla e a nyamela, ha tsatsi le ema a pshele ruri.

¹⁸ Baeti ba kgeloha tsela, ba batla metsi, ba ye lehwatateng, ba be ba timele.

¹⁹ Baeti ba tswang Tema ba batla metsi, bahwebi ba Sheba ba batla ka letshepa;

²⁰ ba tsielehile, leha ba ne ba tshepile, ba fihlile teng, jwale ba swabile.

²¹ Ho nna, le lona le ka melatswana eo: Le a bona ke wele ka phatla, lona le a ntshabella!

²² Na nkile ka re: ‘Mpheng hona le hane’? Kapa ‘Ntefelleng ka maruo a lona?’

²³ Kapa: ‘Nnamoleleng matsohong a dira tsa ka? Mpholoseng ho ba matla ho mpheta’?

²⁴ “Nthuteng, ke tla mamela ke didimetse, le ntlhalosetse na phoso ya ka e kae.

²⁵ Mantswe a nnete a matla hakaakang! Polelo tsa lona ekaba di supa eng?

²⁶ Ebe le rerile ho nyatsa polelo tsa ka, le re tsa ya tsherehaneng di ya le moya feela?

²⁷ Le kgutsanyana kgudu! le ka e rekisa, la tjhekela motswalle wa lona lemena.

²⁸ “Jwale dumelang, le ntadime sefahlamahlo: Taba di mahlong, shano la ka le tla itshupa.

²⁹ Ke a le kopa: Imameleng, phoso e se be teng; imameleng hape, esere ho loka ha ka ha thunthetswa.

³⁰ Ebe phoso e tswile lelemeng la ka? Na nka sitwa ho kgetha tse molemo ho tse kgopo?”