Jobo 5 - BIBELE

¹ “Meketsa, Jobo! O a arabelwa ke mang? Hara mangeloi o tla ipiletsa ho mang?

² Sethoto se bolawa ke ho komakoma ha sona, sehlohwane sona se bolawa ke mona.

³ Ke bone thoto se mela, methapo ya sona e nama; ha ntshi e panya, leaho la sona la newa thohako.

⁴ Bana ba sona ha ba a sireletswa ke motho, ba robokellwa kgotla, ba hloka manamolela;

⁵ kotulo ya sona e jewa ke ya lapileng a ituletse, a e honyolle leha e le kahara meutlwa, batupi bona ba nyoretswe leruo la sona.

⁶ Lerole hase lona mohlodi wa ditlokotsi, tsietsi ha di ke di ropoha di hlaha fatshe;

⁷ motho ditsietsi o tswalwa a di apere, seka tetema e qhomisetsa ditlhase hodimo.”

Elefase o re Jobo a ipiletse ho Modimo

⁸ “Hoja ke wena nka be ke ipiletsa ho Modimo, kapele ho Modimo ke ipeha ka taba ya ka;

⁹ yena o etsa dikgolo, mafeta-kutliwisiso-ya-motho, o etsa dimakatso, ntlhokapalo ke boiyane.

¹⁰ Lefatshe o le nesetsa pula, pula ya ditlwebelele, metsi a phutsalle, a tlale dithota kahohle;

¹¹ ba eisehang a ba hlwesetse hodima ditlhoro, ba bofifing bona a ba tshedise.

¹² O nyopisa merero, bo-ramasene ba e rerile, ba be ba hloke katleho;

¹³ ka maraba a bona o tshwasa bo-ramasene, maqheka a bona a fetoha lefeela.

¹⁴ Ba aparelwa ke lefifi tsatsi le ba tjhabetse, ere tadi e anyesa ba phothasele seka bosiu.

¹⁵ Modimo o namolela mafutsana puong tse hlabang, a a lopolle matsohong a ba dikgoka;

¹⁶ kahoo mafutsana a ruile letshepa, molomo wa bokgopo o a kwaleha, o didimale.”

Kgalemo ya Modimo e tlisa lehlohonolo

¹⁷ “Ho lehlohonolo eo Modimo a mo tshwayang phoso, kahoo se nyatse ha Ya Matla a o kgalema.

¹⁸ Modimo o a hlatha, a be a tlame leqeba; tsoho la hae le a otla, le bile le a fodisa;

¹⁹ o tla o phemisa diwa di o hlwele hodimo, ka makgetlokgetlo bobe bo ke ke ba o ama.

²⁰ Nakong ya sekoboto o tla o namolela lefung, nakong ya dintwa sabole a e thithibanye bohale.

²¹ O tla sireletswa puong tsa monyefodi, timelo o ke ke wa e tshaba ha e fihlile;

²² o tla tsheha timelo le sekoboto, batana tsa fatshe lena o ke ke be wa di tshaba.

²³ Majwe a ke ke a o sitisa ho lema masimo, batana tsa naha di tla phela ka kgotso le wena.

²⁴ O tla bona lapa la hao le phela ka kgotso, o fumane tsohle tsa hao di ntse di feletse.

²⁵ Bana ba hao o tla bona ba ngatafala, tloholo tsa hao di ata seka jwang naheng.

²⁶ O tla ya lebitleng lemo tsa hao di ngatafetse, jwaloka koro e yang seotlong e se butswitse.

²⁷ “Tsena di fupuditswe, ho fela ho dutse jwalo; di utlwe, o di tsebe, o di fole molemo.”