Jobo 41 - BIBELE

¹ “Na ka selope kganyapa o ka e tshwasa, kapa ka kgwele leleme la yona wa le tlama?

² Na o ka e kenya kgwathatha ka nkong? Kapa mohlaare wa yona wa o hlaba ka moutlwa?

³ Na e tla rapela hore o e rekolohele, kapa e bue ka bonolo, e nne e o qekise?

⁴ Na e tla etsa tumellano le wena, hore e be kgoba la hao kamehla yohle?

⁵ O tla e bapadisa sa ha o bapadisa nonyana, kapa o e holehele bananyana ba hao?

⁶ Na bahwebi ba heno ba tla e tsekisana ka theko, kapa ba e arolele bareki?

⁷ Na ka dikwebe tlalo la yona o ka le phunya, kapa ka tsenene hlooho ya yona o ka e hlaba?

⁸ Ako e ame ka letsoho la hao! Ntwa e tla ba ya kgumamela; o ke ke be wa hlola o pheta hape!

⁹ “Tshepo ya ho e hlola ke lefeelafeelane, motho ha a e bona pelo ya hae e a nyahama.

¹⁰ Ha ho na ya sebete se lekaneng ho e qholotsa; ebe jwale ke ofe ya ka thulanang le nna, Modimo?

¹¹ Ya ntsekisang molato ke ofe, ke tsebe ho mo lefela? Ditsohletsohle tlasa lehodimo ke tsa ka.

¹² “Ha nka ke ka tlohela ho bua ka ditho tsa kganyapa, ka matla a yona le bopeho se kgahlehang sa yona.

¹³ Bokantle ba tlalo la yona bo ka ebolwa ke mang? Ya ka atamelang ke mang, a e kenya tomo hanong?

¹⁴ Ya ka itetang sefuba ho e ahlamisa mehlaare ke mang? Meno a yona a dikwetsepe a a tshabeha!

¹⁵ Mokokotlo wa yona o kwahetswe ke makgekgebu, makgekgebu a momahaneng eka a manamisitswe ka boka;

¹⁶ a momahane haholo, moya o ke ke wa tswa pakeng tsa wona.

¹⁷ A kopantswe hathatathata, a momahane hoo a ke keng a arohanngwa.

¹⁸ Ha e thimola, ka nkong tsa yona ho tswa lesedi; mahlo a yona eka mahlasedi ha mafube a hlaha.

¹⁹ Malakabe a tlola ka molomong wa yona, tlhase di betseha seka motjhotjhonono.

²⁰ Mosi o foqoha ka nkong tsa yona, jwaloka mosi ha pitsa e mollong wa ditlhaka e bela.

²¹ Moya wa yona o butswela mashala a hlene, malakabe a tlole ka hanong la yona.

²² Molala wa kganyapa o shidikane, ba e bonang ba phakgasela ke tshabo.

²³ Maphutha a tlalo la yona a momahane, a sataletse, a ke ke a sisinyeha.

²⁴ Bothata ba pelo ya yona ekare ba lejwe, bothata ba yona bo tshwana le ba lwala la moralla.

²⁵ Ha e soballa natla di a phakgasela, di suthe kapele ho yona ke tshabo.

²⁶ Kahodima yona ho kuba sabole, ho kube lerumo, le motsu, le yona tsenene!

²⁷ Ho yona tshepe e tshwana le setoroi feela, lethose le tshwana le patsi e bodile.

²⁸ Ha e balehiswe ke metsu e betswa, majwe a letjeketjane a ka mmoko ho yona.

²⁹ Ho yona koto e tshwana le setoroi feela, ho shohlomana ha marumo ho a e keketehisa.

³⁰ Mpa e makgekgebu a thata sa mangetana, e siya mohlala jwaloka selei se hulwa seretseng.

³¹ E tsapodisa madiba jwaloka pitsa e bela, lewatle le bele sa pitsa e phehile mafura.

³² Tseleng e siya mophula wa metsi a benyang lekweba, o ka re moriri o moputswa o metse lewatleng.

³³ Fatsheng lohle kganyapa ke torobela, ke bopuwa se sa bopellwang le tshabo.

³⁴ Tsohle tse mabela e di shebela maotong, ke kgosi ya batana tsohle tse ikakasang.”