Jobo 40 - BIBELE

Jobo o re o sitwa ho araba Modimo

¹ Morena a boela a re ho Jobo:

² “Na monyatsi a ka phea kgang le Ya Matla wohle? Ya nyatsang Modimo a ke a arabe!”

³ Yaba Jobo o araba Morena, o re:

⁴ “Bona, ha ke letho! Nka o araba jwang? Ka tsoho la ka ke thiba molomo wa ka.

⁵ Ke se nkile ka bua, nke ke ka hlola ke araba; ke ile ka bua habedi, nke ke ka bua ho feta moo.”

Phoofolo tse hlaha di laolwa ke mang?

⁶ Morena a araba Jobo a ntse a le kahara sefefo, a re:

⁷ “Itlame letheka, o eme senna, ke o botse dipotso, wena o nkarabe.

⁸ “Na kahlolo ya ka o tla fela o e hanyetse, ebe o mpea molato, hore o itokafatse?

⁹ Na tsoho la hao le tshwana le la Modimo, hoo o ka kirietsang ka ntswe le kang la hae?

¹⁰ Ikgabise he ka tlotla le ka bokgosi, o ikapese ka hlompho le botlotlehi.

¹¹ Filo la kgalefo ya hao o hlo le hlatse, ha o bona moikgohomosi o mo kokobetse;

¹² ha o bona moikgohomosi o mo theole, o tlabikelle ba kgopo tulong tsa bona;

¹³ o ba epele leroleng ba le mmoho, topo tsa bona o di kwahelle ka lebitleng.

¹⁴ Jwale le nna ke tla o thoholetsa, ke re: ‘Tsoho la hao le letona le ka o pholosa!’

¹⁵ “Tadimisisa kubu hantle! Ke e bopile jwalokaha ke o bopile, empa yona e fula jwang jwaloka kgomo.

¹⁶ Ako bone matla a letheka la yona! Bona bothata ba ditshika tsa mohodu wa yona!

¹⁷ E peralatsa mohatla wa yona, e o peralatse jwaloka fate sa kedare, ditshika tsa rope tsa yona di teteane;

¹⁸ masapo a yona a tshwana le pompo tsa lethose, masapo a yona a tshwana le ditshiya tsa tshepe.

¹⁹ Hara mmopo wa Modimo ke thahadima, e ka hlolwa feela ke Mmopi wa yona.

²⁰ Dijo tsa yona di theoha dithabeng, moo phoofolo tsa naha di bapallang teng.

²¹ E botha tlasa difate tsa leoka, e ipata mokgwabong hara lehlaka.

²² Leoka le e etseditse moriti, e etseditswe sakana-la-nkope, la e etsetswa ke meduwane, meduwane ya melatswana.

²³ Ha e balehiswe ke ho tlala ha noka, ha e tshohe leha Jorodane e ka phuthumana, ya phuthumanela ka hanong la yona.

²⁴ E ka tshwarwa ke mang e ntse e shebile, Ya kenngwa kgwathatha ka nkong ke mang?”