Jobo 4 - BIBELE

Jobo o tennwe ke bophelo

¹ Jwale Elefase ya tswang Temana a araba, a re:

² “Ebe o tla teneha ha motho a buisana le wena? Empa ke mang ya ka tshwarang leme la hae?

³ Hopola kamoo o rutileng ba bangata kateng, wa matlafatsa matsoho a tepeletse!

⁴ Polelo tsa hao di tsheheditse ba kgoptjwang, wa matlafatsa mangwele a rerekela.

⁵ Jwale ha tsietsi e o tlela o a nyahama; ere e o fihlela ebe o a thethelwa!

⁶ Ho tshaba Modimo ha hao hase hona letshepa la hao, ho hloka kodi ha hao yona ntshepedi ya hao?

⁷ “Ako nahane: Mohlokakodi ke ofe ya kila lahleha? Ba lokileng bona ba kile ba timetswa hokae?

⁸ Kamoo nna ke seng ke bone kateng, ba lemang bobe, ba be ba jale bokgopo, ba kotula hlanyelo e tshwana le tsona.

⁹ Ha Modimo a halefa ba a timela, fefo sa kgalefo ya hae se ba fedise.

¹⁰ Lekakuba le a puruma, tautona e kgarumake, meno a ditawana a fetohe, a fetohe dikotwana.

¹¹ Tautona e shwa ke ho hloka sebolawa, tawana tsa tauhadi di phasaphase kahohle.”

Ha ho ya lokileng pela Modimo

¹² “Ke ile ka nyenyeletswa ka lekunutu, ka longwa tsebe ka ba ka hwesheletswa.

¹³ Menahanong ya ka, ya ditoro, bosiu, ha phume sa boroko batho se ba katela,

¹⁴ tshabo le thothomelo tsa nkwela hodimo, masapo wohle a mmele a keqemana.

¹⁵ Seriti sa falola kapela mahlo a ka, mmeleng wa ka mohwete wa iketsa diqala!

¹⁶ Sa re themelele! Ke ntse ke tadimile, sa sona sobepeho ke sa se tsebe! Sa ema kapela mahlo a ka, ha didimala, ka utlwa lentswe le nyenyetsa, le re:

¹⁷ ‘Na ya shwang a ka loka mahlong a Modimo, a hlweka le mahlong a Mmopi wa hae?

¹⁸ Ha Modimo a sa tshepe bahlanka ba hae, mangeloi a hae a a qosetsa bohelehele;

¹⁹ a ka tshepa jwang ba meqhemeng ya makwete, ba bopilweng ka role la lefatshe, ba phetshelwang habonolo jwaloka tshwele?

²⁰ Le ba tjhabela ba phela, le dikele ba fedile, ba timelle ruri, ba sa natswe ke motho.

²¹ Dimapo tsa tente tsa bona di a motsulwa, ba be ba shwe ba hloka bohlale!’ ”