Jobo 39 - BIBELE

Phoofolo tse hlaha di laolwa ke mang?

¹ “Na o tseba nako ya ho tswala ha podi ya naha? Na o kila bona kgama ha e phatla, e tswala?

² Na o ko bale kgwedi tsa kemaro ya tsona? Kapa o tsebe tsatsi la ho tswala ha tsona?

³ Di botha fatshe, di tswale manamane a tsona, bohloko ba ho tswala ebe bo fedile.

⁴ Manamane a tsona a holela naheng, ha a sa shahlile ebe a lahla mohlape.

⁵ “Tonki e hlaha e neilwe bolokolohi ke mang? Meja e ne e kgatile e lokolotswe ke mang?

⁶ Ke e abetse lehwatata hore e phele ho lona, masabasaba a lenyekethe e be bodulo ba yona.

⁷ Lehesheheshe la metse e etsa metlae ka lona, mehoo ya moqhobi ha e fihle tsebeng tsa yona.

⁸ E alohela thabeng ho ya tsoma lekgulo, e nyakurele kahohle ho batla ho hotalana.

⁹ “Na nare e ka thapa, ya eba pelesa ya hao? Kapa ya robala e bothile pela sejelo sa hao?

¹⁰ Na o ka e pana mohomeng hore e o lemele? Makwete ya a phophotha e o setse morao?

¹¹ Na o ka e tshepa ka baka la matla a yona? Wa e tshepela ho phetha mesebetsi ya hao e boima?

¹² Na o ka e tshepela ho pola mabele a hao, le ho a thothela hae ha a le otlong sa hao?

¹³ “Mapheo a dimpshe a phuphusela ka thabo, empa e ke ke ya fofa jwaloka mokotatsie.

¹⁴ Mpshe e behela mahe a yona mobung, e a tlohelle teng ho alangwa ke lehlabathe.

¹⁵ Ha e elellwe hore leoto le ka a bjaratsa, kapa sebatana sa a hatakela hodimo.

¹⁶ E sotla madinyane a yona jwalokaha eka hase a yona, ha e tsotelle letho, leha eba e tswaletse lelea,

¹⁷ hobane yona Modimo o ila e tima bohlale, a se ka e tsipela le kelello ena e pala!

¹⁸ Empa ha e thathalatsa mapheo ho matha, e a keketeha ha e bona pere le mopalami!

¹⁹ “Na pere matla e a filwe ke wena, molala wa o kgabisa ka moetse o maebeebe?

²⁰ Na o ka tseba ho e qotomisa sa tsie, wa e kgorohlisa ka dinko ho tshosa batho?

²¹ E tila fatshe ka kgohlong, e thabetse matla, e itukubetse kahara marumo sa motswelantweng.

²² Pere e tsheha tshabo, ha ho letho le e tshosang; ha e ke e furalla ke ho tshaba sabole.

²³ Kgopong tsa yona ho shohlomana kgohlopo, ho bile ho tsekema marumo le ditsenene!

²⁴ E koma mobu ka bohale le ka mabifi, leha ho letswa lenaka ho tila ha e ho kgaotse.

²⁵ Ha naka le lla e a howa, e re: ‘Aha!’ E dupa monko wa ntwa e sa le hole! E dupe mehoo ya balaodi le mekgosi ya ntwa.

²⁶ “Na ke ka bohlale ba hao phakwe e tsebang ho fofa, e thathalatsang mapheo, ebe e leba borwa?

²⁷ Na ke ka taelo ya hao ntsu e tsebang ho fofa, e hahang hlaha sa yona hodimo tsullung?

²⁸ E phela dilomong, bosiu e lala hona teng, qhobosheane ya yona e ka lefarung.

²⁹ Diselo e di tsoma e dutse hona moo, mahlo a yona a di bona di le hole.

³⁰ Madinyane a yona a phela ka ho nwa madi, kamehla yona e fumanwa hara dififi.”