Jobo 38 - BIBELE

Morena o araba Jobo

¹ Jwale Morena a araba a le kahara sefefo, a re ho Jobo:

² “O mang wena, o fifatsang merero ya ka ka ho pepeta, empa o se na tsebo?

³ Itlame letheka, o eme senna, ke o botse dipotso, wena o nkarabe.

⁴ “Ha ke rala metheo ya lefatshe o no le kae? Haeba o na le tsebo, ako bolele he!

⁵ Kaha o tsebanyane: Tekanyetso tsa lona di rerilwe ke mang? Thapo e methang bonamo e harolotswe ke mang?

⁶ Tshiya tsa metheo ya lona di epetswe kae? Lejwe la mantlha lona la bewa ke mang,

⁷ mohla bo-Mphatlalatsane ba binang ba le mmoho, mangeloi wohle a howa ka thabo?

⁸ “Mohla lewatle le phatlohang mohloding wa lona, menyako e ne tinketswe ke mang ho le thibela?

⁹ Ha ke ne ke le etsetsa kobo ya maru, ke le tlama mokgubu ka fifi la bo-nka-ntjana;

¹⁰ ha ke ne ke le sehela meedi ya lona, ke le tinkeletsa ka mamati le mekwallo,

¹¹ ka na ka re: ‘Maremelo a metsi a hao ke ana, maqhubu a hao a bilohang a tla fella mona!’

¹² “Haesale o tswalwa na o kila laolela meso dinako, wa laela mafube ho hlaha ka nako ya wona,

¹³ hore pheletso tsa lefatshe a di aparele, ba kgopo ba be ba phasaphase?

¹⁴ Jwalokaha mmopo wa tempe sa tiiso o sala letsopeng, sedi le bonahatsa bopeho tsa lefatshe hantle, le di bonahatse sa mokgabiso seaparong.

¹⁵ Ba kgopo ba ke ke ba bona lesedi, matla a bona a tla fediswa.

¹⁶ “Na mehloding ya lewatle o kila fihla? Kapa kgotjheletsane tsa madiba wa di tsamaya?

¹⁷ Na menyako ya ntlo ya lefu o kila e bona? Kapa wa bona menyako ya Nqalo ya Bafu?

¹⁸ Na bonamo ba lefatshe o a bo tseba? Haeba tsena tsohle o a di tseba, ako bolele!

¹⁹ “Tsela e yang habo lesedi ke efe? Lehae labo lefifi lona le hokae?

²⁰ Na o ka di isa habo tsona? Na tsela tse yang teng o a di tseba?

²¹ O a di tseba, hoba o tswetswe pele ho tsona! Lemo tsa ho phela ha hao di ngata!

²² “Na o kila kena matlung a polokelo ya lehlwa, kapa wa bona matlo a polokelo ya sefako,

²³ tseo ke di boloketseng nako ya ditsietsi, tsatsi la ho futuha le la dintwa?

²⁴ Tsela e yang ntswanatsatsi yona e kae? E yang habo moya wa botjhabela yona e kae?

²⁵ “Metsi a dikgohola a tjheketswe molapo ke mang, letolo le thwathwaretsang la rallwa tsela ke mang,

²⁶ hore pula e nele nahathothe, lehwatateng leo ho seng baahi ho lona,

²⁷ bataolo le dikaka di tle di nwesetswe, mobung ho fupuhe jwang bo botalana?

²⁸ Ntata pula ekaba yena ke mang? Marothodi a phoka wona a tswetswe ke mang?

²⁹ Ekaba leqhwa le tswa ho ya mang popelo? Rame sa lehodimo se lalang sona se tswetswe ke mang?

³⁰ Metsi a a hwama, a be sengangata jwaloka lejwe, leqhwa le aparele madiba kahohle.

³¹ “Na o ka tlamahanya mahlaahlela a Selemela, kapa wa lokolla kgwele tsa Makolobe?

³² Na o ka hlahisa dinaledi ka dinako tsa tsona, wa tsamaisa Bere le naletsana tsa yona?

³³ Melao e tsamaisang tsa lehodimo na o a e tseba? Na le moo lefatsheng o ka e sebedisa?

³⁴ “Ka ntswe la hao, na maru o ka a laela hore a o apese ka pula ya ditlwebelele?

³⁵ Na ke wena ya ka laelang lehadima ho thwakgatsa? Na le ye le tle ho wena, le re: ‘Ke nna enwa?’

³⁶ Pelo ya motho bohlale e bo filwe ke mang? Mohopolo wona kutlwisiso wa e newa ke mang?

³⁷ Mohlalefi ke ofe ya tsebang ho bala maru, ya ka thulamisang merifi, merifi ya lehodimo,

³⁸ ha role la lefatshe le fetoha sengangata, makwete a momana, a etsa diqitikwe?

³⁹ “Na o ka tsomela tauhadi dinyamatsane, kapa tawana tsa yona wa di kgorisa ha di lapile,

⁴⁰ di ntse di qatjhame dilaong tsa tsona, kapa di laletse kahara dihlahla?

⁴¹ Ke mang ya baballang lekgwaba ka dijo, ha madinyane a lona a ipiletsa ho Modimo, a lelera hohle ke ho hloka dijo?