Jobo 36 - BIBELE

Elehu o babatsa boholo ba Modimo

¹ Elehu a tswela pele, a re:

² “Bea butle ho se hokae, nke ke o bontshe: Polelo tse emelang Modimo di sa le teng.

³ Tsebo ke tla e fuputsa hole le hohle, ha ke buella ho loka ha Mmopi wa ka.

⁴ Polelo tsa ka hase tsa bosawana; ya buang le wena ke monna wa mohlalefi.

⁵ “Modimo o matla, empa ha a nyedise batho; ha ho letho leo a sa le tsebeng.

⁶ A ke ke a tlohela moetsadibe a phela, empa mafutsana o a sebeletsa ka toka.

⁷ Ba lokileng ha a kgaotse ho ba hlokomela, o ba bea le dikgosi hodima diterone; o ba bea teng, a ba phahamise kamehla yohle.

⁸ Empa ha ba tlamilwe ka mahlaahlela, ba bofilwe ka kgwele tsa tlokotsi,

⁹ o ba supisa mesebetsi ya bona, dibe tse entsweng ka boikgantsho.

¹⁰ O etsa hore ba mamele kgalemelo ya hae, a ba laele hore ba furalle bokgopo.

¹¹ Ha ba mo mamela, ba mo sebeletsa, ba tla qeta matsatsi a bona ka boiketlo, lemo tsa bona ba di qete ba atlehile.

¹² Empa ha ba ithiba ditsebe, ba sa mamele, lefu la bona e tla ba la sabole, ba be ba shwe tsebo ba se na yona.

¹³ “Baetsadibe ba tletse kgalefo dipelong tsa bona, leha ba se ba tlamilwe ha ba ke ba kopa thuso.

¹⁴ Ba shwa ba sa le batjha, ba shwe ba phela le bo-ramaotwana.

¹⁵ Ba ditlokotsing o ba pholosa ka ditlokotsi, a thibolle tsebe tsa bona ka matshwenyeho.

¹⁶ “Le wena a ka ba o ntshitse ditsietsing, a o isitse bakeng se sa patisanang, moo tafole ya hao e tla tlala mapetle!

¹⁷ Kahlolo ya ba kgopo e o wetse hodimo, kahlolo le toka di se di o maname.

¹⁸ Hlokomela, esere maruo a o hohela, o se ka dumela ha tjotjo e o kgelosa.

¹⁹ Ha o llela thuso, maruo a hao a ke ke a o tswela molemo, kapa matla a hao a o ntsha tsietsing tsa hao.

²⁰ Se labalabele bosiu ba kahlolo ho fihla, ha tjhaba di timela dibakeng tsa tsona.

²¹ Hlokomela, o se sekamele bokgopong, boo o bo ratang ho feta tlokotsi.

²² “Modimo o phahametse bohle ka matla a hae; moruti ke ofe ya tshwanang le yena?

²³ Tsela ya hae o e kgethetswe ke mang? Ke ofe ya ka reng ho yena: ‘Mona jwale o fositse?’

²⁴ Hopola ho tlotlisa mesebetsi ya hae, mesebetsi eo batho ba e rokang ka difela.

²⁵ Batho bohle ba bone mesebetsi eo, ba e boha ba le hole le yona.

²⁶ Modimo o moholo ho feta kutlwisiso ya rona, palo ya lemo tsa hae ha re ka ke ra e fihlela.

²⁷ “O monya marothodi a metsi, ka mouwane wa ona ebe o nesa pula.

²⁸ Maru a pula a tlhotlela diphororo fatshe, mafafatsane e be ditlwebelele, e be ditlwebelele ho batho.

²⁹ Ya tsebang ho thiba ha maru ke mang, le ho thwathwaretsa ha lehodimo la hae?

³⁰ Hadima la hae le takolotsa le lehodimo, botebo ba lewatle o a bo kguruma.

³¹ Ke ka tsona a ahlolang ditjhaba, ke ka tsona a di fang nala.

³² O tshwere lehadima ka matsoho a hae, o laela hore le otle botsekeng.

³³ Letolo ke selelekela sa sefefo sa hae, ho tla ha sona le diphoofolo di a ho tseba.”